![](https://asset.cambodia.gov.kh/provincial/sites/22/2023/05/345929566_188729740729679_4740641482039932669_n-1024x683.jpg)
ក្រោយពីអនុម័តរបៀបវារៈចំនូន ៤ និងសេចក្តីរាយការណ៍អំពីរបាយការណ៍សង្ខេបរួចមក សមាជិក សមាជិកាក្រុមប្រឹក្សាខេត្ត ក៏បានលើកឡើងនូវបញ្ហាមួយចំនួន និង បញ្ហាការងារសណ្តាប់ធ្នាប់ក្នុងក្រុង ,ការអនុវត្តនយោបាយភូមិឃុំមានសុវត្ថិភាព ,បញ្ហាផ្លូវមួយចំនួនក្នុងក្រុងសៀមរាប និង តំបន់រមណីយដ្ឋានអង្គរ (ពីរង្វង់មូលព្រៃគុយដល់រង្វង់មូលកូនដំរី ) បញ្ហាការធ្វើចរាចរណ៍របស់យានយន្តកែ ច្នៃ និង គោយន្តកន្ត្រៃ លើតាមដងផ្លូវសាធារណៈ (ដែលជាហានិភ័យបំផុត) និង បញ្ហាវិវាទដីធ្លីនៅតាមមូលដ្ឋាន។
លោក លី សំរិទ្ធ បានឯកភាពទៅលើរបាយការណ៍ ប្រចាំខែមេសា ហេីយចំពោះបញ្ហាដែលបានលេីកឡេីងបានធ្វើការបកស្រាយបំភ្លឺ និងព្រមទាំងបានអនុញាតជូនលោក ប្រធានមន្ទីរ អង្គភាពពាក់ព័ន្ធ ដើម្បីធ្វើការបំភ្លឺជូនអង្គប្រជុំផងដែរ។ លោកក៏បានធ្វើការក្រេីនរំលឹកដល់មន្ទីរជំនាញពាក់ព័ន្ធ និង កម្លាំងសមត្ថកិច្ចត្រូវធ្វើការរួមសហការគ្នាឱ្យបានល្អ ក្នុងការអនុវត្តការងាររបស់ខ្លួនឱ្យមានភាពរលូន និង រាល់ចំណុចខ្វះខាតដែលសមាជិកសមាជិកាក្រុមប្រឹក្សាខេត្តលើកឡើង ព្រមទាំងធ្វើការកែប្រែនូវប្រពៃណីដ៏អាក្រក់មួយចំនួន របស់យានយន្តមួយចំនួនដែលធ្វើអាជីវកម្មគ្មានច្បាប់ត្រឹមត្រូវ និង មិនបាន គោរពច្បាប់ធ្វេីឱ្យខូចនូវសណ្តាប់ធ្នាប់ក្នុងក្រុង បង្កភាពអាណាធិបតេយ្យ។ ម្យ៉ាងទៀតមន្ទីរជំនាញ និង កងកម្លាំងសមត្ថកិច្ច ត្រូវមានវិធានការរាល់យានយន្តដែលបានកែច្នៃ ដាក់ភ្លើង(ឡាហ្សែ) ដែលបង្កហានិភ័យដល់អ្នកបើកបរផ្សេងៗ ព្រមទាំងរៀបចំកម្លាំងក្នុងការត្រួតពិនិត្យរាល់យានយន្តដែលមិនបានចូលធ្វើការត្រួតពិនិត្យបច្ចេកទេសយានយន្ត (ឈៀក ) ព្រមទាំងស្លាកលេខ ក្លែងក្លាយ ដែលគ្មានច្បាប់អនុញ្ញាតត្រឹមត្រូវ។
ឯកឧត្តម អ៊ាន ឃុន តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយ ក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់បានញ៉ាំងឱ្យដំណើរការនៃកិច្ចប្រជុំសាមញ្ញលើកទី៤៨របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ជាមួយគ្នានេះ ឯកឧត្តម ប្រធានក្រុមប្រឹក្សាខេត្តក៏បានថ្លែងនូវអំណរគុណយ៉ាងជ្រាលជ្រៅចំពោះគណៈអភិបាលខេត្ត ក៏ដូចជាមន្ទីរ អង្គភាពទាំងអស់ដែលបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើងនេះ ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ ។ ឯកឧត្តមប្រធាន បានបញ្ជាក់ផងដែរថា ក្នុងខែ មេសានេះ ក្រោមកិច្ចដឹកនាំរបស់ឯកឧត្តមអភិបាលខេត្ត លើកិច្ចការរដ្ឋបាល ក្នុងការរៀបចំព្រឹត្តិការណ៍អង្គរសង្ក្រាន្ត , ការងារសន្តិសុខសាធារណៈ ,ការងារ គ្រោះមហន្តរាយ ក៏ដូចជាបញ្ហាផ្សេងៗជាដើម ។ សំខាន់ក្នុងរយៈពេល៣ថ្ងៃ នៃព្រឹត្តិការណ៍អង្គរសង្ក្រាន្ត បុណ្យចូលឆ្នាំថ្មីប្រពៃណីជាតិខ្មែរ បានប្រព្រឹត្តទៅប្រកបដោយសុវត្ថិភាព ដោយមានភ្ញៀវជាតិ អន្តរជាតិចូលមកទស្សនា ប្រមាណជាង២លាន នាក់ ព្រមទាំងរដ្ឋបាលខេត្តបានបដិសណ្ឋាកិច្ចគណៈប្រតិភូជាន់ខ្ពស់ថ្នាក់ជាតិ អន្តរជាតិ ចូលមកខេត្តសៀមរាប និង ការអនុវត្តការងារប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការនៅរដ្ឋបាល ថ្នាក់ក្រោមជាតិផងដែរ ៕