ថ្ងៃទី២៩ ខែតុលា ឆ្នាំ២០២០ នៅរដ្ឋបាលខេត្តសៀមរាប លោក លី សំរិទ្ធ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានទទួលគ្រឿងឧបភោគបរិភោគមួយចំនួន ពី ឯកឧត្តម នាយឧត្តមសេនីយ៍ ឃឹម ប៊ុនសុង រដ្ឋលេខាធិការ ក្រសួងការពារជាតិ និងប្រធានក្រុមប្រឹក្សាកីឡា កងយោធពលខេមរភូមិន្ទ ដោយមានការអមដំណើរដោយឯកឧត្តម លោកជំទាវ លោក លោកស្រី និងតំណាងស្ថានីយ៍ទូរទស្សន៍ខេមរភូមិន្ទ ប៉ុស្តិ៍លេខ៥ ដើម្បីជួយដល់គ្រួសាររងគ្រោះដោយជំនន់ទឹកភ្លៀង និងដើម្បីចូលរួមនូវទុក្ខលំបាករបស់រាជរដ្ឋាភិបាលកម្ពុជា ក្នុងពេលប្រជាពលរដ្ឋ នៅតាមបណ្តារាជធានី ខេត្ត ជួបនូវគ្រោះទឹកជំនន់ទឹកភ្លៀង ក្នុងរយៈពេលប៉ុន្មានថ្ងៃនេះ ដែលបណ្តាលឲ្យខូចខាតនូវហេដ្ឋារចនាសម្ព័ន្ធផ្លូវថ្នល់ លិចលង់លំនៅដ្ឋាន របស់ប្រជាពលរដ្ឋ និងធ្វើឲ្យបងប្អូនជួបនូវការខ្វះខាត ជាស្បៀងអាហារប្រចាំថ្ងៃផងដែរ ក្នុងនោះគ្រឿងឧបភោគបរិភោគទាំងនោះរួមមាន អង្ករ ៥តោន មី ៣០០កេស ទឹកសុទ្ធ ២០០យួរ ថ្នាំពេទ្យ ២០០កញ្ចប់ និងអាវរងារ ៤០០កំប្លេ។ នាឱកាសនោះដែរលោកអភិបាលរងខេត្ត ក៏បានធ្វើការថ្លែងអំណរគុណដល់ទឹកចិត្តដ៏សប្បុរសធម៌របស់ឯកឧត្តម នាយឧត្តមសេនីយ៍ ឃឹម ប៊ុនសុង រដ្ឋលេខាធិការ ក្រសួងការពារជាតិ និងជាប្រធានក្រុមប្រឹក្សាកីឡា កងយោធពលខេមរភូមិន្ទ និងសប្បុរសជនអមដំណើរ ដែលបានផ្តល់អំណោយ ជាគ្រឿងឧបភោគបរិភោគដល់រដ្ឋបាលខេត្តសៀមរាប ក្នុងពេលដែលមានស្រុកមួយចំនួនបានទទួលរងផលប៉ះពាល់ដោយទឹកជំនន់ទឹកភ្លៀង ។ លោកក៏បានបន្តទៀតថា ក្នុងនាមជាថ្នាក់ដឹកនាំខេត្ត ក៏បានត្រៀមក្នុងការសង្រ្គោះប្រជាពលរដ្ឋ និង សត្វពាហនៈរបស់បងប្អូនទៅកាន់ទីទួលសុវត្ថិភាព ព្រមទាំងយកចិត្តទុកដាក់ខ្ពស់លើបញ្ហាសុខភាពបងប្អូន និងមិនទុកឲ្យបងប្អូនណាម្នាក់ស្លាប់ដោយអាជ្ញាធរមិនដឹងនោះឡើយ។ ម៉្យាងទៀតអំណោយសប្បុរសទាំងនេះ និងបន្តចែករំលែក ទៅតាមបណ្តាខេត្ត ក្រុង ស្រុកឯទៀត ហើយអំណោយទាំងនេះនឹងយកទៅចែកជូនដល់បងប្អូនប្រជាពលរដ្ឋរងគ្រោះ និង ងាយរងគ្រោះក្នុងពេលមានជំនន់ទឹកភ្លៀងនេះផងដែរ៕
