ថ្ងៃទី២៧ ខែកក្កដា ឆ្នាំ២០២០នេះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប អញ្ជើញចូលរួមវគ្គបណ្តុះបណ្តាល ចំណេះដឹងផ្នែកហិរញ្ញវត្ថុ សម្រាប់អភិវឌ្ឍន៍សហគ្រិនភាពស្រ្តីក្រោមអធិបតីភាពលោកជំទាវវេជ្ជបណ្ឌិត អ៉ឹង កន្ថាផាវី រដ្ឋមន្រ្តីក្រសួងកិច្ចនារី។ ឯកឧត្តម ទៀ សីហា អភិបាលខេត្តសៀមរាប បានលើកឡើងនៅក្នុងពិធីបើកវគ្គបណ្តុះបណ្តាល ស្តីពីចំណេះដឹងផ្នែកហិរញ្ញវត្ថុសម្រាប់អភិវឌ្ឍសហគ្រិនភាពស្រ្តី នៅសាលាខេត្តសៀមរាប ដោយបង្ហាញថាជំរឿនសហគ្រាសកម្ពុជាឆ្នាំ២០១៤ ក្នុងចំណោមសហគ្រាសទូទាំងប្រទេសចំនួនជាង៥១ម៉ឺនសហគ្រាស ក្នុងនោះ៦១ភាគរយនៃចំនួនសហគ្រាសសរុបគឺកាន់កាប់ដោយស្ត្រី ក៏ប៉ុន្តែភាគច្រើននៃសហគ្រាសទាំងនោះកំពុងស្ថិតក្នុងសេដ្ឋកិច្ចក្រៅប្រព័ន្ធ និងសហគ្រាសខ្នាតមីក្រូ ដែលងាយប្រឈមជាមួយបញ្ហា ហើយក៏មានឧបស័គ្គជាច្រើនទៀត សម្រាប់ប្រតិបត្តិការធុរកិច្ចរបស់ខ្លួន ដូចជា ខ្វះការគាំទ្រផ្នែកហិរញ្ញវត្ថុ ព័ត៌មាន ទីផ្សារ និងចំណេះដឹងថ្មីៗ និងការការពារដោយច្បាប់នៅមានកម្រឹត។ ទាំងនេះហើយ ដែលជាមូលហេតុ ធ្វើឲ្យសហគ្រិនស្រ្តី ពុំត្រូវបានគេមើលឃើញ និងឲ្យតម្លៃខ្ពស់។លោកជំទាវ រដ្ឋមន្រ្តីក្រសួងកិច្ចការនារី ដោយផ្អែលើការប៉ាន់ប្រមាណរបស់ក្រសួងសេដ្ឋកិច្ចនិងហិរញ្ញវត្ថុ បានបង្ហាញថា បរិយាកាសគាំទ្រ និងការផ្តល់អំណោយផល ដល់ប្រព័ន្ធសហគ្រិន កម្ពុជានឹងអាចទទួលបានចំណូលក្នុងចរន្តសេដ្ឋកិច្ចជាតិប្រមាណជា ២៥ពាន់លានដុល្លា ខ្ពស់បន្ថែមទៀត។ លោកជំទាវ បន្តថានៅលើសាកលលោកសហគ្រាសដែលគ្រប់គ្រងដោយស្រ្តី មានប្រមាណជា ១ភាគ៣ នៃសហគ្រាសសរុប ក៏ប៉ុន្តែភាគច្រើននៃសហគ្រិនស្រ្តីទាំងនោះ ស្ថិតនៅក្នុងសេដ្ឋកិច្ចក្រៅប្រព័ន្ធ និងសហគ្រាសខ្នាតមីក្រូហិរញ្ញវត្ថុ ដែលងាយនឹងទទួលភាពងាយរងគ្រោះ និងមានការលំបាកសម្រាប់ភាពរីកចំរើនលូតលាស់។លោកជំទាវ បន្តថា ឯកសារសិក្សាមួយរបស់ OECD បានរកឃើញមូលហេតុដែលសហគ្រិនស្រ្តី ពិបាកទទួលបានឥណទានពីធនាគារ ឬ គ្រឹះស្ថានមីក្រូហិរញ្ញវត្ថុនានាសម្រាប់ពង្រីកមុខជំនួញរបស់ខ្លួននោះ គឺដោយសារតែមានកង្វះខាតចំណេះដឹងផ្នែកហិរញ្ញវត្ថុ ពុំមានសមត្ថភាពក្នុងការបង្កើតផែនការអាជីវកម្ម និងរបាយការណ៍ហិរញ្ញវត្ថុជាដើម។ កង្វះខាតទាំងនេះកាន់តែធ្វើឲ្យស្រ្តីបាត់បង់ទំនុកចិត្ត និងភាពជឿជាក់ក្នុងការពង្រីកទុនវិនិយោគរបស់ខ្លួន ហើយសហគ្រិនស្រ្តីមួយចំនួន បានសម្រេចចិត្តចងការប្រាក់ឯកជន ក្នុងអត្រាការប្រាក់ខ្ពស់ និងងាយទទួលរងនូវការកេងប្រវ័ញ្ចនានា ព្រមទាំងបានឈានទៅដល់ការជាប់បំណុលធ្ងន់ធ្ងរផងដែរ។ ដើម្បីកាត់បន្ថយភាពងាយរងគ្រោះរបស់សហគ្រិនស្រ្តី កម្មវិធីបណ្តុះបណ្តាលចំណេះដឹងផ្នែកហិរញ្ញវត្ថុសម្រាប់ស្រ្តីនិងសហគ្រិនស្រ្តីនេះ ពិតជាមានសារសំខាន់ ដែលមិនត្រឹមតែអាចជួយឲ្យស្រ្តី ពង្រីកអាជីវកម្មរបស់ខ្លួនប៉ុណ្ណោះទេ គឺថែមទាំងបានជួយឲ្យស្រ្តី មានសមត្ថភាពនិងទំនុកចិត្តក្នុងការគ្រង និងចូលរួមធ្វើសេចក្តីសម្រេច ផ្នែកហិរញ្ញវត្ថុក្នុងគ្រួសារផងដែរ ។ ក្រសួងសេដ្ឋកិច្ចនិងហិរញ្ញវត្ថុបានប៉ាន់ប្រមាណផងដែរថា ប្រសិនបើកម្ពុជាអាចមាននូវបរិយាកាសដែលគាំទ្រ និងផ្តល់អំណោយផលដល់ប្រព័ន្ធសហគ្រិន នោះកម្ពុជានឹងអាចទទួលបានចំណូលប្រមាណ ២៥ពាន់លានដុល្លា បន្ថែមនៅក្នុងចរន្តសេដ្ឋកិច្ចជាតិ។ ក្នុងន័យនេះ គឺចង់បញ្ចាក់ថា៖ កម្ពុជានឹងទទួលបានចំណូលបន្ថែមខ្ពស់ជាងមុន បើសិនជាមានការពង្រឹងបាននូវភាពអង់អាចផ្នែកសេដ្ឋកិច្ចដល់ស្រ្តី ជាពិសេសនោះគឺ សហគ្រិនភាពស្រ្តីត្រូវបានយកចិត្តទុកដាក់ខ្ពស់ ដោយធានាឲ្យបាននូវការកាត់បន្ថយភាពងាយរងគ្រោះ និងធ្វើយ៉ាងណាឲ្យសហគ្រិនស្រ្តីបានទទួលនូវការគាំទ្រផ្នែកហិរញ្ញវត្ថុ ជំនាញ និងចំណេះដឹងកម្រឹតខ្ពស់ ព័ត៌មានថ្មីៗ ពីនិន្នាការធុរកិច្ចយុគសម័យសេដ្ឋកិច្ចឌីជីថល និងបដិវត្តឧស្សាហកម្មជំនាន់ទី៤។វគ្គបណ្តុះបណ្តាលនេះមានរយៈពេល២ថ្ងៃ សហការរៀបចំដោយក្រសួងកិច្ចការនារី ធនាគារជាតិនៃកម្ពុជា និងក្រុមហ៊ុនវីសា ហើយក៏ជាគំនិតគំនិតផ្តួចផ្តើមមួយក្នុងចំណោមនៃគំនិតផ្តួចផ្តើមផ្សេងៗជាច្រើនទៀត របស់ក្ររសួងកិច្ចការនារី ដើម្បីជំរុញនិងបង្កើនភាពអង់អាចផ្នែកសេដ្ឋកិច្ចសម្រាប់ស្រ្តី៕