លោក ស្មៀន ប៊ុនធឿន នាយករងរដ្ឋបាលខេត្ត បានធ្វើបទបង្ហាញអំពីស្ថានភាពភូមិសាស្ត្ររបស់ខេត្តសៀមរាបផងដែរ ហេីយលោកបានបញ្ជាក់អំពីការងារសម្ព័ន្ធមេត្រីភាពរវាងខេត្តសៀមរាប នៃព្រះរាជាណាចក្រកម្ពុជា ជាមួយសាធារណរដ្ឋប្រជាមានិតចិន បានចងសម្ព័ន្ធមេត្រីភាព និងបានធ្វើកិច្ចសហប្រតិបត្តិការជាមួយខេត្ត-ក្រុងចំនួន ៣០ នៃសាធារណរដ្ឋប្រជាមានិតចិនរួមមាន៖ បានចុះអនុស្សារណៈ នៃការយោគយល់គ្នាចំនួន ៩ ខេត្ត-ក្រុង បានចុះកិច្ចព្រមព្រៀងចំនួន ៦ ខេត្ត-ក្រុង និងលិខិតផ្ដួចផ្ដើមចំនួន ១៥ ខេត្ត-ក្រុង។
លោកនាយករងរដ្ឋបាលបានបន្ថែមផងដែរថា រដ្ឋាភិបាលចិនបានផ្ដល់ធនធានហិរញ្ញវត្ថុ និងធនធានមនុស្សបច្ចេកទេសជួសជុលប្រាសាទបុរាណ ខ្មែរចំនួន២ នៅក្នុងតំបន់អង្គរគឺ ប្រាសាទចៅសាយទេពតានិងប្រាសាទតាកែវ ដែលមកដល់ពេលនេះបានបញ្ចប់ជាស្ថាពរហើយបានគ្រោងក្នុងការផ្ដល់ជំនួយបច្ចេកទេសសម្រាប់ការងារអភិរក្ស និងជួសជុលប្រាសាទបេងមាលានាពេលខាងមុខផងដែរ៕