ល្ងាចថ្ងៃទី១៦ ខែតុលា ឆ្នាំ២០២០ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាបបានដឹកនាំក្រុមការងារចុះពិនិត្យស្ថានភាពទឹកអាងទំនប់ម្កាក់ ស្ថិតនៅភូមិខ្វាវ ឃុំគោកធ្លកលើ ស្រុកជីក្រែង ខេត្តសៀមរាប។ឯកឧត្តម អភិបាលខេត្តបានណែនាំដល់មន្ទីរធនធានទឹកនិងឧតុនិយមត្រូវតាមដាន និងពិនិត្យកម្ពស់ទឹកឱ្យបានជាប់លាប់ ប្រសិនបើទឹកឡើងដល់កម្រិតមួយត្រូវប្រកាសអាសន្ននោះត្រូវឆាប់ជូនដំណឹងដើម្បីធ្វើជម្លៀសប្រជាពលរដ្ឋរកកន្លែងសុវត្ថិភាព។ ម្យ៉ាងទៀត ត្រូវសហការជាមួយអាជ្ញាធរពាល់ព័ន្ធត្រៀមលក្ខណៈ ដើម្បីធ្វើការបើកទ្វារទឹកបញ្ជៀសការបាក់ទំនប់ ឬទឹកឡើងដល់កម្រិត។ ដោយឡែកគណៈបញ្ជាការឯកភាពរដ្ឋបាល និងគណៈកម្មការគ្រប់គ្រងគ្រោះមហន្តរាយរដ្ឋបាលក្រុងស្រុកឃុំ សង្កាត់ ត្រូវត្រៀមជានិច្ចក្នុងការជួយអន្តរាគមន៍ប្រជាពលរដ្ឋរកទីទួលសុវត្ថិភាព ជៀសវាងមានបញ្ហាគ្រោះថ្នាក់ផ្សេងៗ។ ជាមួយគ្នានេះ ឯកឧត្តម អភិបាលខេត្តក៏បានអំពាវនាវដល់បងប្អូនប្រជាពលរដ្ឋ និងសាធារណជន មេត្តាបង្កើនការយកចិត្តទុកដាក់និងប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ ព្រមទាំងចូលរួមសហការ និងផ្តល់ព័ត៌មានជូនដល់អាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍បានទាន់ពេលវេលា៕
