នាព្រឹកថ្ងៃព្រហស្បតិ៍ ១កើត ខែមិគសិរ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២៤ ខែវិច្ឆិកា ឆ្នាំ២០២២ លោក​ ប្រាក់​ សោភ័ណ​ អភិបាលរងខេត្ត​ តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល​ នៃគណៈអភិបាលខេត្តសៀមរាប​ បានចូលរួមក្នុងពិធីវាយហ្គោហ្វមិត្តភាព ADMM Retreat & 9th ADMM-Plus Friendly Golf ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ​ ព្រមទាំងមានការចូលរួមពី​សំណាក់ ឯកឧត្តម រដ្ឋមន្រ្តីការពារជាតិអាស៊ាន និងអាស៊ានបូក​ និងគណះប្រតិភូ​នានា​ នៅទីលានវាយកូនគោលអង្គររីសត ខេត្តសៀមរាប។លោក​ អភិបាលរងខេត្ត​ បានថ្លែងថា​ ក្នុងនាមក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋក្នុងខេត្តសៀមរាប ខ្ញុំពិតជាមានមោទនភាព និងសេចក្តីរំភើប ចំពោះវត្តមានដ៏ឧត្តុងឧត្តមរបស់សម្តេច ឯកឧត្តម និងគណៈប្រតិភូទាំងអស់នៅក្នុងខេត្តសៀមរាបយើងខ្ញុំ​ ដែលនេះគឺជាសក្ខីកម្មមួយ បានបង្ហាញឱ្យឃើញអំពីជំនឿ និងទំនុកចិត្តរបស់រាជរដ្ឋាភិបាលមកលើអាជ្ញាធរខេត្តសៀមរាប ក្នុងកិច្ចការពារសន្តិសុខ សុវត្ថិភាព និងសណ្តាប់ធ្នាប់សាធារណៈប្រកបដោយការទទួលខុសត្រូវខ្ពស់ ។ មិនត្រឹមតែប៉ុណ្ណោះ វត្តមានរបស់សម្តេច ឯកឧត្តម និងប្រតិភូ នឹងក្លាយជាចលករក្នុងការជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋក្នុងខេត្តសៀមរាប កាន់តែល្អប្រសើរ ។