លោក នាក់ ណេរ៉ុន អភិបាលរងខេត្តសៀមរាប បានជម្រុញឲ្យរដ្ឋបាលក្រុងសៀមរាប អធិការដ្ឋាននគរបាលក្រុងសៀមរាប រដ្ឋបាលសង្កាត់ពាក់ព័ន្ធ និងអង្គការដៃគូរពាក់ព័ន្ធ ត្រូវស្រង់ស្ថិតិជនអនាថា និងអ្នកសុំទាន ជនមានពិការភាព និងជនវិបល្លាសស្មារតី ឲ្យបានគ្រប់គ្រាន់ទៅតាមអ្វីដែលយើងអាចធ្វើបាន បើតាមការអង្កេតរបស់ក្រុមការងារកន្លងមក ក្នុងនោះមានចំនួនសរុប ២១០នាក់ ស្រី ១៣០នាក់ ហើយមានកុមារចំនួន ១៤៣នាក់ កុមារី ៥១នាក់ ស្មើនឹង ១៩៨គ្រួសារ ជាគ្រួសារចំណាកស្រុកមករស់នៅបណ្ដោះអាសន្ន និងជនអនាថា ប្រកបមុខរបរសុំទាន អូសរទេះ រើសអេតចាយ និងដើរតាមចិញ្ចើមថ្នល់ ឬផ្លូវសាធារណៈជាមួយកុមារ និងយុវជនប្រើប្រាស់សារធាតុគ្រឿងញៀន។ លោក បានបន្តថា ដើម្បីឆ្លើយតបទៅនឹងអ្វីដែលក្រុមការងារបានធ្វើ គឺគិតត្រឹមពីថ្ងៃទី០១ ខែមករា ឆ្នាំ២០២៣ ដល់ថ្ងៃទី២០ ខែមីនា ឆ្នាំ២០២៣ ក្រុមលេខាធិការដ្ឋានបានទទួល និងបញ្ចូនជនអនាថា និងអ្នកសុំទានសរុបចំនួន៤៨នាក់ ស្រីចំនួន២៣ ក្នុងនោះមានពិការ០២នាក់ (កុមារ០៩នាក់ ស្រី០៣នាក់)។ មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប បានបញ្ជូនជនអនាថានេះ ទៅមជ្ឈមណ្ឌលស្តារនីតិសម្បទា អ្នកញៀនគ្រឿងញៀននៅសង្កាត់ទឹកវិល ក្រុងសៀមរាប ខេត្តសៀមរាបសរុបចំនួន១៣ស្រី០២នាក់ នឹងបានបញ្ជូនជនវិបល្លាសស្មារតី ទៅមជ្ឈមណ្ឌលថែទាំស្តារនីតិសម្បទាជនវិបល្លសស្មារតី នៅភូមិបាគួរ ឃុំបាគួរ ស្រុកកណ្តាលស្ទឹងខេត្តកណ្តាលសរុបចំនួន១៧ស្រីចំនួន០៥នាក់ យើងគិតត្រឹមថ្ងៃទី១៤ ខែមេសា ឆ្នាំ២០២២ ដល់ថ្ងៃទី២០ ខែមិថុនា ឆ្នាំ២០២៣។
លោក បានបញ្ជាក់ទៀតថា បញ្ហាប្រឈមជាមួយជនអនាថា អ្នកសុំទាន និងជនវិបល្លាសស្មារតីមានការកើនឡើងមកពីតាមបណ្តារាជធានី-ខេត្តនានា យើងពុំទាន់មានមជ្ឈមណ្ឌលបណ្តុះបណ្តាលជំនាញវិជ្ជាជីវៈសម្រាប់ជនអនាថា អ្នកសុំទានមុនពេលបញ្ជូនទៅសហគមន៍វិញ ដែលជាហេតុធ្វើឱ្យការធ្វើអនុវត្តការងារពុំទាន់ទទួលបានជោគជ័យនៅឡើយទេ។ រាល់ការបញ្ជូនជនអនាថា និងអ្នកសុំទានមកមជ្ឈមណ្ឌលសំចតសង្គមកិច្ចខេត្តសៀមរាប យើងបានស្នើឲ្យអធិការដ្ឋាននគរបាលក្រុងសៀមរាប ឬប៉ុស្តិ៍នគរបាលរដ្ឋបាលសង្កាត់ពាក់ព័ន្ធ ត្រូវបំពេញលិខិត ប្រគល់ទទួលផ្លូវការជាមួយមជ្ឈមណ្ឌលសំចតសង្គមកិច្ច ស្របតាមលិខិតបទដ្ឋានគតិយុត្តនានាជាដើម។ រដ្ឋបាលក្រុង-ស្រុក អធិការដ្ឋាននគរបាលក្រុង-ស្រុក និងរដ្ឋបាលឃុំ-សង្កាត់ បន្តកិច្ចសហការ រាល់ការបញ្ជូនចូល និងចេញ (អ្នកសុំទាន ជនអនាថា និងជនវិបល្លាសស្មារតី)ឱ្យបានល្អប្រសើរ។ រាល់ការបញ្ជូនជនអនាថា អ្នកសុំទាន និងជនវិបល្លាសស្មារតីចូលមកមជ្ឈមណ្ឌលសំចតសង្គមកិច្ច ខេត្តសៀមរាប ស្នើស្នងការដ្ឋាននគរបាលខេត្ត ឬ អធិការដ្ឋាននគរបាលក្រុង-ស្រុក និងប៉ុស្តិ៍នគរបាល រដ្ឋបាលសង្កាត់ ធ្វើតេស្តរកសារធាតុញៀន ដើម្បីបង្កភាពងាយស្រួលដល់មន្ត្រីប្រចាំការអនុវត្តតួនាទី ភារកិច្ចបន្ត៕