អង្គវេទិកាថ្ងៃនេះមានអ្នកចូលរួមពីថ្នាក់ដឹកនាំ តំណាងក្រសួង-មន្ទីរ និងស្ថាប័ននៃរដ្ឋបាលថ្នាក់ជាតិ និងថ្នាក់ក្រោមជាតិ អង្គទូត និងដៃគូអភិវឌ្ឍន៍ សង្គមស៊ីវិល និងសហជីព សហគ្រិន និងស្វ័យនិយោជន៍ជាស្រ្តី ភ្ញៀវជាតិ និងអន្តរជាតិសរុបប្រមាណ ២០០នាក់ និង៥០០នាក់ទៀតតាមប្រព័ន្ធបញ្ជូនរូបភាពនិងសម្លេង (Zoom) ដែលកំពុងធ្វើការជាមួយរាជរដ្ឋាភិបាល កម្ពុជាក្នុងការផ្សព្វផ្សាយ និងពង្រឹងគោលនយោបាយគាំពារសង្គម និងគាំពារគ្រួសារប្រកបដោយបរិយាបន្ននៅកម្ពុជា ។ វេទិកាជាតិនេះក៏មានការអញ្ជើញចូលរួមជាវាគ្មិនកិត្តិយសពី លោកជំទាវ Lenny N. Rosalin អនុរដ្ឋមន្ត្រីទទួលបន្ទុកផ្នែកសមភាពយេនឌ័រ ក្រសួងផ្តល់ភាពអង់អាចដល់ស្ត្រី និងគាំពារកុមារ ប្រទេសឥណ្ឌូនេស៊ី និង ជាប្រធានគណៈកម្មាធិការអាស៊ានស្តីពីស្ត្រី ទៅលើប្រធានបទ៖ «ការប្តេជ្ញាចិត្តរបស់អាស៊ានចំពោះវិស័យសេដ្ឋកិច្ចថែទាំ» រួមទាំងមានការពិភាក្សាតុមូលទៅលើប្រធានបទស្តីពី ការលើកកម្ពស់ភាពជាសហគ្រិនរបស់ស្ត្រីក្នុងតំបន់អាស៊ានតាមរយៈគោលនយោបាយគាំពារគ្រួសារ និងគាំពារសង្គម ពីវាគ្មិនកិត្តិយសចំនួន ០៥រូប រួមមាន៖១. ឯកឧត្តម ថេ ឈុនហាក់ អគ្គនាយក នៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច, ២. លោកជំទាវឧកញ៉ាទន្តបណ្ឌិត អេង លីគង់ ប្រធានបណ្តាញសហគ្រិនស្រ្តី នៅកម្ពុជា , ៣. លោកស្រី ចាន់ រ៉ាមី នាយិកាប្រតិបត្តិអង្គការកម្មវិធីអភិវឌ្ឍន៍យុវជន និងជាប្រធានវេទិកាគាំពារសង្គមសម្រាប់ទាំងអស់គ្នា, ៤. លោកស្រី Ms. Channe Lindstrøm Oğuzhan មន្ត្រីសង្គមកិច្ច ផ្នែកសមភាពយេនឌ័រ និងបរិយាប័ន្នសង្គម នៃនាយកដ្ឋានអភិវឌ្ឍន៍សង្គម, ESCAP, ៥. លោកស្រី Jacel Javier Paguio មន្ត្រីជាន់ខ្ពស់ នៃនាយកដ្ឋានលុបបំបាត់ភាពក្រីក្រ និងយេនឌ័រ នៃលេខាធិការដ្ឋានអាស៊ាន ។
ថ្លែងនៅក្នងកិច្ចពិធីបើកវេទិកានេះ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី មានប្រសាសន៍ថា៖« វេទិកានេះ នឹងផ្តល់ឱកាសដល់អ្នកចូលរួមបានស្វែងយល់កាន់តែស៊ីជម្រៅបន្ថែមទៀត លើគោលនយោបាយ និងកម្មវិធីពាក់ព័ន្ធនឹងការងារថែទាំគ្មានប្រាក់កម្រៃ និងគោលនយោបាយគាំពារសង្គម ដែលមាននៅក្នុងក្របខណ្ឌអាស៊ាន និងនៅក្នុងតំបន់ តាមរយៈការចែករំលែកនូវមេរៀនពិសោធន៍ពីវាគ្មិនកិត្តិយស និងដើម្បីប្រមូលនូវព័ត៌មាន និងមតិយោបល់ សម្រាប់ក្រសួងកិច្ចការនារី និងដៃគូពាក់ព័ន្ធ មករៀបចំចងក្រងជាផែនទីបង្ហាញផ្លូវជាក់លាក់មួយ ដែលនឹងយកទៅអនុវត្តបាននាពេលអនាគត ក្នុងកិច្ចការដ៏មានសារៈសំខាន់នេះ។»។
នៅក្នុងអង្គវេទិកានេះដែរ លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍ផងដែរថា ៖ «គោលនយោបាយគាំពារសង្គម និងគាំពារគ្រួសារ មានសារៈសំខាន់ណាស់ ក្នុងការជួយជ្រោមជ្រែងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកាត់បន្ថយវិសមភាពយេនឌ័រ និងភាពក្រីក្រនៅកម្ពុជា ជាពិសេសក្នុងចំណោមពលរដ្ឋជាស្រ្តី។ វេទិកាថ្ងៃនេះឆ្លុះបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា តាមរយៈក្រសួងកិច្ចការនារី និងការចូលរួមចំណែករបស់ស្ថាប័ន នានា និងអង្គការសង្គមស៊ីវិលក្នុងការលើកកម្ពស់គោលនយោបាយគាំពារសង្គម និងគាំពារគ្រួសារប្រកបដោយបរិយាបន្ន នៅក្នុងប្រទេស និងក្នុងសហគមន៍អាស៊ាន។ អង្គការអុកស្វាម និងអង្គការដៃគូ នឹងបន្តជួយជ្រោមជ្រែងរដ្ឋាភិបាលកម្ពុជា ដើម្បីកាត់បន្ថយភាពក្រីក្រ និងលើកកម្ពស់សមភាពយេនឌ័រនៅកម្ពុជា៕