![](https://asset.cambodia.gov.kh/provincial/sites/22/2024/05/1-3-1024x683.jpg)
លោក ពិន ប្រាកដ អភិបាលរងខេត្ត បានមានប្រសាសន៍ថាកម្ពុជាបានឆ្លងកាត់ភ្លើងសង្គ្រាមជាច្រើនទសវត្ស។ ភ្លើងសង្គ្រាម បានបន្សល់ទុកនូវគ្រាប់មីន គ្រាប់បែកចង្កោម និង សំណល់ជាតិផ្ទុះ ជាច្រើនសន្ធឹកសន្ធាប់ពាសពេញផ្ទៃប្រទេស ដែលបានបណ្តាលឱ្យបងប្អូនប្រជាពលរដ្ឋយើងរាប់ម៉ឺននាក់ ខ្លះរងរបួស ខ្លះធ្លាក់ខ្លួនពិការ និងខ្លះទៀតស្លាប់បាត់បង់អាយុជីវិត ព្រមទាំងបានបង្កនូវសោកនាដកម្មដ៏សែនឈឺចាប់បំផុតដែលមិនធ្លាប់កើតមានពីមុន និងរាំងស្ទះដល់ការអភិវឌ្ឍប្រទេសជាតិ។ បើទោះបីកម្ពុជាយើងបានជួបប្រទះនូវទុក្ខសោក ដោយសារបញ្ហាគ្រាប់មីន ដែលបានបន្សល់ទុកពីភ្លើងសង្គ្រាមក៏ដោយ តែក្រោមការដឹកនាំប្រកបដោយកិត្តិបណ្ឌិតរបស់ រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងដោយមានការជួយជ្រោមជ្រែងពីបណ្តារ ប្រទេសជាមិត្ត ព្រមទាំងអង្គការដៃគូជាច្រើន មកដល់ពេលនេះយើងឃើញថាគ្រាប់មីន គ្រាប់បែកចង្កោម និងសំណល់ ជាតិផ្ទុះផ្សេងៗ ត្រូវ បានបោសសំអាតស្ទើនៅទូទាំងប្រទេស។
ដោយឡែកសម្រាប់ខេត្តសៀមរាប ក្រោមការខិតខំប្រឹងប្រែងរបស់រាជរដ្ឋាភិបាលកម្ពុជាចាប់តាំងពីឆ្នាំ ១៩៩២ រហូតមកដល់ បច្ចុប្បន្ននេះ ការងារបោសសម្អាតមីន និងសំណល់ជាតិផ្ទុះពីសង្គ្រាម របស់អង្គភាពប្រតិបត្តិករដែលបានធ្វើប្រតិបត្តិការក្នុងខេត្តរួមមាន CMAC HaloTrust អង្គការដោះមីនកម្ពុជា បានធ្វើការបោសសម្អាតមីនលើទំហំផ្ទៃដីសរុបមានចំនួន១៤១,២១៣,១៦៦ម៉ែត្រការ៉េ ស្មើនឹង ១៤,១២១ហិកតា រកឃើញមីនថ្មើជើង ចំនួន ២៣,៥៣៨គ្រាប់ មីនតោន ចំនួន ៧២៣គ្រាប់ សំណល់ជាតិផ្ទុះពីសង្គ្រាមគ្រប់ប្រភេទមាន ចំនួន ១១៧,៥៤៣គ្រាប់ មានអ្នកទទួលផលមានចំនួន ២២៨,៩៦៥គ្រួសារ មនុស្សសរុប មានចំនួន ៧៥៥,៩២៧នាក់។ ក្នុងនោះ យើងបានធ្វើការបោសសម្អាតបញ្ចប់ទាំងស្រុងក្នុងភូមិសាស្ត្រស្រុក ពួក ក្រឡាញ់ និងក្រុង សៀមរាប សម្រាប់ឆ្នាំ២០២៤ រដ្ឋបាលខេត្ត នឹងស្នើសុំអនុម័តផែនការបោសសម្អាតមីន និង ចម្ការគ្រាប់លើចំនួន ៦៦ទីតាំង បន្ថែមទៀត ដែលបានរកឃើញថាអាចមានមីន និងសំណល់ជាតិ ផ្ទុះពីសង្គ្រាមក្នុងទំហំផ្ទៃដីចំនួន ១១,០៣៥,០០០ម៉ែត្រការ៉េហើយគ្រោងប្រកាសខេត្តអស់មីន នាអំឡុងខែវិច្ឆិកា ឆ្នាំ២០២៤។
ទន្ទឹមនឹងនោះតាមរយៈយន្តការសកម្មភាពកម្ចាត់មីន និងគ្រាប់យុទ្ធភ័ណ្ឌមិនទាន់ផ្ទុះ រដ្ឋបាលខេត្ត បាននឹងកំពុងបន្តធ្វើការបោសសម្អាតមីន ការផ្សព្វផ្សាយអប់រំ ពីការគ្រោះថ្នាក់ដោយសារមីន ដោយសហការជាមួយ ក្រុមការងារផែនកាសកម្មភាពមីន អាជ្ញាធរមូលដ្ឋាន អង្គភាពពាក់ព័ន្ធ ចូលរួមសហការអនុវត្ត ជាបន្តបន្ទាប់រហូតមកដល់បច្ចុប្បន្ននេះ៕