នាព្រឹកថ្ងៃចន្ទ ៣ កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ១៩ ខែតុលា ឆ្នាំ ២០២០ លោក ខេង ញ៉ុល ប្រធានមន្ទីរអភិវឌ្ឍន៍ជនបទ ខេត្តសៀមរាប បានដឹកនាំមន្រ្តីបច្ចេកទេសផ្លូវ ចុះពិនិត្យស្ថានភាពផ្លូវជនបទគ្រប់ទីកន្លែងដែលទទួលរងការខូចខាត ដោយសារជំនន់ទឹកភ្លៀង (flash floods) ហូរកាត់ជាកំណាត់ៗ នៅតាមកន្លែងដែលមានលក្ខណៈទាប ដើម្បីពិនិត្យមើលការខូចខាត និងវាយតម្លៃផលប៉ះពាល់ ដែលកើតឡើងលើហេដ្ឋារចនាសម្ព័ន្ធផ្លូវជនបទក្នុងក្របខ័ណ្ឌខេត្តសៀមរាប ដោយក្នុងនោះ មានដូចជាផ្លូវនៅក្នុងស្រុកវ៉ារិន និងស្រុកអង្គរជុំ ដែលមានទឹកហូរកាត់ជាច្រើនកន្លែង ។ បន្ទាប់ពីបានពិនិត្យស្ថានភាពជាក់ស្តែង និងវាយតម្លៃទំហំនៃការខូចខាតរួចហើយ ទិន្នន័យនេះនឹងត្រូវដាក់សំណើទៅក្រសួងអភិវឌ្ឍន៍ជនបទ ដើម្បីស្នើសុំធ្វើការស្តារ និងជួសជុលឡើងវិញ ដើម្បីជួយសម្រួលដល់បងប្អូនប្រជាពលរដ្ឋរស់នៅតំបន់ជនបទការធ្វើចរាចរណ៍ប្រចាំថ្ងៃ មានភាពងាយស្រួល៕
