នៅរសៀលថ្ងៃទី៣០ ខែកញ្ញា ឆ្នាំ២០២០ លោក ពិន ប្រាកដ អភិបាលរងខេត្ត និងងជាប្រធានក្រុមការងារទី៤ និងជាតំណាង ឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំក្រុមការងារចុះសម្របសម្រួល ណែនាំដល់បងប្អូនប្រជាពលរដ្ឋ ឲ្យចូលរួមសហការ និងរុះរើសំណង់រំលោភលើដីផ្លូវ ចំណីផ្លូវ អូរ ប្រឡាយ សម្រាប់ការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ ចំនួន ៣៨ ខែ្ស ក្នុងក្រុងសៀមរាប ខេត្តសៀមរាបតំណាង។ ការចុះពិនិត្យនេះដែរ ក៏មានការចូលរួមពីមន្ទីរ អង្គភាព ពាក់ព័ន្ធ កងកម្លាំងប្រដាប់អាវុធទាំងបីប្រភេទ និងអាជ្ញាធរមូលដ្ឋានផងដែរ។ក្រុមការងារ ក៏បានចុះពិនិត្យ ផ្សព្វផ្សាយ និងណែនាំដល់បងប្អូនប្រជាពលរដ្ឋឱ្យចូលរួមសហការ និងរុះរេីសំណង់នានាដែលប៉ះពាល់លេីទំហំខ្សែផ្លូវ AD-02 និង EN-02 ចាប់ពីចំណុចមុខហាងហៃវិនអង្គរផ្លូវ៦០ម៉ែត្រ រហូតដល់ផ្លូវ៣០ម៉ែត្រ (ផ្លូវក្រវ៉ាត់ក្រុងទី១ ) និងផ្លូវត្រាំនាគ រហូតដល់ផ្លូវតាសាម។ នៅក្នុងការចុះសម្របសម្រួលលើផលប៉ះពាល់នេះផងដែរ ក្រុមការងារក៏បានថ្លែងអំណរគុណដល់បងប្អូនប្រជាពលរដ្ឋដែលរស់នៅតាមផ្លូវដែលរាជរដ្ឋាភិបាលបានគ្រោងនឹងសាងសង់នេះ ដោយមានការចូលរួមសហការជាមួយក្រុមការងារយ៉ាងសស្រាក់សស្រាំនិងសប្បាយរីករាយក្រែលែងក្នុងការរុះរើសំណង់របស់ខ្លួនចេញក្នុងពេលឆាប់ៗនេះ។ ក្នុងនាមក្រុមការងារ ជាពិសេស ឯកឧត្តម អភិបាលខេត្តសៀមរាប សូមស្នើដល់បងប្អូនបន្តចូលរួមសហការជាមួយអាជ្ញាធរគ្រប់លំដាប់ថ្នាក់ ដើម្បីឱ្យការអនុវត្តគម្រោងនេះប្រព្រឹត្តទៅតាមផែនការដែលបានគ្រោងទុក៕