ព្រឹកថ្ងៃទី ៤ ខែវិច្ឆិកាឆ្នាំ ២០២២ វេលាម៉ោង៩ ក្នុងសាលប្រជុំធំរបស់រដ្ឋបាលខេត្តសៀមរាប មានកិច្ចប្រជុំស្ដីពី ការដឹកនាំជំរុញផ្សព្វផ្សាយ ដល់ប្រជាពលរដ្ឋដែលគ្រប់អាយុ ១៥ឆ្នាំឡើង និងប្រជាពលរដ្ឋមានអត្តសញ្ញាណប័ណ្ណសញ្ជាតិខ្មែរដែលអស់សុពលភាពឬនិងត្រូវអស់សុពលភាពដើម្បីមកបំពេញបែបបទសុំផ្ដល់អត្តសញ្ញាណប័ណ្ណសញ្ជាតិខ្មែរ នៅតាមបណ្ដាប៉ុស្តិ៍នគរបាលរដ្ឋបាលឃុំ សង្កាត់ឬអធិការដ្ឋានក្រុង/ស្រុក ឬច្រកចេញចូលតែមួយក្រុង/ស្រុក ឬស្នងការដ្ឋាននគរបាលខេត្តរបស់ខ្លួនដែលរស់នៅក្នុងខេត្តសៀមរាប​ ក្រោមអធិបតីភាពលោកឧត្តមសេនីយ៍ទោ សុខ ប្រាង្គ អនុប្រធានអគ្គនាយកដ្ឋានអត្តសញ្ញាណប័ណ្ណ និងអគ្គនាយកដ្ឋានអត្តសញ្ញាណកម្ម និងលោកស្មៀន ប៊ុនធឿន នាយករងរដ្ឋបាលសាលាខេត្តសៀមរាប ព្រមទាំងមានការអញ្ជើញចូលរួមពី លោកឧត្តមសេនីយ៍ទោ តេង ច័ន្ទណាត ស្នងការនគរបាខេត្ត លោកស្នងការរង​ទទួលផែនអត្តសញ្ញាណកម្ម លោក លោក ស្រីអភិបាលរងក្រុង ស្រុក អធិការនគរបាលក្រុងស្រុក និងលោក លោកស្រី ប្រធាន និងមន្ត្រីការិយាល័យសតិនិងអត្រាកុលដ្ឋានសាលាខេត្ត។ កិច្ចប្រជុំនេះដែរ ធ្វើឡើងក្នុងគោលបំណងដើម្បីធានាដល់ការអនុវត្តសិទ្ធិ និងផលប្រយោជន៍នានាជូនប្រជាពលរដ្ឋ ជាពិសេសការប្រើប្រាស់អត្តសញ្ញាណប័ណ្ណសញ្ជាតិខ្មែរ សម្រាប់កាន់ទៅបោះឆ្នោតជ្រើសរើសតំណាងរាស្ត្រ និងនីតិកាលទី ៧ឆ្នាំ ២០២៣ ខាងមុខនេះ ក្រសួងមហាផ្ទៃបានដាក់ចេញនូវវិធានការអនុវត្តដូចខាងក្រោម៖១-ផ្អែកលើទិន្នន័យអត្តសញ្ញាណប័ណ្ណសញ្ជាតិខ្មែរ ដែលរក្សាទុកក្នុងប្រព័ន្ធម៉ាស៊ីនមេគ្រប់គ្រងទិន្នន័យអគ្គនាយកដ្ឋានអត្តសញ្ញាណកម្ម ត្រូវរៀបចំចងក្រង និងបោះឆ្នោតបញ្ជីឈ្មោះប្រជាពលរដ្ឋ ដែលមានអត្តសញ្ញាណប័ណ្ណសញ្ជាតិខ្មែរគំរូថ្មី ដែលផុតសុពលភាពនិងបញ្ជីឈ្មោះប្រជាពលរដ្ឋដែលមានអត្តសញ្ញាណប័ណ្ណសញ្ជាតិខ្មែរដែលនឹងផុតសុពលភាពរយៈពេល ៩០ ថ្ងៃខាងមុខតាមឃុំសង្កាត់ទូទាំងប្រទេស។ បញ្ជីនេះត្រូវផ្ដល់ជូនមេឃុំ និងចាត់ចែងអញ្ជើញប្រជាពលរដ្ឋទាំងនោះមកបំពេញបែបបទថតរូប និងផ្ដិតស្នាមក្រយ៉ៅដៃទទួលយកអត្តសញ្ញាណប័ណ្ណថ្មីឲ្យបានទាន់ពេលវេលា។២-ចំពោះប្រជាពលរដ្ឋដែលបានបាត់ ឬខូចអត្តសញ្ញាណប័ណ្ណសញ្ជាតិខ្មែរ សាម៉ីខ្លួនត្រូវធ្វើសេចក្តីរាយការណ៍ជូនអាជ្ញាធរមានសមត្ថកិច្ច និងត្រូវទំនាក់ទំនងមកអាជ្ញាធរឃុំ សង្កាត់សាម៉ី ដើម្បីបំពេញបែបបទទទួលអត្តសញ្ញាណប័ណ្ណសញ្ជាតិខ្មែរថ្មី។៣-ចំពោះប្រជាពលរដ្ឋដល់អាយុ១៨ឆ្នាំ គិតត្រឹមថ្ងៃបោះឆ្នោតជាតិនាថ្ងៃទី ២៣ ខែកក្កដាឆ្នាំ ២០២៣ ខាងមុខ ហើយដែលមិនទាន់មានអត្តសញ្ញាណប័ណ្ណសញ្ជាតិខ្មែរសូមអញ្ជើញសម្ដីខ្លួនទំនាក់ទំនងមកអាជ្ញាធរឃុំ សង្កាត់សាមី ដើម្បីបំពេញបែបបទផ្ដល់អត្តសញ្ញាណប័ណ្ណសញ្ជាតិខ្មែរ។៤-បង្កើតយន្តការអន្តរអគ្គនាយកដ្ឋានពាក់ព័ន្ធនៃក្រសួងមហាផ្ទៃរួមមានអគ្គនាយកដ្ឋានរដ្ឋបាលអគ្គស្នងការដ្ឋាននគរបាលជាតិនិងអគ្គនាយកដ្ឋានអត្តសញ្ញាណកម្មដើម្បីដឹកនាំគណៈកម្មការជំរុញផ្ដល់អត្តសញ្ញាណប័ណ្ណសញ្ជាតិខ្មែរទូទាំងរាជធានី ខេត្តក្នុងការអនុវត្តយុទ្ធនាការផ្ដល់អត្តសញ្ញាណប័ណ្ណសញ្ជាតិខ្មែរចាប់ពីចុងខែវិច្ឆិកាឆ្នាំ ២០២២ រហូតដល់ដំណាច់ខែតុលាឆ្នាំ ២០២៣នេះផងដែរ៕