![](https://asset.cambodia.gov.kh/provincial/sites/22/2023/01/320967600_544106914411325_1625528402264179243_n-1024x683.jpg)
នាឱកាសបើកបវេសនកាលឆ្នាំសិក្សាថ្មី ២០២២.២០២៣ នៅវិទ្យាល័យ ១០មករា ១៩៧៩ លោក អ៉ឹង គឹមលាង អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្ត បានអានសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី ក្នុងឱកាសបើកបវេសនកាលឆ្នាំសិក្សាថ្មី២០២២.២០២៣រួចមក លោក អ៉ឹង គឹមលាង បានលើកឡើងថា យើងត្រូវយកចិត្តទុកដាក់ទាំងអស់គ្នា ដើម្បីធ្វើជាត្រីវិស័យតម្រង់ទិសឆ្ពោះទៅការកែទម្រង់សំដៅបន្តលើកកម្ពស់គុណភាព និង ប្រសិទ្ធភាពនៃការអប់រំបណ្តុះបណ្តាលធនធានមនុស្ស ក្នុងបរិការណ៍នៃសង្គមពុទ្ធិ និងសំដៅត្រៀមលក្ខណៈឱ្យបានល្អ និងបន្តផ្តោតការយកចិត្តទុកដាក់ដល់ការប្រមូលកុមារឱ្យបានចូលរួមគ្រប់ៗគ្នា ទោះបីជាពួកគេស្ថិតនៅទីណា រស់ក្នុងស្ថានភាពបែបណាក៏ដោយពោល គឺត្រូវទៅឱ្យដល់កន្លែងណាដែលយើងទៅមិនទាន់ដល់ សំខាន់តំបន់ដាច់ស្រយាល ដោយអនុវត្តតាមទិសស្លោក«សាលារៀនស្វែងរកកុមារ»។
លោកបានបន្ថែមថាដើមី្បបង្កលក្ខណៈងាយស្រួលដល់កុមារ ទទួលបានការអប់រំប្រកបដោយសមធម៌នឹងជំរុញឱ្យមានការចូលរួមពីគ្រប់ភាគីពាក់ព័ន្ធ ជាពិសេសមាតាបិតា អ្នកអាណាព្យាបាលសិស្ស ក្នុងការបង្កើតបរិស្ថានរៀនសូត្រដល់សិស្សានុសិស្សឲ្យប្រកបដោយផាសុកភាពទាំងផ្លូវកាយ និងផ្លូវចិត្តពោល គឺប្រែក្លាយសាលារៀនជាសាលាកុមារមេត្រី និង ដើម្បីឲ្យកុលបុត្រ កុលធីតាខ្មែរបានទទួលការអប់រំទាំងអស់គ្នា សមស្របតាមបាវចនាសម្រាប់ការងារអប់រំរបស់យើង ដែលបានលើកឡើងថា «ការអប់រំសម្រាប់ទាំងអស់គ្នា ទាំងអស់គ្នាដើម្បីការអប់រំ » និង ចូលរួមយ៉ាងសកម្ម ក្នុងការជួយអប់រំកូនចៅឲ្យបានល្អ ទាំងផ្នែកសុខភាព ចំណេះដឹង និងសីលធម៌ ដើម្បីបន្តលើកកម្ពស់កិត្តិយសសង្គមជាតិ ស័ក្តិសមជាប្រជាពលរដ្ឋដែលមានឈាមជ័រតភ្ជាប់ពីសម័យអង្គរដ៏រុងរឿងនៃយើង។ លោកអភិបាលរងខេត្ត ក៏បានធ្វើការផ្តាំផ្ញើដល់ សិស្សានុសិស្ស លោកគ្រូអ្នកគ្រូ សូមឲ្យយកចិត្តទុកដាក់ខ្ពស់ក្នុងការបង្ហាត់បង្រៀនសិស្ស មិនត្រូវគិតពីផលប្រយោជន៍ផ្ទាល់ខ្លួន ដែលធ្វើឲ្យប៉ះពាល់កេរ្តិ៍ឈ្មោះរបស់មន្ត្រីអប់រំ ព្រមទាំងលើកកម្ពស់សីលធម៌សង្គម និង ជម្រុញដល់សិស្សានុសិស្សខិតខំរៀនសូត្រ ឲ្យទទួលបានលទ្ធផលល្អនៅពេលបំណាច់ឆ្នាំសិក្សា ឬ និទ្ទេស A នៅពេលប្រឡងបញ្ចប់មធ្យមសិក្សាទុតិយភូមិ ដែលកន្លងមកវិទ្យាល័យ១០មករា ១៩៧៩នេះ ក៏ទទួលបានកេរ្តិ៍ឈ្មោះចំណាត់ថ្នាក់លេខ២ នៅទូទាំងប្រទេស និង សូមឲ្យក្មួយៗសិស្សានុសិស្សទាំងអស់ រក្សានូវប្រពៃណី កេរ្តិ៍ឈ្មោះវិទ្យាល័យ ១០មករា ១៩៧៩បន្តដល់សិស្សជំនាន់ក្រោយរបស់យើង និងគោរពឱ្យបាននូវច្បាប់ចរាចរណ៍ នៅក្នុងពេលបើកបរ ត្រូវពាក់មួកសុវត្ថិភាព និង ដាក់ខែ្សក្រវ៉ាត់សុវត្ថិភាព ព្រមទាំងចាកចេញឲ្យឆ្ងាយពីគ្រឿងញៀនទៀតផង ៕
+19