ត្រូវនឹងថ្ងៃទី០៨ ខែមេសា ឆ្នាំ២០២៤ នៅសាលប្រជុំធំសាលាខេត្ត លោក ពិន ប្រាកដ អភិបាលរងខេត្តតំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្តបានអញ្ជេីញចូលរួមកិច្ចប្រជុំផ្សព្វផ្សាយផែនការយុទ្ធសាស្ត្រស្តីពី "ការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ២០២៤-២០២៨" ក្រោមអធិបតីភាពឯកឧត្តម នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ និងមានការចូលរួមពីប្រតិភូ្រសួងមហាផ្ទៃ ឯកឧត្តម សមាជិកក្រុមប្រឹក្សាខេត្ត អភិបាលរងខេត្ត លោក ស្នងការ មេបញ្ជាការកងកម្លាំងប្រដាប់អាវុធទាំង៣ ព្រមទាំងអ្នកពាក់ព័ន្ធសរុប ៣២០នាក់។
លោក ពិន ប្រាកដ បានស្វាគមន៍យ៉ាងកក់ក្តៅចំពោះប្រតិភូក្រសួងមហាផ្ទៃដែលដឹកនាំដោយឯកឧត្តម នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ និងបានរាយការណ៍អំពីសម្មភាពរបស់គណៈបញ្ជាការឯកភាពខេត្ត ក្រុង ស្រុកដែលរក្សានូវសន្តិសុខ សណ្តាប់ធ្នាប់សាធារណៈ ពិសេសការការពារសន្តិសុខជូនប្រតិភូ ភ្ញៀវទេសចរជាតិ អន្តរជាតិ ក៏ដូចជាព្រឹត្តិការណ៍ធំៗក្នុងខេត្តបានយ៉ាងល្អប្រសេីរ។ កត្តានេះបានធ្វេីឱ្យរាជរដ្ឋាភិបាលកម្ពុជាធ្វេីការវាយតម្លៃបានខ្ពស់ ដោយទទួលបានលទ្ធផលគួរទីមោទនៈ។ លោក អភិបាលរងខេត្តបន្តថា ដេីម្បីជោគជ័យបន្ថែមទៀត សូមគណៈបញ្ជាការឯកភាពរដ្ឋបាលក្រុង ស្រុក ឃុំ សង្កាត់ត្រូវបន្តផ្សព្វផ្សាយនូវគោលនយោបាយ ភូមិ ឃុំ សង្កាត់មានសុវត្ថិភាពបន្ថែមទៀត ដល់ប្រជាពលរដ្ឋនៅតាមមូលដ្ឋានរៀងៗខ្លួន។
ឯកឧត្តម នាយឧត្តមសេនីយ៍ សួស អង្គារ៍ បានធ្វេីការកោតសរសេីរដល់គណៈបញ្ជាការឯកភាពរដ្ឋបាលខេត្ត ក្រុង ស្រុក ឃុំ សង្កាត់ដែលបានអនុវត្តតួនាទី បានយ៉ាងល្អ និងទទួលបានលទ្ធផល លេខ១ ទទួលបាន ៨៣ ឃុំ សង្កាត់ លេខ២ ទទួលបាន ១៥ឃុំ សង្កាត់ និងលេខ៣ ទទួលបាន ២ឃុំ។ ទន្ទឹមនឹងនេះឯកឧត្តម បានណែនាំបន្ថែមដល់រដ្ឋបាលក្រុង ស្រុក ឃុំ សង្កាត់ទាំងអស់ត្រូវខិតខំអនុវត្តការងារផ្សព្វផ្សាយ និងទប់ស្កាត់រាល់បទល្មេីសបន្ថែមទៀត ដេីម្បីឱ្យខេត្តសៀមរាបទទួលបានលទ្ធផលកា ន់តែល្អប្រសេីរថែមទៀត។
ឯកឧត្តម នាយឧត្តមសេនីយ៍ បានបន្តថា រាជរដ្ឋាភិបាលកម្ពុជាក្រោមការដឹកនាំរបស់សម្តេចហាបវរធិបតី ហ៊ិន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានដាក់នូវយុទ្ធសាស្ត្របញ្ចកោណដំណាក់កាលទី១ ដែលក្នុងនោះ ក្រសួងមហាផ្ទៃ គឺជាក្រសួងឆ្អឹងខ្នងដ៏សំខាន់មួយដែលមានតួនាទីជាសេនាធិការជូនរាជរដ្ឋាភិបាល ក្នុងការដឹកនាំគ្រប់គ្រងរដ្ឋបាលដែនដីគ្រប់ថ្នាក់លើវិស័យនយោបាយរដ្ឋបាល និងការដឹកនាំគ្រប់គ្រង នគរបាលជាតិលើវិស័យសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គមក្នុងព្រះរាជាណាចក្រ កម្ពុជា អាស្រ័យហេតុនេះ ក្រសួងមហាផ្ទៃចាំបាច់ត្រូវឈានមុខក្នុងការរៀបចំ និងអនុវត្តសកម្មភាពជា អាទិភាព និងវិធានការគន្លឹះនានាដែលស្ថិតក្នុងដែនសមត្ថកិច្ចរបស់ខ្លួន និងដែលបានកំណត់ក្នុងយុទ្ធសាស្ត្រ បញ្ចកោណដំណាក់កាលទី១នេះឱ្យមានប្រសិទ្ធភាពខ្ពស់។ ម្យ៉ាងទៀត ក្រសួងមហាផ្ទៃបានរៀបចំផែនការយុទ្ធសាស្ត្រស្តីពី “ការលើកកម្ពស់ការគ្រប់គ្រង រដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម” សម្រាប់រយៈពេល៥ឆ្នាំ ចាប់ពីឆ្នាំ២០២៤ ដល់ឆ្នាំ២០២៨ ដែលត្រូវបានដាក់ឱ្យអនុវត្តជាផ្លូវការកាលពីថ្ងៃទី១៦ ខែកុម្ភៈ ឆ្នាំ ២០២៤កន្លងមកនេះ។