នៅសាលាខេត្តសៀមរាប នាព្រឹកថ្ងៃទី១៣ ខែ មករា ឆ្នាំ២០២១នេះ មានបើកកិច្ចប្រជុំពិភាក្សា ស្តីពីការកំណត់ព្រំ ប្រទល់រដ្ឋបាលដែលមិនទាន់ច្បាស់លាស់រវាងរដ្ឋបាលខេត្តសៀមរាប និង រដ្ឋបាលខេត្តឧត្តរមានជ័យ ក្រោមការដឹកនាំកិច្ចប្រជុំរបស់ ឯកឧត្តម ទៀ សីហា អភិបាលនៃគណៈអភិបាលខេត្ត ដោយមានការចូលរួមពីឯកឧត្តមជាអភិបាលរងខេត្ត លោក នាយក នាយករងរដ្ឋបាលសាលាខេត្ត មន្ទីរពាក់ពន្ធ័ លោក អភិបាលស្រុកមានការពាក់ព័ន្ធ អស់លោក លោកស្រីនៃមន្ទីរជំនាញ មេឃុំ មេភូមិ រួមទាំងមន្ត្រីសាលាខេត្តផងដែរ ។ ឯកឧត្តម ទៀ សីហា កិច្ចប្រជុំនេះធ្វើឡើងដើម្បីពិភាក្សានិងស្តាប់ការលើកឡើងអំពីបញ្ហាដែលប្រឈមមួយចំនួនជាមួយនឹងប្រជាពលរដ្ឋខេត្តសៀមរាបដែលរស់នៅក្បែរព្រំប្រទល់ខេត្តឧត្តរមានជ័យ ដើម្បីធ្វើជាកំណត់ហេតុសម្រាប់យកទៅជជែកពិភាក្សាជាមួយអភិបាលនៃគណៈអភិបាលខេត្តឧត្តរមានជ័យនាពេលខាងមុខ និង បន្ទាប់មកនឹងអញ្ជើញ អគ្គនាយករដ្ឋបាលក្រសួងមហាផ្ទៃ ដើម្បីកំណត់ព្រំប្រទល់ឲ្យបានច្បាស់លាស់ ។ ឯកឧត្តមក៏បានលើកឡើងនូវចំណុចសំខាន់ៗមួយចំនួន នៃគោលបំណងក្នុងកិច្ចប្រជុំដោយបានសង្កត់ធ្ងន់ អំពីពង្សាវតាប្រវត្តិនៃភូមិសាស្ត្រមួយចំនួន ដែលមានការពាក់ព័ន្ធទៅនឹងបញ្ហាព្រំប្រទល់រដ្ឋបាល រវាងខេត្តសៀមរាប និង ខេត្តឧត្តរមានជ័យ ដែលពុំទាន់បានកំណត់ឱ្យច្បាស់លាស់ជាយូរឆ្នាំមកហើយនោះ ដែលបានធ្វើឲ្យប៉ះពាល់ដល់សតិអារម្មណ៍របស់ប្រជាពលរដ្ឋ ក៏ដូចអាជ្ញាធរដែលមានព្រំប្រទល់រដ្ឋបាល ក្នុងការគ្រប់គ្រងត្រួតលើគ្នា ដើមី្បធ្វើការបញ្ចប់នៅពេលខាងមុខនេះ ។ ម៉្យាងទៀតកិច្ចប្រជុំនាពេលនេះ ក៏ដើមី្បត្រួតពិនិត្យទៅលើគំនូសខ្សែផែនទីព្រំប្រទល់ថ្មី ដែលអគ្គនាយកដ្ឋានភូមិសាស្ត្រ បានចុះធ្វើការសិក្សាកន្លងមក ក្នុងការចាំស្តាប់នូវរាល់សំណូមពររបស់អាជ្ញាធរមូលដ្ឋាន ក្នុងការកែសម្រួលព្រំប្រទល់ ឬ ក៏ឯកភាពទៅតាមគំនូសខ្សែព្រំប្រទល់ថ្មី ក្នុងការយកចំណុចទាំងនោះទៅធ្វើការប្រជុំពិភាក្សាជាមួយ ខេត្តឧត្តរមានជ័យនៅថ្ងៃខាងមុខនេះ ។ លោកនាយកទីចាត់ផែនការ វិនិយោគនៃសាលាខេត្តសៀមរាប បានឲ្យដឹងថាបញ្ហាព្រំ ប្រទល់រដ្ឋបាលមិនច្បាស់លាស់មានស្រុកចំនួន៣ គឺស្រុកស្វាយលើ នៅឃុំកន្តួត និង ឃុំស្វាយលើ ស្នើ ៤ភូមិ ,ស្រុកស្រីស្នំ គឺស្ថិត ឃុំស្លែងស្ពាន មាន ៧ភូមិ និង ស្រុកវ៉ារិន សិ្ថតនៅឃុំស្រែណូយ និងឃុំវ៉ារិន មាន ៨ភូមិ ដែលធ្វើឲ្យមានការប៉ះពាល់ដល់តុលាការ សមត្ថកិច្ច នៅខេត្តឧត្តរមានជ័យ ធ្វើការចាប់ខ្លួនប្រជាពលរដ្ឋ និងមេភូមិ នៅភូមិសាស្ត្រខេត្តសៀមរាបទៀតផង ។ ក្នុងនោះដែរលោកអភិបាលស្រុកទាំងបី ក៏បានធ្វើការបញ្ជាក់ និង បង្ហាញជូនដល់អង្គប្រជុំ ព្រមទាំងមានការបកស្រាយបង្ហាញអំពី ចត្តានិករមួយច្បាស់លាស់ពីលោក លោកស្រីមេឃុំ មេភូមិ អំពីស្ថានភាពភូមិសាស្ត្រជីវប្រវត្តិដែលបានរស់នៅមូលដ្ឋាន របស់ខ្លួន ។ បន្ទាប់ពីការបង្ហាញរួចមក ឯកឧត្តម ទៀ សីហា ក៏បានឯកភាពទៅលើចំណុចមួយចំនួន ដែលអាជ្ញាធរស្រុកទាំងបី បានធ្វើការបង្ហាញ ដែលមានការពាក់ព័ន្ធស្ថានភាពភូមិសាស្ត្រប្រវត្តិ ដែលជាមរតមានមកជាយូរ ព្រមទាំងមានទីអាងធ្វើជាគោលក្នុងការកំណត់ព្រំប្រទល់ ដោយបានយកអូរ ស្ទឹង បឹង ព្រែក ផ្លូវកំណត់ជាគោលនៃព្រំ ។ ម៉្យាងទៀតសូមឲ្យ អាជ្ញាធរឃុំ ស្រុក បន្តការគ្រប់គ្រងបងប្អូនប្រជាពលរដ្ឋឲ្យបានល្អ ក្នុងពេលដែលនៅលើពិភពលោកបានកំពុងជួបនូវវិបត្តិ ជំងឺកូវីដ១៩ សំខាន់បងប្អូនប្រជាពលករវិលមកពីក្រៅប្រទេស គឺត្រូវតែចូលទៅធ្វើចត្តាឡីស័កឲ្យគ្រប់១៤ថ្ងៃ មុនចូលមកកាន់មូលដ្ឋានភូមិឃុំរបស់ខ្លួន ដើមី្បការពារសុវត្ថិភាពដល់យើងគ្រប់គ្នា និង កុំឲ្យមានឆ្លងជាសហគមន៍៕