ថ្ងៃទី៩ ខែវិច្ឆិកា ឆ្នាំ២០២០ លោក នាក់ ណេរ៉ុន អភិបាលរងនៃគណៈអភិបាលខេត្តសៀមរាប និង លោក ទា គឹមសុទ្ធ ប្រធានមន្ទីរកសិកម្មរុក្ខប្រមាញ់ និង នេសាទខេត្ត នាំយកគ្រប់ពូជបន្លែចំនួន១៨០កញ្ចប់ ទៅចែកជូនបងប្អូនប្រជាកសិករចំនួន១៨០គ្រួសារមកពីឃុំចំនួន៤ក្នុងស្រុកអង្គរធំ រួមមានឃុំលាងដៃ ឃុំពាក់ស្នែង ឃុំជប់តាត្រាវ និងឃុំស្វាយចេក។ ក្នុងរដូវវស្សាកន្លងមកស្រុកអង្គរធំបានជួបរងផលប៉ះពាល់ដោយជំនន់ទឹកភ្លៀង ដែលបណ្តាលឲ្យខូចខាតផលដំណាំជាច្រើន ក្នុងនោះភាគច្រើនជាដំណាំដំឡូងមី និងដំណាំរួមផ្សំដូចជាពោត ,ត្រសក់ ជាដើម ។ ដើមី្បឆ្លើយតបទៅនឹងបញ្ហានេះ អាជ្ញាធរស្រុកបានសហការជាមួយការិយាល័យកសិកម្មបាន ចុះចែកគ្រាប់ពូជដំណាំជាបន្តបន្ទាប់ផងដែរ ។ លោក ឡុង រដ្ឋារ័ក្ស អភិបាលស្រុកអង្គរធំ និង ការបញ្ជាក់របស់លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់និងនេសាទខេត្ត បានមានលើកឡើងថា ការផ្តល់តែពូជបន្លែសម្រាប់ស្រុកអង្គរធំ ដោយសារស្រុកមានសក្តានុពលអាចផ្គត់ផ្គង់បន្លែទៅកាន់ទីផ្សារបានច្រើន ដើម្បីឲ្យបងប្អូនដាំសារឡើងវិញបន្ទាប់ពីបានរងផលប៉ះពាល់ដោយសារជំនន់ទឹកភ្លៀង ។នាឱកាសនោះ លោក នាក់ ណេរ៉ុន បានបញ្ជាក់ថា ការផ្តល់គ្រាប់ពូជបន្លែដោយឥតគិតថ្លៃ គឺដើម្បីជំរុញការដាំដុះនិងស្តារឡើងវិញនូវដំណាំបន្លែ”ជាលក្ខណៈគ្រួសារ សម្រាប់ហូបផង និង នាំទៅកាន់ទីផ្សារផង ហើយក៏ជាការជួយបង្កើតការងារ និងបង្កើនជីវភាពប្រចាំថ្ងៃដល់បងប្អូនប្រជាពលរដ្ឋ ព្រមទាំងបានជួយ ផ្តល់នូវអត្ថប្រយោជន៍និងផ្តល់ផលចំណេញទាំថវិកា និង ចំណេញដល់សុខភាព ព្រោះយើងដាំនិងថែទាំដោយខ្លួនឯងមិនបារម្ភពីបន្លែមានប្រើជីគីមីឬបន្លែនាំចូលពីក្រៅឡើយ ។ ក្នុងនោះលោកក៏បានណែនាំដល់ប្រជាកសិករដាំបន្លែ គឺត្រូវនាំគ្នាចងក្រងបង្កើតជាក្រុមសាមគ្គីដាំបន្លែ ដើម្បីផ្គត់ផ្គង់ផលដំណាំរបស់យើងទៅកាន់ទីផ្សារនានា ក្នុងការឆ្លើយតបបានទៅនឹងតម្រូវការទីផ្សារក្នុងស្រុកឬក៍អាចនាំចេញទៅក្រៅប្រទេសផង ឬក៏ចូលទៅតាមទីផ្សារទំនើបៗ ប្រសិនបើបងប្អូនបង្កើនការដាំដុះនិងការវេចខ្ចប់ស្របតាមលក្ខណៈបច្ចេកទេស មិនប្រើប្រាស់ថ្នាំនិងជីគីមី តាមរយៈការពន្យល់ណែនាំពីមន្ត្រីកសិកម្ម ។ លោក អភិបាលរងខេត្តបានក្រើនរំលឹកទៅដល់បងប្អូនប្រជាពលរដ្ឋ ពីបញ្ហានៃជំងឺកូវីត១៩ សូមឲ្យបងប្អូនប្រជាពលរដ្ឋទាំងអស់ ត្រូវបង្កើនការយកចិត្តទុកដាក់ខ្ពស់ ក្នុងការធ្វើអនាម័យសុខភាពឲ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ផង ក្រុមគ្រួសារយើងផង និង សហគមន៍យើងផង ជាពិសេសត្រូវចូលរួមទាំងអស់គ្នាប្រយុទ្ធប្រឆាំងបង្ការ និងទប់ស្កាត់ការឆ្លងរាលដាលនៃជំងឺកូវីដ១៩ ជាមួយរាជរដ្ឋាភិបាល និង អនុវត្តឲ្យបានតាមការណែនាំនិង វិធានការរបស់ក្រសួងសុខាភិបាល គឺត្រូវដុសលាងសម្អាតដៃជាប្រចាំជាមួយទឹកសាប៊ូ អាល់កុល ឬជែល និង ពាក់ម៉ាស់ឲ្យបានត្រឹមត្រូវ ។ លោកបានបន្តទៀតថា ការដាំដុះ ដំណាំបន្លែប្រើជីធម្មជាតិ ក៏ជាការជួយធ្វើការប្រែក្លាយដីធ្លីរបស់បងប្អូន ឲ្យកាន់តែមានគុណភាពប្រើប្រាស់បានយូអង្វែង ព្រមទាំងបង្កើននូវទិន្នផល ដើមី្បបំពេញតម្រូវការនៅតាមទីផ្សារ សណ្ឋាគារ ភោជ្ជនីយដ្ឋាន និង បម្រើដល់វិស័យទេសចរណ៍ក្នុងពេលនេះ និង ក្រោយពីវិបត្តិជំងឺកូវិដ១៩ អវិជ្ជមានពីពិភពលោកយើងនេះ៕