ថ្ងៃចន្ទ ១៣រោច ខែបុស្ស ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១១ ខែមករា ឆ្នាំ២០២១ វេលាម៉ោង ០៩:០០នាទី នៅសាលប្រជុំរបស់រដ្ឋបាលស្រុកបន្ទាយស្រី បានបើកកិច្ចប្រជុំស្តីពីការតាមដាន ត្រួតពិនិត្យវឌ្ឍនភាពពាក់ព័ន្ធការងារកាត់ឆ្វៀលដី និងចុះពិនិត្យស្ថានភាពជាក់ស្តែងទីតាំងឈូសឆាយដីគម្របព្រៃឈើ ស្ថិតក្នុងភូមិសាស្រ្តស្រុកបន្ទាយស្រី ខេត្តសៀមរាប ដឹកនាំដោយលោក ង៉ាន់ ភិរុណ អភិបាលរង នៃគណៈអភិបាលខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ដោយមានការអញ្ជើញចូលរួមពីលោក នាយករងរដ្ឋបាលសាលាខេត្ត លោក ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោក ប្រធានមន្ទីរកសិកម្ម រុក្ខាប្រមាញ់ និងនេសាទ លោក ប្រធានមន្ទីរបរិស្ថានខេត្ត លោក នាយខណ្ឌរដ្ឋបាលព្រៃឈើសៀមរាប លោក អភិបាលស្រុកបន្ទាយស្រី តំណាងមន្ទីរទំនាក់ទំនងជាមួយព្រឹទ្ធសភា រដ្ឋសភា និងអធិការកិច្ចខេត្ត មន្ទីរធនធានទឹក និងឧតុនិយមខេត្ត កងកម្លាំងប្រដាប់អាវុធ មេឃុំ-មេភូមិពាក់ព័ន្ធ។ កិច្ចប្រជុំខាងលើនេះ បានពិភាក្សាលើរបៀបវារៈចំនួន ២ ដើម្បីយកមកធ្វើការពិនិត្យ និងពិភាក្សា ព្រមទាំងបានសម្រេចឯកភាពដូចខាងក្រោម ៖១.ពាក់ព័ន្ធនឹងការងារកាត់ឃ្វៀលដីស្ថិតនៅក្នុងគម្របព្រៃឈើឆ្នាំ២០០២ នៅក្នុងភូមិសាស្រ្តស្រុកបន្ទាយស្រី បន្តអនុញ្ញាតជូនប្រជាពលរដ្ឋដែលពុំទាន់បានដាក់ពាក្យស្នើសុំកាត់ឃ្វៀលក្នុងរយៈពេលមួយសប្តាហ៍ទៀតចំពោះក្បាលដីដែលមានទំនាស់ដោយភ្ជាប់មកជាមួយនូវឯកសារកាន់កាប់ត្រឹមត្រូវ។២.រដ្ឋបាលស្រុក ត្រូវធ្វើរបាយការណ៍ពាក់ព័ន្ធនឹងការឈូសឆាយដីព្រៃ ស្ថិតក្នុងដែនសមត្ថកិច្ច មករដ្ឋបាលខេត្ត ដើម្បីរដ្ឋបាលខេត្តមានមូលដ្ឋានឆ្លើយបំភ្លឺទៅក្រសួងស្ថាប័នពាក់ព័ន្ធ។ ជាមួយគ្នានេះដែរ លោក ង៉ាន់ ភិរុណ បានស្នើដល់អាជ្ញាធរគ្រប់លំដាប់ថ្នាក់ ត្រូវស្រង់ទិន្នន័យណាដែលច្បាស់លាស់ហើយជាប្រជាពលរដ្ឋដែលនៅនឹងមូលដ្ឋានផ្ទាល់ ជៀសវាងវាស់វែងអោយអ្នកចំណូលស្រុក៕
