ថ្ងៃព្រហស្បតិ៍ ១៥កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៨ ខែធ្នូ ឆ្នាំ២០២២ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) បានសហការជាមួយអង្គការដែនដីមនុស្ស-ហូរឡង់ប្រចាំកម្ពុជា(TDH) ព្រមទាំងមានការចូលរួមសម្របសម្រួលពីមន្ទីរកិច្ចការនារីខេត្ត មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងមន្ទីរការងារបណ្តុះបណ្តាលវិជ្ជាជីវៈខេត្ត បានបើកវគ្គបណ្តុះបណ្តាលស្តីពីការថែទាំដោយផ្អែកលើការប៉ះទង្គិចផ្លូវចិត្ត ដើម្បីពង្រឹងសមត្ថភាពដល់អ្នកផ្តល់សេវាដែលធ្វើការងារជាមួយកុមាររងផលប៉ះពាល់ដោយការរំលោភបំពានផ្លូវភេទ និងការកេងប្រវ័ញ្ចផ្លូវ ដើម្បីរួមបង្រៀនពីវិធីសាស្រ្តថែទាំលើការប៉ះទង្គិចផ្លូវចិត្ត។ វគ្គបណ្តុះបណ្តាលនេះប្រព្រឹត្តទៅក្រោមអធិបតីភាព លោកស្រី យូ សុភា អភិបាលរងខេត្ត និងជាអនុប្រធានអចិន្រៃ្តយ៍ គ.ខ.ប.ជ ព្រមទាំងមានការអញ្ជើញចូលរួមពីលោក លោកស្រីពីមន្ទីរ អង្គភាពជំនាញ គណៈអភិបាលរង និងមន្រ្តីការិយាល័យសង្គមកិច្ចនិងសុខុមាលភាពសង្គម ក្រុង ស្រុក សរុប ចំនួន ៤០នាក់។ លោកស្រី យូ សុភា បានសូមសម្តែងនូវការកោតសរសើរ និងថ្លែងអំណរគុណ ចំពោះការខិតខំប្រឹងប្រែងរសប់មន្ទីរ អង្គភាពជំនាញពាក់ព័ន្ធ និងអង្គការ ដែនដីមនុស្ស-ហូរឡង់ ដែលតែងតែបានគាំទ្រនូវបច្ចេកទេស សម្ភារ ថវិកា ជាពិសេស ការគាំទ្រលើការសាងសមត្ថភាពជូនមន្រ្តីជំនាញ ដល់អាជ្ញាធរមូលដ្ឋាន ក៏ដូចជាការនាពេលកន្លងមក ដែលជាវិភាគទានមួយដ៏មានតម្លៃ ចំពោះវត្ថុបំណង ប្រកបដោយវិសាលភាព ក្នុងការចូលរួមកាត់បន្ថយអំពើហិង្សាគ្រប់រូបភាព និងពិសេសកិច្ចការពារកុមារ។ សកម្មភាពនេះបានឆ្លើយតបទៅនឹងផែនការយុទ្ធសាស្រ្តអភិវឌ្ឍន៍ជាតិ របស់រាជរដ្ឋាភិបាលកម្ពុជា ផែនការយុទ្ធសាស្ត្ររបស់ក្រសួងសង្គមកិច្ច គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក្រុមប្រឹក្សាជាតិកម្ពុជាដើម្បីកុមារ ប្រព័ន្ធនៃកិច្ចគាំពារកុមារ និងគោលនយោបាយភូមិឃុំមានសុវត្ថិភាព ជាដើម ដើម្បីធានាឱ្យមានសមភាព និងសមធម៌ នៅក្នុងសង្គម និងការផ្តល់សេវាប្រកបដោយបរិយាប័ន្ន។ លោកស្រី អភិបាលរងខេត្ត មានជំនឿយ៉ាងមុតមាំថាបន្ទាប់ពីវគ្គបណ្តុះបណ្តាលរយៈពេលពេញមួយថ្ងៃនេះ នឹងទទួលបាននូវធាតុចូល ដែលជាចំណេះដឹងបន្ថែមទៀត សម្រាប់អ្នកផ្តល់សេវាកម្មជាមួយជនរងគ្រោះជាកុមារ សម្រាប់ជាជំនួយដល់ខ្លួនឯងផ្ទាល់ដែលអាចនឹងទទួលរងផលប៉ះពាល់ពីការប៉ះទង្គិច្ចផ្លូវចិត្ត ពីការងារ ឬក្នុងក្រុមគ្រួសារ ឬក្នុងព្រឹត្តការណ៍ណាមួយដែលយើងម្នាក់ៗមិនអាចជៀសបាន ពិសេសការចេះពីរបៀបនៃការថែទាំពីការប៉ះទង្គិចផ្លូវចិត្ត៕