ដើមី្បចូលរួមនូវទុក្ខលំបាករបស់រាជរដ្ឋាភិបាលកម្ពុជា ក្នុងពេលប្រជាពលរដ្ឋនៅតាមបណ្តារាជធានី ខេត្ត ជួបនូវគ្រោះជំនន់ទឹកភ្លៀងក្នុងរយៈពេលប៉ុន្មានថ្ងៃមកនេះ បានធ្វើឲ្យខូចខាតនូវហេដ្ឋរចនាសម្ព័ន្ធផ្លូវថ្នល់ លិចលង់លំនៅដ្ឋានរបស់ប្រជាពលរដ្ឋ ដែលធ្វើឲ្យបងប្អូនជួបនូវការខ្វះខាត ជាស្បៀងអាហារប្រចាំថ្ងៃ​ ដូច្នេះ​រដ្ឋបាលខេត្ត​បាន​យកចិត្តទុកដាក់​ និងខិតខំរកជំនួយសប្បុរស​ ដេីម្បីជួយដល់ពួកគាត់​ ជាក់ស្ដែង​នៅថ្ងៃទី២៣ ខែតុលា ឆ្នាំ២០២០នេះ ក្រុមការងារក្រុមហ៊ុន​ អ៊ិនធេី​ ខនគ្រីត​ អ៊ិនវេសម៉ិន​ ខូ​ អិល​ ធី​ ឌី​ (ICI)​ បានយកគ្រឿងឧបភោគបរិភោគមួយចំនួនមានអង្ករ ៥០០គ.ក​ ត្រីខ ២៥យួរ , មីជាតិ ២៥កេសតូច​, ទឹកត្រី ២៥យួរ , ទឹកសុទ្ធ​ ១០០យួរ និង ថវិកាមួយចំនួន ០២លានរៀល​, មន្ទីរ​ពហុព្យាបាល​ ៧៧៧​ ខេត្តសៀមរាប​ ឧបត្ថម្ភ​ថវិកា​ ០១លាន​រៀល​ និងក្រុមហ៊ុន​ Green Angkor Inter Advertising Co., Ltd ឧបត្ថម្ភ​ អង្ករ ០១តោន ប្រគល់ជូនរដ្ឋបាលខេត្តសៀមរាប ក្រោមអធិបតីភាពឯកឧត្តម ទៀ សីហា អភិបាល នៃគណៈអភិបាលខេត្ត។នាឱកាសនោះដែរឯកឧត្តម ទៀ សីហា ក៏បានធ្វើការថ្លែងអំណរគុណដល់ទឹកចិត្តដ៏សប្បុរសធម៌របស់ក្រុមហ៊ុន​ ICI មន្ទីរ​ពហុព្យាបាល​ ៧៧៧​ និងក្រុមហ៊ុន​ Green​ Angkor​Advertising​ Co.,Ltd ដែលបានផ្តល់អំណោយ ជាថវិកា​ និងគ្រឿងឧបភោគបរិភោគដល់រដ្ឋបាលខេត្តសៀមរាប ក្នុងពេលដែលមានស្រុកមួយចំនួនបានទទួលរងផលប៉ះពាល់ដោយទឹកជំនន់ទឹកភ្លៀង ។ឯកឧត្តមបានបន្តទៀតថា ក្នុងនាមជាគណៈបញ្ជាការឯកភាពរដ្ឋបាលខេត្ត បានដាក់នូវវិធានការមួយចំនួនដល់គណៈ បញ្ជាការឯកភាពរដ្ឋបាលស្រុក ដើមី្បត្រៀមបង្ក ក្នុងការសង្រ្គោះប្រជាពលរដ្ឋ និងសត្វពាហនៈរបស់បងប្អូនទៅកាន់ទីទួលសុវត្ថិភាព ព្រមទាំងឲ្យយកចិត្តទុកដាក់ខ្ពស់លើបញ្ហាសុខភាពបងប្អូន និងមិនទុកឲ្យបងប្អូនណាម្នាក់ស្លាប់ដោយអាជ្ញាធរមិនដឹងនោះឡើយ។ ម៉្យាងទៀតឯកឧត្តមក៏បានសំណូមពរដល់ក្រុមហ៊ុន បន្តនូវប្រពៃណីចែករំលែកនេះ ទៅតាមបណ្តាខេត្ត ក្រុង ស្រុកផ្សេងទៀត​ដែលរងផលប៉ះពាល់​ ហើយអំណោយទាំងនេះឯកឧត្តមនឹងយកទៅចែកជូនដល់បងប្អូនប្រជាពលរដ្ឋរងគ្រោះ និងងាយរងគ្រោះក្នុងពេលមានជំនន់ទឹកភ្លៀងនេះផងដែរ ៕