កាលពីព្រឹកថ្ងៃ ពុធ ០៨រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១២ ខែសីហា ឆ្នាំ២០២០ មន្ទីរកិច្ចការនារីខេត្តសៀមរាប សហការជាមួយរដ្ឋបាលសាលាស្រុកពួក និងរដ្ឋបាលសាលាស្រុកក្រឡាញ់ បានរៀបចំពិធីប្រគល់ទទួលសម្ភារការពារជំងឺកូវីដ-១៩ និងសម្ភារៈផ្សព្វផ្សាយព័ត៌មាន ដេីម្បីឆ្លើយតបចំពោះអំពើហិង្សាទាក់ទងនឹងយេនឌ័រ នៅថ្នាក់មូលដ្ឋាន ក្រោមជំនួយឧបត្ថម្ភពីរដ្ឋាភិបាលប្រទេសអូស្ត្រាលី-កម្ពុជា ក្រោមអធិបតីភាព លោកស្រី ក្រង់ ស៊ីថាវី ប្រធានមន្ទីរកិច្ចការនារីខេត្តស្ដីទី លោកស្រី វ៉ាន់ ចាន់ណា អនុប្រធានមន្ទីរកិច្ចការនារីខេត្ត អភិបាលរងស្រុកក្រឡាញ់ និងអភិបាលរងស្រុកពួក ព្រមទាំងមានការអញ្ជើញចូលរួមពី ក្រុមប្រឹក្សាស្រុក លោក លោកស្រីមេឃុំ អ្នកទទួលបន្ទុកកិច្ចការនារីនិងកុមារឃុំ ដែលមានចំនួនចូលរួមសរុប៥៤ នាក់ ក្នុងនោះស្រី ៣២ នាក់ ។ ការផ្តល់ជូននូវសម្ភារៈទាំងនេះ ដើម្បីផ្តល់សេវាប្រកបដោយនិរន្តរភាព និងសមធម៌ ហៅកាត់ថាកម្មវិធី ACCESS ក្នុងគោលបំណង បង្កើនការយល់ដឹងដល់អ្នកផ្តល់សេវា និងប្រជាពលរដ្ឋទូទៅអំពីបញ្ហាជំងឺកូវីដ-១៩ និងវិធីសាស្រ្តការពារ ធ្វើការផ្សព្វផ្សាយពីសេវាឆ្លើយតបទាន់ហេតុការណ៍ជួយជនរងគ្រោះ ដោយអំពើហិង្សាទាក់ទងនឹងយេនឌ័រ ក្នុងកំឡុងពេលនៃការរីករាលដាលបញ្ហាជំងឺឆ្លងកូវីដ-១៩ ដល់អ្នកផ្តល់សេវា GBV នៅថ្នាក់មូលដ្ឋាន និងស្រ្តីដែលងាយរងគ្រោះ ។ សម្ភារៈដែលបានចែកជូនទៅដល់អ្នកផ្តល់សេវាថ្នាក់ស្រុក ឃុំ និង ស្រ្តីដែលរងគ្រោះដោយអំពើហិង្សាទាក់ទងនឹងយេនឌ័រ និងស្រ្តីដែលមានពិការភាព ទាំង២ស្រុកគោលដៅខាងលើ រួមមាន៖ ១-អាកុលចំនួន ៥៥៨ដប ២- ម៉ាសចំនួន ៧៨ប្រអប់៣- សាប៊ូProtex ចំនួន ៤៨០០ដុំ ៤- កូនសៀវភៅណែនាំចំនួន ៨៤ក្បាល ៥- ផ្ទាំងរូបភាពចំនួន ៥៥៨ផ្ទាំង៦- ផ្លឹតចំនួន ៤៨០ផ្លឹត ។
