ថ្ងៃទី០៥ ខែវិច្ឆិកា ឆ្នាំ២០២០ ដើម្បីចូលរួមជាមួយរាជរដ្ឋាភិបាលកម្ពុជា ក្នុងការជួយដល់ប្រជាពលរដ្ឋ ដែលកំពុងជួបការលំបាកដោយការរងផលប៉ះពាល់ដោយជំនន់ទឹកភ្លៀង អង្គការចក្ខុវិស័យកម្ពុជា និងមូលនិធិ ASEA Advancing Life Foundation រួមជាមួយរ៉ូតារីក្លិប បាននាំយកគ្រឿងឧបភោគបរិភោគចែកជូទៅប្រគល់ជូនប្រជាពលរដ្ឋចំនួន១១៧គ្រួសារ រស់នៅក្នុងឃុំចំនួន ៤ ស្រុកស្វាយលើ ខេត្តសៀមរាបក្រោមអធិបតីភាព លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាល នៃគណះអភិបាលខេត្តសៀមរាប ការប្រគល់ស្បៀងអាហារនេះបានធ្វើឡើងនៅបរិវេណសាលាស្រុកស្វាយលើ ខេត្តសៀមរាប។ លោក ស៊ត់ ចន្ថា នាយកប្រតិបត្តិអង្គការចក្ខុវិស័យកម្ពុជា បានថ្លែងថា អង្គការចក្ខុវិស័យកម្ពុជាបាបង្កើតឡើងក្នុងឆ្នាំ២០១៣ គឺដើមី្បបម្រើការងារមនុស្សធម៌ នៅទូទាំងព្រះរាជាណសចក្រកម្ពុជា ហើយកន្លងមកសកម្មភាពរបស់អង្គការ បានធ្វើសកម្មភាពនៅខេត្តសៀមរាប និងខេត្តឧត្តរមានជ័យ ទៅលើវិស័យទឹកស្អាត សាលារៀន បន្ទប់ទឹកអនាម័យនៅតាមមន្ទីរពេទ្យការឧបត្ថម្ភអ្នកសម្រាលកូនខ្វះខាតសម្រាកនៅតាមមណ្ឌលសុខភាព និងការផ្តល់នូវស្បៀងអាហារដល់គ្រួសារក្រីក្រនៅតាមឡឥដ្ឋ និងងាយរងគ្រោះទៀតផង។ ជាក់ស្តែង នៅពេលនេះអង្គការរបស់លោកនិងមូលនិធិកជាដៃគូ បាននាំយកស្បៀងអាហារមកផ្តល់ជូនប្រជាពលរដ្ឋចំនួន១១៧គ្រួសារនៅស្រុកស្វាយលើដែលកំពុងតែជួបការលំបាកខ្វះខាតនូវស្បៀងអាហារដោយរងផលប៉ះពាល់ដោយទឹកជំនន់នេះ។ ដើម្បីជាវប្បធម៌ចែករំលែក ក្នុងពេលដែលប្រជាពលរដ្ឋយើងជួបនូវទុក្ខលំបាកដោយគ្រោះធម្មជាតិ។ លោក ពៅ ពិសិដ្ឋ អភិបាលរងខេត្តសៀមរាប បានថ្លែងអំណរគុណចំពោះទឹកចិត្តដ៏សប្បុរសធម៌របស់អង្គការចក្ខុវិស័យកម្ពុជា និង ASEA Advancing Life Foundation និងរ៉ូតារីក្លិប និងសប្បុរសជននានា ដែលបានយកចិត្តទុកដាក់ក្នុងការចូលរួមជាមួយរាជរដ្ឋាភិបាល ក្នុងពេលដែលប្រជាពលរដ្ឋខ្មែរយើងបានកំពុងជួបនូវទុក្ខលំបាកដោយគ្រោះធម្មជាតិ។ ជាមួយគ្នានេះ លោក អភិបាលរងខេត្តក៏បានណែនាំឱ្យបងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ចំពោះកូនៗរបស់ខ្លួន ដោយកុមារតូចៗនេះហើយងាយរងនូវគ្រោះថ្នាក់ផ្សេងៗ ជាពិសេសត្រូវរក្សាសុខភាពឱ្យបានល្អ។អំណោយដែលជាគ្រឿងឧបភោគទាំងនោះមានដូចជាអង្ករ, ទឹកត្រី ,ត្រីខ , មី , អំបិល , ស្ករស និងទឹកដោះគោខាប់៕