នៅក្នុងកិច្ចប្រជុំនេះផងដែរ ក៏បានលើកយកបញ្ហាជាច្រើនមកពិភាក្សា ដើម្បីស្វែងរកដំណោះស្រាយរួមគ្នាសម្រាប់ការពារជនរងគ្រោះ និងងាយរងគ្រោះ ដោយអំពើហិង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ បន្ថែមពីនោះ លោកស្រីប្រធានអង្គប្រជុំ បានសង្កត់ធ្ងន់ទៅលើលទ្ធផលការងារប្រចាំឆ្នាំ២០២១ ដែលបានមានការចូលរួមអនុវត្តយ៉ាងសកម្មពីគ្រប់អ្នកពាក់ព័ន្ធ ដែលធ្វើឱ្យសម្រេចបានលទ្ធផលគួរជាទីមោនៈ និងគួរឱ្យមានការកត់សម្គាល់ បើទោះបីជាមានការរីករាលដាលជំងឺកូវីដ-១៩យ៉ាងក៏ដោយ ក៏យើងនៅបន្តរិះរកមធ្យោបាយក្នុងទប់ស្កាត់អំពើជួញដូរមនុស្សតាមគ្រប់រូប និងតាមលទ្ធភាពបច្ចេកទេសរបស់ក្រុមការងារនីមួយៗប្រកបដោយការយកចិត្តទុកដាក់ ខ្ពស់។ ដើម្បីឆ្លើយតបទៅការខិតខំប្រឹងប្រែងនេះ សូមលោក លោកស្រី ជាសមាជិក និងអង្គការដៃគូទាំង ធ្វើការពិនិត្យ និងបំពេញបន្ថែមទៅលើសកម្មភាពដែលខ្លួនបានអនុវត្តនិងដាក់បញ្ចូលទៅក្នុងរបាយការណ៍លទ្ធផលប្រចាំឆ្នាំ របស់គណៈកម្មាធិការប្រយុទ្ធប្រឆាំងអំពើជួញដូរមនុស្ស ដែលក្រុមការងារលេខាធិការដ្ឋានបានធ្វើការបូកសរុប។
ថ្លែងនៅក្នុងកិច្ចប្រជុំនេះ លោកស្រី ក៏បានគាំទ្រ និងជំរុញឱ្យអ្នកពាក់ព័ន្ធទាំងអស់ ធ្វើការសហការជាមួយមន្ទីរការងារនិងបណ្តុះបណ្តាលវិជ្ជាជីវៈខេត្តសៀមរាប លើការអនុវត្តកម្មវិធី សុវត្ថិភាព និងយុត្តិធម៌ ដោយកម្មវិធីនេះផ្តោតសំខាន់ ក្នុងការផ្តល់សេវាការពារកាន់តែប្រសើរអំពីក្របខ័ណ្ឌអភិបាលកិច្ចទេសន្តរប្រវេសន៍ការងារជាស្រ្តី ដែលឆ្លើយតបចំពោះយេនឌ័រ ការកាត់បន្ថយភាពរងគ្រោះដោយអំពើហិង្សា និងការជួញដូរមនុស្ស និងការផ្តល់សេវាដែលមានគុណភាព ភាពឆ្លើយតប និងមានការសម្របសម្រួលដ៏ល្អផងដែរ។ បន្ថែមពីនោះ លោកស្រី បានវាយតម្លៃថា ការអនុវត្តកម្មវិធីនេះ គឺស្របទៅនឹងទិសដៅដែលបានដាក់ចេញដោយលេខាធិកាដ្ឋាន នៃគណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស ក្នុងការបន្តសហការឱ្យបានទូលំទូលាយទាំងក្នុង និងក្រៅប្រទេស ជាមួយមន្ទីរ អង្គភាព អង្គការដៃគូជាតិ អន្តរជាតិ ដើម្បីឆ្ពោះទៅគោលដៅរួមគ្នា ក្នុងការបង្ការ ទប់ស្កាត់ ការពារ បង្ក្រាប និងផ្តន្ទាទោស ដើម្បីឈានទៅលុបបំបាត់ អំពើជួញដូរមនុស្សគ្រប់រូបភាព។
សូមបញ្ជាក់ជូនផងដែរថាកម្មវិធី សុវត្ថិភាព និងយុត្តិធម៌ សម្រាប់ពលករទេសន្តរប្រវេសន៍ជាស្រ្តី គឺដើម្បីឆ្ពោះទៅសម្រេចឱ្យបាននូវសិទ្ធិ និងឱកាសសម្រាប់ពលករទេសន្តរប្រវេសន៍ជាស្រ្តីនៅក្នុងតំបន់អាស៊ាន ដែលជាផ្នែកមួយនៃគំនិតផ្តួចផ្តើមរបស់ Spotlight ដើម្បីលុបបំបាត់អំពើហិង្សាលើស្រ្តី និងក្មេងស្រីហើយក៏ជាគំនិតផ្តួចផ្តើមជាសកល ដែលបានអនុវត្តជាច្រើនឆ្នាំ រវាងសហភាពអ៊ឺរ៉ុប និងអង្គការសហប្រជាជាតិ។ កម្មវិធីនេះ ត្រូវបានធ្វើឡើងតាមរយៈភាពជាដៃគូ រវាង ILO និង UN Women រួមទាំងមានកិច្ចសហការផងដែរពី UNODC ក្នុងគោលដៅរួម ដើម្បីធានាថា ទេសន្តរប្រវេសន៍បានផ្តល់នូវសុវត្ថិភាព និងយុត្តិធម៌ដល់ស្រ្តីគ្រប់រូប ក្នុងតំបន់អាស៊ាន។