ព្រឹកថ្ងៃ២១ ខែវិច្ឆិកា ឆ្នាំ២០២២ វេលាម៉ោង៨ និង០០ នាទី នៅវិទ្យាល័យ ១០មករា ១៩៧៩ បានរៀបចំពិធីចែកបណ្ណសរសើរ និងជូនរង្វាន់ដល់សិស្សានុសិស្សឆ្នើមប្រចាំឆ្នាំសិក្សា ២០២១-២០២២ គ្រប់កម្រិតថ្នាក់ ដែលទទួលបាន ចំណាត់ថ្នាក់លេខ១ លេខ២ និងលេខ៣ ទាំង២៦៧នាក់ ស្រីចំនួន ១១៨នាក់ ក្រោមអធិបតីភាព ស្រី ម៉ននី រង្សី អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្ត ដោយមានការចូលរួមពី លោកអនុប្រធាន ការិយាល័យមធ្យមសិក្សា មន្ទីរខេត្តសៀមរាប លោកចៅសង្កាត់ស្វាយដង្គំ លោក ប្រធានគណកម្មការទ្រទ្រង់សាលា លោកគ្រូ អ្នកគ្រូ បុគ្គលិកសិក្សា សិស្សានុសិស្ស និងអាណាព្យាបាលសិស្សានុសិស្សឆ្នើម នៃវិទ្យាល័យ ១០ មករា ១៩៧៩ សរុប ៥០០នាក់។នាឱកាសដ៏វិសេសវិសាលនេះ​ លោកស្រី​ អភិបាលរងខេត្ត បានមានប្រសាសន៍ថា សិស្សានុសិស្សទាំងអស់ គឺជាគ្រាប់ពេជ្រ ជាសសរទ្រូង ជាទំពាំងស្នងឬស្សី ដ៏សំខាន់និងចាំបាច់បំផុតរបស់គ្រួសារ និងសង្គមជាតិទាំងមូល​ សង្គមជាតិរីកចម្រើនទៅមុខបាន អាស្រ័យលើធនធានប្រកបដោយសមត្ថភាពពេញលេញទាំងចំណេះដឹង​ ចំណេះវិជ្ជា ជ្រៅជ្រះ ហើយភាពជោគជ័យរបស់ពួកគាត់ គឺជាជោគជ័យរបស់គ្រួសារ លោកគ្រូ អ្នកគ្រូ ពិសេសគឺជាជោគជ័យរបស់សង្គមជាតិយើងទាំងមូលផងដែរ។ លោកស្រីបានបន្ថែមផងដែរថា ការចែកបណ្ណសរសើរថ្ងៃនេះ គឺសរបញ្ជាក់ឱ្យឃើញពីការយកចិត្តទុកដាក់របស់ឪពុកម្ដាយអាណាព្យាបាល លោកគ្រូអ្នកគ្រូ ពិសេសប្រមុខរាជរដ្ឋាភិបាលកម្ពុជា ក្នុងការបណ្ដុះបណ្ដាលធនធានមនុស្សឱ្យទៅជាយុវជនពេញលេញ មានសមត្ថភាពគ្រប់គ្រាន់ ជំនាញច្បាស់លាស់ ដើម្បីចូលរួមកសាង អភិវឌ្ឍ សង្គមជាតិឱ្យមានការលូតលាស់រីកចម្រើននាពេលបច្ចុប្បន្ន និងអនាគត។ក្នុងនោះដែរលោកស្រីអភិបាលរងខេត្ត មានការកោតសរសើរដោយស្មោះស្ម័គ្របំផុតចំពោះសិស្សានុសិស្សគ្រប់រូបដែលទទូលនូវជ័យលាភីសិស្សឆ្នើម ប្រចាំឆ្នាំសិក្សា២០២១-២០២២ និងបានផ្តាំផ្ញើរដល់សិស្សានុសិស្ស ត្រូវបន្តការខិតខំប្រឹងប្រែងព្យាយាមសិក្សារៀនសូត្រ អភិវឌ្ឍខ្លួន ឱ្យក្លាយជាពលរដ្ឋល្អ ពលរដ្ឋថ្លៃថ្នូរ និងពលរដ្ឋជំនាញ ដើម្បីកសាង ឧត្តមប្រយោជន៍ចំពោះខ្លួនឯងផង គ្រួសារផង និងសង្គមជាតិទាំងមូលផងដែរ​។ ត្រូវខិតខំ កសាងខ្លួនបន្ថែមទៀត ឲ្យក្លាយជាយុវជនជឿនលឿន ដើម្បីជាសរសស្តម្ភដ៏រឹងមាំរបស់ប្រទេសជាតិនិង ស្វែងរកកិត្តិយសថ្មីៗជូនជាតិមាតុភូមិបន្ថែមទៀតឱ្យស្របតាមបច្ចេកវិទ្យា ៤.០ និងបច្ចេកវិទ្យាដែលកំពុងរីកចំរើននាពេលបច្ចុប្បន្ន។ ម្យ៉ាងទៀតត្រូវជៀសឱ្យពីគ្រឿងញៀន៕