ព្រឹកថ្ងៃចន្ទ ១៤កើត ខែបុស្ស ឆ្នាំជូត ព.ស២៥៦៤ ត្រូវនឹងថ្ងៃទី២៨ ខែធ្នូ ឆ្នាំ២០២០ នៅបន្ទប់ប្រជុំលេខ១ នៃរដ្ឋបាលសាលាខេត្តសៀមរាប មានកិច្ចប្រជុំដើម្បីដោះស្រាយវិវាទដីធ្លីរវាង ភូមិ ឃុំ ស្រុក មួយចំនួនតាមព្រំប្រទល់រវាងខេត្តសៀមរាប និងខេត្តឧត្តរមានជ័យ ដឹកនាំដោយ លោក ង៉ាន់ ភិរុណ និងលោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត និងមានការអញ្ញើញចូលរួមពី លោកអភិបាលស្រុកស្រីស្នំ ស្រុកវ៉ារិន ស្រុកស្វាយលើ លោកប្រធាន អនុប្រធានទីចាត់ការជំនាញ និងមន្រ្តីពាក់ព័ន្ធទាំងអស់។
គោលបំណង នៃកិច្ចប្រជុំនេះដែរ គឺធ្វើឡើងដើម្បីពិភាក្សាក្នុងការកំណត់ព្រំប្រទល់ រដ្ឋបាលឃុំ រដ្ឋបាលស្រុកនីមួយៗ មានភាពច្បាស់លាស់ សម្រាប់បម្រើអោយការបោះឆ្នោត ជ្រើសរើស ក្រុមប្រឹក្សាឃុំ-សង្កាត់អាណត្តិទី៥ នាពេលខាងមុខនេះ៕
