រលៀលថ្ងៃពុធ ទី១៣ ខែមករា ឆ្នាំ២០២១ វេលាម៉ោង២ និង៣០នាទី នៅសាលប្រជុំលេខ១ របស់​រ​ដ្ឋបាលខេត្តសៀមរាប​ លោក ង៉ាន់ ភិរុណ​ អភិបាលរង និងជាតំណាងដ៏ខ្ពងខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានអញ្ជើញ​ជួបសំណេះ​សំណាល និងដឹកនាំកិច្ចប្រជុំបូកសរុបរបាយការណ៍ និងការអនុវត្ត​ការងារ​ប្រចាំឆ្នាំ២០២០ និងទិសដៅអនុវត្តបន្តឆ្នាំ ២០២១ ជាមួយមន្ទីរ​អភិវឌ្ឍន៍ជនបទ ដើម្បីត្រៀម​របាយការណ៍សន្និបាត ដោយមានការអញ្ជើញចូលរួមពីលោកនាយករងរដ្ឋបាល លោកនាយកទីចាត់ការរដ្ឋបាល លោកប្រធានមន្ទីរអភិវឌ្ឍន៍ជនបទ និង លោក លោកស្រី ប្រធាន-អនុប្រធាន ការិយាល័យចំណុះមន្ទីរ អភិវឌ្ឍន៍ជនបទផងដែរ។ លោកអភិបាលរងខេត្តបានស្នើដល់ ប្រធានមន្ទីរ ក៏ដូចជា លោក លោកស្រី ប្រធាន-អនុប្រធាន ការិយាល័យចំណុះរបស់មន្ទីរ អភិវឌ្ឍន៍ជនបទ លើកឡើងអំពីបញ្ហាប្រឈមរបស់ការិយាល័យនីមួយៗ ដើម្បីស្វែងរកដំណោះស្រាយ ដែលបានអនុវត្តរយៈពេលមួយឆ្នាំកន្លងមក។ ជាមួយគ្នានោះដែរប្រធានអង្គប្រជុំក៏បានអោយមន្ទីរលើកនូវផែនការសកម្មភាពការងាររបស់ការិយាល័យនីមួយៗ សម្រាប់អនុវត្តក្នុងឆ្នាំ២០២១ ដើម្បីទទួលបានលទ្ធផល និងប្រសិទ្ធភាពខ្ពស់ និងពិនិត្យរបាយការណ៍បូកសរុបលទ្ធផលអនុវត្តសេចក្តីសម្រេចអង្គសន្និបាត ជាមួយនឹងសមិទ្ធផលសំខាន់ៗ របស់មន្ទីរដែលអនុវត្តបាន ព្រមទាំងបញ្ជូនរបាយការណ៍ទាំងនោះមករដ្ឋបាលខេត្តដើម្បីធ្វើការត្រួតពិនិត្យសកម្មភាពការងារទាំងនោះ៕