កាលពីព្រឹកថ្ងៃសៅរ៍ ទី ០៣ ខែ តុលា ឆ្នាំ ២០២០ លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ឯកឧត្តម យិត ខាវ សមាជិកក្រុមប្រឹក្សាខេត្ត តំណាង បានអញ្ជើញចូលរួមក្នុងទិវាទេសចរណ៍ពិភពលោកក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ ឯកឧត្តម លោកជំទាវ រដ្ឋលេខាធិការក្រសួងទេសចរណ៍ និងប្រតិភូក្រសួង និងមានការអញ្ជើញចូលរួមពីលោក លោកស្រី មន្ទីរ អង្គភាពពាក់ព័ន្ធ ភ្ញៀវកិត្តិយសជាតិ អន្តរជាតិ សហភាព សហព័ន្ធយុវជនកម្ពុជាខេត្តសៀមរាប សហគមន៍ទេសចរណ៍ សមាគមន៍ចុងភៅ តំណាងសាលាបណ្តុះបណ្តាលវិស័យទេសចរណ៍ សរុបចំនួន ៤០០ នាក់ នៅសណ្ឋាគារសុខាល័យខេត្តសៀមរាប។ ទិវាទេសចរណ៍ពិភលោកសម្រាប់ឆ្នាំ ២០២០នេះ ធ្វេីឡេីងក្រោមប្រធានបទ "ទេសចរណ៍ និងការអភិវឌ្ឍន៍ជនបទ នៅខេត្តសៀមរាប" និងបង្ហាញគន្លឹះមួយចំនួនដូចខាងក្រោម៖១-ទេសចរណ៍ ការអភិវឌ្ឍជនបទ និងកូវីដ-១៩៖ ទេសចរណ៍ គឺជាមូលដ្ឋាននៃជីវភាពរស់នៅសម្រាប់សហគមន៍ជនបទ ជាពិសេសនៅក្នុងប្រទេសកំពុងអភិវឌ្ឍន៍។ តាមព្យាករណ៍របស់ UNWTO ទេសចរអន្តរជាតិនឹងធ្លាក់ចុះចន្លោះ ៦០-៨០% ក្នុងឆ្នាំ២០២០ ដូច្នេះនឹងមានផលប៉ះពាល់យ៉ាងខ្លាំងលើជីវភាពរស់នៅ និងអាជីវកម្មតាមជនបទ។ ពិភពលោកយល់ឃើញថាទេសចរណ៍ផ្ទៃក្នុងនឹងត្រឡប់មកវិញមុនទេសចរណ៍អន្តរជាតិ។ ដូចនេះប្រសិនបើមានការគ្រប់គ្រងច្បាស់លាស់ សហគមន៍ជនបទអាចនឹងទទួលបានផលចំណេញច្រើន ជាពិសេសបង្កើតឱកាសការងារ បង្កើនជីវភាពរស់នៅ និងពង្រឹងសេដ្ឋកិច្ចមូលដ្ឋានរបស់ប្រជាពលរដ្ឋជាដើម។២-ទេសចរណ៍ជំរុញការអភិវឌ្ឍជនបទ៖ វិស័យនេះមានសមត្ថភាពពិសេសក្នុងការគាំទ្រដល់សកម្មភាពរស់ឡើងវិញនៃសហគមន៍ជនបទ ជួយសហគមន៍មូលដ្ឋានឲ្យងើបចេញពីវិបត្តិកូវីដ-១៩ និងជំរុញកំណើនប្រកបដោយបរិយាបន្ន និងចីរភាព។ ការអភិវឌ្ឍទេសចរណ៍ជនបទ មិនត្រឹមតែផ្តល់ឱកាសការងារ និងលើកស្ទួយជីវភាពរស់នៅរបស់សហគមន៍ប៉ុណ្ណោះទេ ថែមទាំងបានចូលរួមដោះស្រាយបញ្ហាប្រឈមពាក់ព័ន្ធនឹងការបម្រែបម្រួលអាកាសធាតុ ចំណាកស្រុក តាមរយៈសកម្មភាពនានា ដូចជា ការការពារ និងអភិរក្សបរិស្ថាន តំបន់ធម្មជាតិ បេតិកភណ្ឌ វប្បធម៌ ប្រពៃណី ទំនៀមទម្លាប់មូលដ្ឋាន។៣-ហេដ្ឋារចនាសម្ព័ន្ធ និងវិស័យអប់រំ៖ ការអភិវឌ្ឍទេសចរណ៍ជនបទ ទាមទារឲ្យមានការយកចិត្តដាក់ខ្ពស់ក្នុងការអភិវឌ្ឍហេដ្ឋារចនាសម្ព័ន្ធ និងបណ្តុះបណ្តាលជំនាញវិជ្ជាជីវៈទេសចរណ៍ ស្របតាមតម្រូវការសង្គមសេដ្ឋកិច្ច និងការវិវត្តបច្ចេកវិទ្យា។ ស្ថាប័នពាក់ព័ន្ធ ក៏មានតួនាទីដ៏សំខាន់ផងដែរ ក្នុងការធានាបាននូវការកសាងហេដ្ឋារចនាសម្ព័ន្ធរឹងឲ្យបានគ្រប់គ្រាន់ ដើម្បីធ្វើឲ្យទេសចរអាចទស្សនាកម្សាន្ត និងទទួលបានបទពិសោធន៍ល្អៗពីតំបន់ជនបទ ពិសេស អេកូទេសចរណ៍កសិទេសចរណ៍ដោយងាយស្រួល។៤-ការបង្កើតការងារបន្ថែម និងកាន់តែប្រសើរក្នុងសហគមន៍ជនបទ៖ ការអភិវឌ្ឍទេសចរណ៍ជនបទបានបង្កើតការងារបន្ថែមសម្រាប់ក្រុមដែលងាយរងគ្រោះ ដូចជា ស្ត្រី យុវជនវ័យក្មេង ព្រមទាំងអ្នកដែលមានជំនាញកម្រិតទាប។ តាមរយៈពិពិធកម្មផលិតផលទេសចរណ៍ជនបទ ការងារថ្មីៗ គំនិតច្នៃប្រឌិត និងនវានុវត្តន៍ នឹងកើតឡើងដែលជាមូលដ្ឋានទ្រទ្រង់សេដ្ឋកិច្ចច្នៃប្រឌិត (Creative Economy)។៥-ឱកាសថ្មីៗ៖ តាមរយៈការមកទស្សនារបស់ទេសចរនៅតំបន់ជនបទ សហគមន៍មានឱកាសទទួលបាននូវគំនិតថ្មី និងអាចបង្កើនសមត្ថភាពផ្នែកបច្ចេកវិទ្យាថ្មីៗ និងនវានុវត្តន៍។ ការអភិវឌ្ឍជំនាញ ការទទួលបានហិរញ្ញវត្ថុ ការអភិវឌ្ឍហេដ្ឋារចនាសម្ព័ន្ធ ការផ្លាស់ប្តូរឌីជីថល ការធ្វើពិពិធកម្មសេដ្ឋកិច្ច អភិបាលកិច្ចថ្មី និងការវាយតម្លៃផលប៉ះពាល់ គួរតែត្រូវបានដាក់ជាចំណុចស្នូលនៃផែនការស្តារវិស័យទេសចរណ៍ឡើងវិញ ជាពិសេសទេសចរណ៍ជនបទ ក្នុងគោលដៅអាចធ្វើឲ្យសហគមន៍អាចមានសមត្ថភាពគ្រប់គ្រាន់ ក្នុងការអភិវឌ្ឍវិស័យទេសចរណ៍ក្នុងមូលដ្ឋានរបស់ខ្លួន៕
