នៅសាលាខេត្តសៀមរាប នាព្រឹកថ្ងៃទី២៨ ខែ កក្កដា ឆ្នាំ២០២០នេះ មានធ្វើកិច្ចប្រជុំប្រចាំខែកក្កដា ឆ្នាំ២០២០ របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត ក្រោមកិច្ចដឹកនាំរបស់លោកស្រី យូ សុភា លេខាធិការដ្ឋានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត និង ជាអភិបាលរងខេត្ត ដោយមានការចូលរួមពីសំណាក់អស់ លោក លោកស្រីជាសមាជិកសមាជិកាគណៈកម្មាធិការ អាជ្ញាធរក្រុង ស្រុក និង អង្គរការដៃគូរចូលរួមផងដែរ ។កិច្ចប្រជុំនេះក្នុងគោលបំណង ធ្វើការត្រួតពិនិត្យនូវរាល់លទ្ធផលរបស់គណៈកម្មាធិការ និង អាជ្ញាធរមូលដ្ឋាន រួម ទាំងអង្គការដៃគូអនុវត្តបានប្រចាំខែ ព្រមទាំងលើកនូវរាល់បញ្ហាប្រឈមដែលបានជួបប្រទះផងដែរ ។ ក្នុងកិច្ចប្រជុំនេះក៏បានផ្តោតយ៉ាងសំខាន់ចំពោះបងប្អូនប្រជាពលករធ្វើចំណាកស្រុក និង ស្ត្រី កុមារដែលរងគ្រោះនូវអំពើហិង្សានៅក្នុងក្រុមគ្រួសារ ក៏ដូចជាការកេងប្រវញ្ច័កម្លាំងពលកម្មជាដើម ។ លោកស្រី យូ សុភា ក៏បានធ្វើការលើកសរសើរផងដែរ ពីកិច្ចសហការបានល្អរបស់ស្ថាប័ន ពាក់ព័ន្ធ និង អង្គការដៃគូរ លើការប្រយុទ្ធប្រឆាំងអំពើជួញដូរមនុស្សនៅខេត្តសៀមរាប ព្រមទាំងបានធ្វើការសង្រ្គោះដល់ ជនរងគ្រោះបានទាន់ពេលវេលាទៀតផង ។ លោកស្រីបានថ្លែងអំណរគុណផងដែរ ចំពោះអង្គការដៃគូរ ដែលបានចូលរួមសហការជាមួយរាជរដ្ឋាភិបាល ក្នុងពេលដែលនៅលើពិភពលោកជួបនូវវិបត្តិកូវិដ១៩ និយាយដោយឡែកនៅខេត្តសៀមរាប នៅពេលដែលប្រជាពលរដ្ឋបានវិលមកពីក្រៅប្រទេស បានមកស្នាក់នៅមណ្ឌលចត្តាឡីសក័តាមបណ្តាក្រុង ស្រុក ឃុំ សង្កាត់ ដែលជាវិធានការដ៏ល្អប្រពៃរបស់រាជរដ្ឋាភិបាល និង ក្រសួងសុខាភិបាល ព្រមទាំងបានផ្គត់ផ្គង់ជាអាហារនៅតាមច្រកព្រំដែន និង ផ្តល់ជាសម្ភារនៅតាមមណ្ឌលចត្តាឡីស័កទៀតផងដែរ។ ក្នុងការអនុវត្តនូវទិសដៅបន្តខែសីហានោះ លោកស្រីបានដាក់នូវផែនការមួយចំនួនដល់អាជ្ញាធរក្រុង ស្រុក និង អង្គការដៃគូរទាំងអស់ គឺ ត្រូវធ្វើសម្រង់ស្ថិតិប្រជាពលករដែលបានវិលត្រឡប់មកពីក្រៅប្រទេស នៅក្នុងមូលដ្ឋានខ្លួន ដើមី្បឲ្យបងប្អូនទាំងនោះបានមកទទួលវគ្គបណ្តុះបណ្តាលបច្ចេកទេស ក្នុងជំនាញកសិកម្ម និង ដំណាំឧស្សាហកម្ម ព្រមទាំងបច្ចេកទេសជួសជុលគ្រឿងយន្តជាដើម ទៅតាមបំណងរបស់បងប្អូនស្រឡាញ់ចូលចិត្តនោះ ដោយបងប្អូនយើងមួយចំនួនក៏មានជំនាញផ្នែកកសិកម្មក្នុងការចិញ្ចឹមសត្វ ដាំដំណាំហូបផ្លែ និង បន្លែ ទៀតផង ។ ម៉្យាងទៀតក៏យើងមិនត្រូវមានការធ្វេសប្រហែសនោះឡើង ចំពោះវិធានការណែនាំរបស់ក្រសួងសុខាភិបាល ក្នុងការប្រយុទ្ធប្រឆាំងបង្កាទប់ស្កាត់នៃជំងឺកូវីដ១៩ កុំឲ្យមានការរីករាលដាលនៅក្នុងសហគមន៍៕