ថ្ងៃពុធ ១១កេីត ខែកត្ដិក ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៧ ខែតុលា ឆ្នាំ២០២០ នៅក្នុងមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ក្បែរចំណុចភ្នំហប់ ឃុំត្បែង ស្រុកបន្ទាយស្រីបានរៀបចំពិធីដាំកូនឈេី ដើម្បី«គម្រោងជំរុញបរិយាកាសអំណោយផលសម្រាប់ការអភិវឌ្ឍដោយចីរភាព» ក្រោមអធិបតីភាព ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងលោក ង៉ាន់ ភិរុណ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងមានការអញ្ជេីញចូលរួមពី ឯកឧត្តម លោកជំទាវ អនុរដ្ឋលេខាធិការ គណៈប្រតិភូអមដំណើរ លោក លោកស្រី មកពីក្រុង ស្រុក មន្ទីរ-អង្គភាពពាក់ព័ន្ធ បងប្អូនសមាជិក សមាជិកា សសយក និងប្រជពលរដ្ឋ ចំនួន ៣០២នាក់។ ក្នុងពិធីដាំនេះមានកូនឈេីដែលត្រូវដាំមានចំនួន ២ ០០០ដេីម ក្នុងនោះមាន កូនឈើទាល,បេង, ក្រញូង និងធ្នង់ ត្រូវបានរដ្ឋបាលព្រៃឈើ ស្រុកបន្ទាយស្រី មន្ទីរបរិស្ថានខេត្ត រួមសហការជាមួយខ័ណ្ឌរដ្ឋបាលព្រៃឈើសៀមរាប ដាំតាមព្រំប្រទល់មជ្ឍមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន នៅឧទ្យាជាតិព្រះជ័យវរ្ម័ននរោត្តម «ភ្នំគូលែន» ឧទ្យាននេះមានផ្ទៃដី ចំនួន២ ០២០ហិកតា។ លោក ង៉ាន់ ភិរុណ អភិបាលរងខេត្ត បានបញ្ជាក់ពីអត្ថប្រយោជន៍ព្រៃឈេី ការថែរក្សា ការបំផុសគំនិតឲ្យបងប្អូនប្រជាពលរដ្ឋចូលរួមអភិរក្សព្រៃឈេី និងសហគមរបស់ខ្លួនចូលរួមដាំដេីមឈេីទាំងអស់គ្នាឡេីងវិញ ដេីម្បីស្ដារគម្របព្រៃឈេី និងដេីម្បីរក្សាជីវៈចម្រុះ ប្រព័ន្ធអេកូឡូហ្ស៊ី រក្សាទឹកក្រោមដី រក្សាបរិយាកាសខ្យល់បរិសុទ្ធ សម្រាប់កូនចៅជំនាន់ក្រោយដែលយើងបាននឹងកំពុងប្រារឰនាថ្ងៃនេះ ពិធីប្រកបដោយអត្ថន័យដ៏ជ្រាលជ្រៅសម្រាប់ជាចលនាបំផុស ស្មារតីប្រជាពលរដ្ឋយើងឲ្យចេះស្រឡាញ់ព្រៃឈើ ចូលរួមក្នុងការដាំដុះ និងការពារ ព្រៃឈើ ក៏ដូចជាការជួយផ្ដល់ផលប្រយោជន៍ឲ្យប្រជាពលរដ្ឋក្នុងការរស់នៅប្រចាំថ្ងៃ ដើម្បីបង្កបង្កើនផលកសិកម្ម បង្កើនសុខមាលភាពគ្រួសារ ព្រមទាំងជួយលើកស្ទួយបរិស្ថានសង្គមផងដែរ ។ ឯកឧត្តម សៅ សុភាព បានគូសបញ្ជាក់ថា ការប្រារព្ធពិធីដាំកូនឈេី គម្រោងជំរុញបរិយាកាសអំណោយផលសម្រាប់ការអភិវឍ្ឍដោយចីរភាពនាពេលនេះ គឺបានឆ្លុះបញ្ចាំងឲ្យឃើញពីការខិតខំប្រឹងប្រែងយ៉ាងសកម្មរបស់រាជរដ្ឋាភិបាល ក្រសួងបរិស្ថាន រដ្ឋបាលខេត្ត ក្នុងការគ្រប់គ្រង ការអភិរក្សធនធានព្រៃឈើ និងមានការគាំទ្រពីអង្គការជាដៃគូរជាតិ អន្តរជាតិ អង្គការ SEDA សហគមអឺរ៉ុប គឺជាការងារអាទិភាពដែលរាជរដ្ឋាភិបាលយកចិត្តទុកដាក់ខ្ពស់ ដែលជាគោលដៅយូរអង្វែងរបស់ប្រទេសជាតិយើង គឺការអភិរក្ស ការគ្រប់គ្រងធនធានធម្មជាតិ ជីវៈចម្រុះ និងប្រព័ន្ធអេកូឡូហ្ស៊ីប្រកបដោយប្រសិទ្ធភាព ដេីម្បីចូលរួមចំណែកក្នុងការកាត់បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គមឲ្យបានប្រសើរឡើង និងប្រែក្លាយមូលដ្ឋានក្នុងតំបន់នេះឲ្យមានទេសភាពល្អ ប្រកបដោយធម្មជាតិបៃតង គម្របបៃតងកាន់តែស្រស់បំព្រង។ សូមបញ្ជាក់ថា ពិធីដាំកូនឈេីគ្រប់ប្រភេទឡេីងវិញក្នុងគោលបំណងបំផុសចលនាដាំដើមឈើគ្រប់ភូមិសាស្ដ្រឲ្យបានច្រេីន និងអោយប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេស ដើម្បីបណ្តុះគំនិតថែរក្សា ការពារ អភិរក្ស គំនិតស្រលាញ់ព្រៃឈើ និងបរិស្ថានធម្មជាតិរបស់ប្រទេស៕
