លេខ អាសន្ន
117 ប៉ូលីស / 666 អគ្គីភ័យ /
   119
សង្គ្រោះ
លេខទូស័ព្ទសំខាន់ៗ


ផ្ទះមនុស្សធម៌ទី៣០ របស់សាខាកាកបាទក្រហមកម្ពុជាខេត្តសៀមរាប ត្រូវបានជូនគ្រួសារទុរគតជន នៅឃុំបល្ល័ង្គ ស្រុកប្រាសាទបាគង ខេត្តសៀមរាប
បញ្ចូលអត្ថបទ ៖ គួច វារីថ្លា
2017-08-17 19:57:55

ខេត្តសៀមរាប ៖ នៅរសៀលថ្ងៃទី១៧ ខែសីហា ឆ្នាំ២០១៧នេះ លោកជំទាវ គួយ ណាលីន ឃឹម ប៊ុនសុង អនុប្រធាន គណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី បានអញ្ជើញចុះប្រគល់ផ្ទះមនុស្សធម៌ទី៣០ ដែលផ្ដួចផ្ដើមដោយឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខា ផ្ទះនេះមានទំហំ ៤ម៉ែត្រគុណ ៦ម៉ែត្រ ធ្វើពីឈើ ប្រក់ស័ង្កសី ជូនគ្រួសារប្អូនស្រី រឿន អុន អាយុ៣៧ឆ្នាំ ជាស្ត្រីមេម៉ាយ ទីទ័លក្រខ្លាំង មានជម្ងឺប្រចាំកាយ និង មានកូនក្នុងបន្ទុក៥នាក់ បច្ចុប្បន្នដើរស៊ីឈ្លួលគេ ដើម្បីទ្រទ្រង់ជីវគ្រួសារ រស់នៅភូមិត្រាច ឃុំបល្ល័ង្ក ស្រុកប្រាសាទបាគង ខេត្តសៀមរាប ហើយក៏ជាផ្ទះទី៤ នៅក្នុងស្រុកប្រាសាទបាគងនេះផងដែរ ។ បន្ទាប់ពីសេចក្តីរាយការណ៍របស់លោក ពៅ ពិសិដ្ឋ ប្រធានក្រុមករងារថ្នាក់ខេត្ត ចុះជួយឃុំ បាល្ល័ង្គ ស្រុក ប្រាសាទបាគង និង ជាអភិបាលរងនៃគណៈអភិបាលខេត្តរួចមក មានប្រសាសន៍ក្នុងឱកាសនោះ លោកជំទាវ គួយ ណាលីន ឃឹម ប៊ុនសុង បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។ លោកជំទាវក៏បានផ្តាំផ្ញើដល់ សមាជិកគ្រួសារប្អូនស្រី ត្រូវចេះសម្អាតថែរក្សាផ្ទះថ្មីនេះ ដើម្បីបានជាជម្រកដ៏កក់ក្តៅទៅអនាគត ។ លោកជំទាវក៏បានបន្តថា សូមកុំអស់សង្ឃឹមចំពោះវាសនារបស់ខ្លួនទោះបីគ្រួសារប្អូនទាំងពីរមានភាពក្រីក្រក៏ពិតមែន ក៏សង្គមជាតិមិនបោះបង់ចោលក្រុមគ្រួសារប្អូនស្រីនិងក្មួយៗឡើយ យើងមានអាជ្ញាធរមូលដ្ឋានជាអ្នកគ្រប់គ្រងនៅជិតខ្លួន ។ ក្នុងនោះដែរលោកជំទាវក៏បានផ្តាំផ្ញើដល់បងប្អូនទាំងអស់ដែលបានចូលរួម ត្រូវមានការប្រុងប្រយ័ត្នខ្ពស់ នៅក្នុងរដូវវស្សានេះ នៅពេលមានភ្លៀងផ្គរន្ទះ ខ្យល់កន្ទ្រាក់ និង មានប្រធានស័ក្តណាមួយកើតឡើង គឺត្រូវរត់ទៅរកទីទួលសុវត្ថិភាព និង ត្រូវចេះធ្វើការថែទាំសុខភាព ត្រូវសម្រានក្នុងមុង និង ថែទាំកូនតូចៗរបស់ខ្លួន នៅពេលមានជំងឺត្រូវបញ្ជូនកូនទៅកាន់មណ្ឌលសុខភាព និង ជម្រុញកូនៗរបស់ខ្លួនឲ្យបានទៅសិក្សារៀនសូត្រ ព្រមទាំងត្រូវធ្វើស្រែចំការឲ្យបានទាន់រដូវ ព្រោះអីរដូវស្សាជិតផុតហើយ និង ត្រូវធ្វើការដាំដុះដំណាំរួមផ្សំ ក្នុងការផ្គត់ផ្គង់ក្រុមគ្រួសារផងដែរ ។ អំណោយមនុស្សធម៌សម្រាប់សង្កត់ផ្ទះរួមមាន មុង១ ភួយ១ សារុង១ ក្រមា១ កន្ទេល១ អង្ករ៥០គីឡូក្រាម មី១កេស ត្រីខ១យួរ ទឹកត្រី១យួរ ទឹកបរិសុទ្ធ៥យួរ សម្ភារៈផ្ទះបាយមួយចំនួន និង ថវិកា២០ម៉ឺនរៀល ។ សម្រាប់លោកតា លោកយាយ ដែលអញ្ជើញចូលរួមម្នាក់ៗទទួលបានថវិកាមួយចំនួផងដែរ ។ ជាមួយគ្នានោះដែរ លោកជំទាវ ម៉ម វាសនា សមាជិកាគណៈកម្មាធិការសាខាកាកបាទក្រហមខេត្តក៏បានឧបត្ថម្ភនូវសម្លៀកបំពាក់មួយចំនួន ដល់កូនៗរបស់ប្អូនស្រី និង លោកស្រី អាណា ប្រធានក្រុមរ៉ូតារី អង្គរ ក៏បានឧត្ថម្ភនូវកង់១គ្រឿង និងសម្លៀកបំពាក់មួយចំនួនទៀតផង ៕ អត្ថបទ ម៉ី សុខារិទ្ធ ភ្នាក់ងារសៀមរាប