រសៀលថ្ងៃអង្គារ ទី៣០ ខែមិថុនា ឆ្នាំ២០២០ រដ្ឋបាលសង្កាត់បានបញ្ចប់ការសម្របសម្រួលទាំងស្រុងជាមួយម្ចាស់ក្បាលដីនៅក្នុងការរុះរើផលប៉ះពាល់ដែលរំលោភលើដីសាធារណៈអស់ជាច្រើនឆ្នាំ រដ្ឋបាលសង្កាត់សាលាកំរើកបានសហការជាមួយអ្នកអនុវត្តគម្រោងមូលនិធិឃុំសង្កាត់ឆ្នាំ ២០២០ ក្នុងការវាយកម្ទេចរបងដែលប៉ះពាល់នោះ ដើម្បីបើកផ្លូវឱ្យគ្រប់ទៅតាមប្លង់គោលរបស់រដ្ឋបាលខេត្ត ដែលបានចុះបញ្ជីជាលក្ខណៈប្រព័ន្ធរួចហើយ ។ គម្រោងនេះដែរ សង្កាត់នឹងធ្វើការសាងសង់ផ្លូវបេតុងមួយខ្សែដែលមាន ទទឹង ៨ម៉ែត្រ ប្រវែង ១២៤ម៉ែត្រ ចាប់ពីផ្លូវបំបែក ៧មករា (ខាងកើតអតីត karaoke ភីងផារ៉ាដាយ) រហូតដល់ចំណុចផ្លូវបែកជាបួនផ្សារដីហុយ ស្ថិតក្នុងភូមិវត្តដំណាក់ សង្កាត់សាលាកំរើក ក្រុងសៀមរាប ហើយផ្លូវនេះបានចាក់បេតុងបានពាក់កណ្ដាល ដោយគម្រោងនេះ ក៏មានការចូលរួមទុនពីប្រជាពលរដ្ឋ ៥០បូក៥០។ក្នុងនាមរដ្ឋបាលបាលខេត្ត រដ្ឋបាលក្រុង និងរដ្ឋបាលសង្កាត់សាលាកំរើក សូមកោតសរសើរចំពោះ បងប្អូនប្រជាពលរសដ្ឋដែលបានចូលរួមដោះស្រាយផលប៉ះពាល់ក្នុងការអនុវត្តគម្រោងឱ្យបានជោគជ័យ និងមានប្រសិទ្ធភាពផងដែរ៕
