នាព្រឹកថ្ងៃព្រហស្បតិ៍ ១៣កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៩ ខែ តុលា ឆ្នាំ២០២០ ដោយសារជំនន់ទឹកភ្លៀង បានធ្វើឲ្យហេដ្ឋារចនាសម្ព័នផ្លូវជនបទតាមបណ្តាស្រុកមួយចំនួនក្នុងខេត្តសៀមរាប ទទួលរងនូវការខូចខាតនិងបានបង្កផលលំបាកចំពោះការធ្វើចរាចរណ៍ប្រចាំថ្ងៃរបស់ប្រជាពលរដ្ឋ ដោយមានការយកចិត្តទុកដាក់គិតគូរសុខទុក្ខបងប្អូនពីសំណាក់រាជរដ្ឋាភិបាល ឯកឧត្តម ភួង សោភា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ និងលោក គង់ ភឿន ប្រធាននាយកដ្ឋានផ្លូវលំជនបទ អមដំណើរដោយ លោក ខេង ញ៉ុល ប្រធានមន្ទីរអភិវឌ្ឍន៍ជនបទបានដឹកនាំក្រុមការងារបច្ចេកទេសផ្លូវចុះធ្វើការជួសជុលបន្ទាន់ផ្លូវក្រាលក្រួសក្រហមមួយខ្សែប្រវែង ៧,៦០០ ម៉ែត្រ តភ្ជាប់ពីឃុំចារឈូក ដល់ឃុំ គោល ស្រុកអង្គរជុំ និងផ្លូវគ្រួសក្រហមមួយខ្សែទៀត ពីឃុំក្តីរុនដល់ឃុំព្រៃជ្រូក ស្រុកពួកប្រវែង ១,៥០០០ ម៉ែត្រ បន្ទាប់ពីបានទទួលរងការខូចខាតដោយសារជំនន់ទឹកភ្លៀង ឆ្នាំ២០២០ ដើម្បីតភ្ជាប់ឲ្យប្រជាពលរដ្ឋបានធ្វើចរាចរណ៍ ក៏ដូចជាដឹកជញ្ជូនកសិផលបានដូចដើមឡើងវិញ។សូមបញ្ជាក់ថា នៅទូទាំងខេត្តសៀមរាប មានផ្លូវជនបទចំនួន ២០ខ្សែ នៅក្នុងស្រុកចំនួន ៦ រួមមាន ស្រុកពួក វ៉ារិន អង្គរធំ ក្រឡាញ់ ជីក្រែងនិងស្រុកអង្គរជុំ ដែលរងផលប៉ះពាល់ ហើយផ្លូវចំនួន ៤ខ្សែក្នុងស្រុកអង្គរជុំ រងការខូចខាតខ្លាំងជាងគេ។ ការចុះពិនិត្យសិក្សា និងធ្វើការជួសជុលផ្លូវជនបទ ដែលរងការខូចខាតដោយជំនន់ទឹកភ្លៀងនេះ គឺជាការឆ្លើយតបភ្លាមៗ តាមអនុសាសន៍ណែនាំដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា៕
