កិច្ចប្រជុំនេះ ដេីម្បីត្រួតពិនិត្យ ត្រៀមរៀបចំទទួល និងទំនាក់ទំនង រៀបចំព្រឹត្តិការណ៍សៀមរាបសង្គ្រាន្ត ឆ្នាំ២០២៤ ក៏ដូចជាធ្វើការផ្សព្វផ្សាយបន្ថែមឱ្យបានទូលំទូលាយចាប់តាំងពីការរៀបចំរហូតដល់លទ្ធផលបញ្ចប់កម្មវិធី ព្រមរៀបចំអញ្ជើញគណៈអធិបតី និងភ្ញៀវកិត្តិយស ដើម្បីចូលរួមកម្មវិធីផ្សេងៗក្នុងពីធីសៀមរាបសង្គ្រាន្ត ឆ្នាំ២០២៤ ជាមួយគ្នានេះក្រុមការងារក៏ត្រូវរៀបចំថតយកទិដ្ឋភាព និងយកព័ត៌មាន អ្នកមកកម្សាន្តក្នុងពិធីបុណ្យសម្រាប់ផ្សព្វផ្សាយផងដែរ។
គួរបញ្ជាក់ផងដែរថា ក្នុងឱកាសចូលឆ្នាំៗនេះ រដ្ឋបាលខេត្ត សហភាពសហព័ន្ធយុវជនកម្ពុជាខេត្តសៀមរាប នឹងរួមសហការរៀបចំនូវព្រឹត្តិការសៀមរាប-សង្ក្រាន្ត នៅតាមដងស្ទឹងសៀមរាបពីថ្ងៃទី១៣ដល់ថ្ងៃទី១៦ ខែមេសា ឆ្នាំ២០២៤ ដើម្បីញ៉ាំងពិធីបុណ្យចូលឆ្នាំប្រពៃណីជាតិខ្មែរ ឱ្យកាន់តែអធិកអធម ដើម្បីបង្កើននូវភាពទាក់ទាញ ដល់ភ្ញៀវទេសចរណ៍ ក្នុងនិងក្រៅប្រទេស ចូលមកទស្សនាកម្សាន្តខេត្តសៀមរាបកាន់តែមានការកើនឡើងជាបន្តបន្ទាប់។ ព្រឹត្តិការណ៍នេះនឹងមានរួមបញ្ចូលនូវកម្មវិធីកម្សាន្តសប្បាយជាច្រើនដូចជា ការលេងល្បែងប្រជាប្រិយខ្មែរ ការជិះទូកលេងតាមដងស្ទឹង ការវាយកូនហ្គោលសៀមរាបសង្ក្រាន្ត ការតាំងពិព័រណ៍ម្ហូបអាហារ ការទស្សនាផ្សារបណ្តែតទឹក និងការប្រគំតន្ត្រីនាពេលរាត្រី ជាដើម៕