បន្ទាប់ពីលោកស្រី ម៉ន នីរងី្ស អភិបាលរងខេត្ត បានអាននូវព្រះរាជសារ របស់សម្តេចព្រះមហាក្សត្រី នរោត្តម មុនិនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និង សុភមង្គល ក្នុងឱកាសអបអរសាទរខួបទី១១៣ ទិវាអន្តរជាតិនារី ៨មីនា ឆ្នាំ២០២៤ រួចមក។ ឯកឧត្តម អ៊ាន ឃុន បានលើកឡើងថា ការប្រារព្ធទិវាអន្តរជាតិនារី ៨ មីនា ក្នុងឆ្នាំនេះ ធ្វើឡើងក្រោមប្រធានបទ «ស្ត្រី និងក្មេងស្រី ក្នុងបរិវត្តកម្មឌីជីថល» ដែលជាមូលបទមួយ មានគោលបំណងរំលេចអំពីសក្តានុពល និងភាពចាំបាច់នៃការលើកកម្ពស់ការចូលរួម និងភាពជាតំណាងរបស់ស្ត្រី និងក្មេងស្រី ក្នុងវិស័យឌីជីថល ប្រកបដោយប្រសិទ្ធភាព និងសុវត្ថិភាព។ ដើម្បីឆ្លើយតបទៅនឹងបរិបទនៃការវិវឌ្ឍរបស់សេដ្ឋកិច្ច-សង្គម ស្របទៅនឹងចក្ខុវិស័យ ដែលបានចង្អុលបង្ហាញនៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា និងក្របខណ្ឌគោលនយោបាយ ក្នុងការលើកកម្ពស់សមភាពយេនឌ័រ ដើម្បីបង្កើនភាពអង់អាចដល់ស្ត្រី និងក្មេងស្រីនៅកម្ពុជា។
ឯកឧត្តមបានបន្តថា សម្តេចធិបតី ហ៊ុន ម៉ាណែត នាយករដ្ឋមន្ត្រី និង លោកជំទាវ ជានិច្ចកាល តែងគាំទ្រលើកកម្ពស់ និងជម្រុញនារីកម្ពុជាឱ្យចូលរួមក្នុងសកម្មភាពអភិវឌ្ឍជាតិ មាតុភូមិ តាមរយៈការបង្កើនចំនួនស្ត្រីជាមន្ត្រីរាជការស៊ីវិល កងកម្លាំងប្រដាប់អាវុធ និង មន្ត្រីមុខងារសាធារណៈ ក្នុងមុខតំណែងជាថ្នាក់ដឹកនាំក្រសួង-ស្ថាប័ន រាជធានី-ខេត្ត ក្រុង-ស្រុក-ខណ្ឌ ឃុំ-សង្កាត់ និងមន្ទីរ-អង្គភាពគ្រប់លំដាប់ថ្នាក់ ។ ដើមី្បកំណើនការងារ សមធម៌ប្រសិទ្ធភាព និងចិរភាព សំដៅកសាងមូលដ្ឋាន ឆ្ពោះទៅសម្រេចបានចក្ខុវិស័យកម្ពុជា ២០៥០។ ឯកឧត្តមបានកោតសសើរដល់រដ្ឋបាលខេត្ត មន្ត្រី រាជការទាំងអស់ ដែលបានរួមចំណែកគាំទ្រ ការលើកកម្ពស់ ស្ថានភាព ជីវភាព សិទ្ធ ឋានៈ តួនាទីរបស់ស្ត្រី និង បន្តគាំទ្រ និងប្រែក្លាយខ្លឹមសារ នៃប្រធានបទ (ស្ត្រី និងក្មេងស្រី ក្នុងបរិវត្តកម្មឌីជីថល) ឱ្យទៅជាសកម្មភាពជាក់ស្តែង ដើមី្បកម្ពុជា ប្រែក្លាយជាប្រទេស ដែលមានខឿនសេដ្ឋកិច្ចរឹងមាំ មានសន្តិសុខ សណ្តាប់ធ្នាប់សាធារណៈ ភាពសុខដុមរម្យនា ក្នុងសង្គម និង ពង្រីកបាននូវលក្ខខណ្ឌ អំណោយផល សម្រាប់ការអភិវឌ្ឍសេដ្ឋកិច្ច សង្គម ដើមី្បឈនទៅសម្រេចបាននូវ ការ អភិវឌ្ឍប្រកប ដោយចិរភាព និង ចក្ខុវិស័យឆ្នាំ២០៥០ ។ ឯកឧត្តម អ៊ាន ឃុន ក៏បានលើកឡើងថា បច្ចុប្បន្ននេះ នារីនៅតែជាដៃគូរមិនអាចខ្វះបាន និង បានចូលរួមចំណែកយ៉ាងសំខាន់ ក្នុងដំណើរការអភិវឌ្ឍជាតិមាតុភូមិ ។
នៅសាលា ខេត្តសៀមរាប មានមន្ត្រីរាជការជាស្ត្រី មានចំនួន ១២៥នាក់ ក្នុងនោះជាសមាជិកាក្រុមប្រឹក្សាខេត្ត ៣នាក់ ,អភិបាលរងខេត្ត ០១នាក់ ,មន្ត្រីក្របខ័ណ្ឌ ៤០នាក់ ,មន្ត្រីកិច្ចសន្យា ៤៩នាក់ , មន្ត្រីហាត់ការ ១៨នាក់ និង នារីអនាម័យ ១៤នាក់។ ក្នុងពិធីសំណេះសំណាលក្នុងពិធីអបអរសាទរខួបទី១១៣ ទិវាអន្តរជាតិនារី ៨មីនា ឆ្នាំ២០២៤ នេះដែរ ឯកឧត្តម អភិបាលខេត្ត បានឧបត្ថម្ភនូវថវិកា ដល់បងប្អូននារីទាំង ១៣២នាក់ ម្នាក់នូវថវិកា ១០ម៉ឺនរៀល៕