ដោយមានការនិមន្តចូលរួមរបស់សម្ដេចព្រះព្រហ្មរតនមុនី ពិន សែន សិរីសុវណ្ណោ និង ព្រះមេគណខេត្តទាំងពីរគណៈ និង ឯកឧត្តម លោកឧកញ៉ា លោកជំទាវ ជាសមាជិកព្រឹទ្ធសភា , រដ្ឋសភា , រដ្ឋលេខាធិការ អនុរដ្ឋលេខាធិការ និង ក្រុមប្រឹក្សាខេត្ត គណៈអភិបាលខេត្ត អាជ្ញាធរជាតិអប្សរា ថ្នាក់ដឹកនាំមន្ទីរ អង្គភាព អាជ្ញាធរក្រុងស្រុក មន្ត្រីរាជការ កងកម្លាំងទាំងបី និង ប្រជាពលរដ្ឋ។
ឯកឧត្តម អភិបាលខេត្ត និងជាប្រធានសហភាពសហព័ន្ធយុវជនកម្ពុជាខេត្ត បានឱ្យដឹងថាព្រឹត្តិការណ៍សៀមរាបសង្ក្រាន្ត ឆ្នាំ ២០២៤ មានចំនួន ២៣ក្រុម ដោយក្នុងនោះមានក្រុមការងារទ្រទ្រង់កម្មវិធី ចំនួន ១៣ក្រុម និង ក្រុមការងាររៀបចំកម្មវិធីចំនួន ១០ក្រុម ដោយបានរៀបចំបែងចែកតំបន់កម្មវិធីជា ៣ធំៗ រួមមាន តំបន់ទី១ នៅតំបន់សួនច្បារព្រះរាជដំណាក់ យើងមានរៀបចំកម្មវិធីជាច្រើនរួមមានកម្មវិធីសាសនា និងបួងសួងសុំសេចក្តីសុខ កម្មវិធីបើកព្រឹត្តិការណ៍ កម្មវិធីទទួលទេវតាឆ្នាំថ្មី កម្មវិធីដង្ហែព្រះពុទ្ធបដិមារ និងស្រង់ព្រះ និងមានកម្មវិធីសម្តែងសិល្បៈបុរាណប្រពៃណី ការលែងល្បែងប្រជាប្រិយ កម្មវិធីពិព័រណ៍ ខ្លែងឯកខ្មែរ និងបង្រៀនធ្វើខ្លែង កម្មវិធីកាត់សក់សិរីសួស្តី កម្មវិធីតំបន់ត្រជាក់ស្រស់ស្រាយ កម្មវិធីភូមិបេតិកភណ្ឌ ដោយក្នុងនោះមានការរៀបចំជា ស្តង់ដាក់តាំងបង្ហាញ និងលក់ផលិតផល ម្ហូបអាហារ និងផលិតផលសិប្បកម្ម ជាដើម។ តំបន់ទី២ ដែលស្ថិតនៅតាមដងស្ទឹងសៀមរាប រហូតដល់តំបន់ផាប់ស្ត្រីត និងក្នុង ក្រុងសៀមរាប ក្នុងនោះតំបន់មាត់ស្ទឹង មានកម្មវិធីជិះទូកកំសាន្ត កម្មវិធីហែរក្បួនទូក ស្តង់ពិព័រណ៍ ម្ហូបអាហារ ការប្រគុំតន្ត្រីស្គរដៃ ការសម្តែងសិល្បៈបុរាណប្រពៃណី កម្មវិធីពូនភ្នំខ្សាច់ក្នុងវត្តរាជបូណ៌ កម្មវិធីការប្រកួតកីឡាវាយកូនគោលពានរង្វាន់សៀមរាបសង្ក្រាន្ត ២០២៤ នៅអង្គរហ្វូស និងទីតាំង ប្រគុំតន្ត្រីចំនួន ៣ទីតាំង ទីតាំងទី១ លើរុក្ខវិថីព្រះសីហនុ (ក្បែរសួនហាត់ប្រាណខាងជើងស្ពាន ព្រះរាជដំណាក់) ទីតាំងទី២ ខាងកើតស្ទឹងគល់ស្ពានវត្តរាជបូណ៌ និងទីតាំងទី៣ នៅជិតហាងលក់ សម្លៀកបំពាក់ ZANDO កម្មវិធីបង្ហាញ Drone Light Show Cambodia 2024 ។
ឯកឧត្តមឧបនាយករដ្ឋមន្ត្រី ទៀ សីហា បានគូសបញ្ជាក់ថា នេះជាប្រវត្តិសាស្ត្រ ក្នុងការប្រារព្ធព្រឹត្តិការណ៍សៀមរាបសង្ក្រាន្ត ក្រោយការបញ្ចប់ខួប១០ឆ្នាំនៃអង្គរសង្ក្រាន ឆ្នាំនេះសង្ក្រាន្តឆ្នាំថ្មីត្រូវបានរៀបចំឡើងនៅតាមបណ្ដារាជធានី ខេត្តក៏ដូចនៅតាមបណ្តាក្រុង ស្រុក ដើម្បីបង្ហាញ អំពីកេរ្ត៍តំណែលវប្បធម៌ ទំនៀមទម្លាប់ប្រពៃណីដ៏ផូរផង់ខ្មែរយើង ដែលជាមោទនៈភាពជាតិ ។ ឯកឧត្តមក៏បាន អរគុណនយោបាយឈ្នះឈ្នះ អរគុណសន្តិភាព អរគុណស្ថាបនិកប្រតិបត្តិករសន្តិភាព ទើបយើងបានមកជួបជុំគ្នា ប្រារព្ធព្រឹត្តិការណ៍សៀមរាបសង្ក្រាន្តនេះឡើង ដែលបង្កលក្ខណៈប្រជាពលរដ្ឋខ្មែរយើង ទាំងជនបរទេស ចូលរួមសប្បាយរីករាយ ។ ឯកឧត្តមឧបនាយករដ្ឋមន្ត្រី ក៏បានពាំនាំនូវការផ្តាំផ្ញើ ជូនពរក្នុងឱកាសបុណ្យចូលឆ្នាំថ្មី ប្រពៃណីខ្មែរ ពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្តេចធិបតី ហ៊ុន ម៉ាណែត និង លោកជំទាវបណ្ឌិត ព្រមទាំងសម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ ដល់ថ្នាក់ ដឹកនាំខេត្ត មន្តីរ អង្គភាព មន្ត្រីរាជការ កងកម្លាំង និងប្រជាពលរដ្ឋ នៃខេត្តសៀមរាប។ ទន្ទឹមនេះ ព្រឹត្តិការណ៍សៀមរាបសង្ក្រាន្ត គឺជាព្រឹត្តិការណ៍បន្តវេនពីមហាព្រឹត្តិការណ៍ អង្គរសង្ក្រាន្ត ដើម្បីរឹតចំណងមិត្តភាព សាមគ្គីភាព រវាងប្រជាជាតិខ្មែរ និងប្រជាជាតិលើសកលលោកតាមរយៈនៃ ការចូលរួមពីសំណាក់ភ្ញៀវទេសចរណ៍អន្តរជាតិ បន្តពង្រីកកិត្យានុភាពជាតិខ្មែរលើឆាកអន្តរជាតិ៕