លោក លី សារី ក៏បានធ្វេីសេចក្តីស្វាគមន៍ដោយបញ្ជាក់ពីសក្តានុពល និង ការងារសន្តិសុខ សុវត្ថិភាពរបស់ខេត្ត បានរក្សាបានល្អជូនដល់ភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត នៅតាមតំបន់រមណីយ ដ្ឋានវប្បធម៌ និង ធម្មជាតិ សំខាន់ចំពោះបងប្អូនដែលមកធ្វើវិនិយោគនៅខេត្តសៀមរាប។ លោកក៏បាន គូសបញ្ជាក់ថា ក្រៅពីវិស័យ ទេសចរណ៍ ខេត្តសៀមរាបមានផ្ទៃដីកសិកម្មច្រើន ដែលនឹងបំពេញតម្រូវការជូនដល់អ្នកវិនិយោគ ហើយជាសំខាន់នោះ តម្រូវការរបស់ប្រជាពលរដ្ឋកម្ពុជា។ ក្នុងនោះលោកក៏បានគូសបញ្ជាក់ថា ខេត្តសៀមរាប និង ខេត្តយូណាន មានសម្ព័ន្ធ មេត្រីភាពនឹងគ្នា មានកិច្ចសហប្រតិបត្តិការបានល្អនឹងគ្នាទៀតផង ។ ម៉្យាងទៀតខេត្តយូណាន ក៏មានក្រុមហ៊ុនវិនិយោគ ក្នុងការសាងសង់អាកាសយានដ្ឋានអន្តរជាតិនៅខេត្តសៀមរាប ព្រមទាំងចូលរួមក្នុងកិច្ចអភិវឌ្ឍន៍ខេត្ត ។ លោកអភិបាល រងខេត្តបានបន្តទៀតថា សាធារណរដ្ឋប្រជាមានិតចិន គឺជាដៃគូដ៏សំខាន់ ក្នុងកិច្ចអភិវឌ្ឍន៍ប្រទេសជាតិ ដែលជាមិត្តដែក ថែប និងបានគាំទ្រចំពោះគំនិតផ្តួចផ្តើម (ខ្សែក្រវាត់ និងផ្លូវ) ដែលបានចូលរួមចំណែកក្នុងការជួយដល់ប្រទេសកំពុងអភិវឌ្ឍ ឲ្យមានការរីកចម្រើន ។ ក្នុងនោះដែរលោកអភិបាលរងខេត្ត ក៏បានសំណូមពរដល់គណៈប្រតិភូ ក្នុងការជម្រុញដល់អ្នកវិនិយោគដើមី្បបំពេញនូវតម្រូវការរបស់ភ្ញៀវទេសចរណ៍ និងជម្រុញដល់ភ្ញៀវទេសចរណ៍ចិនមកទេសចរណ៍នៅកម្ពុជា សំខាន់នៅខេត្តសៀមរាប និង ធ្វើឲ្យកិច្ចទំនាក់ទំនងសហប្រតិបត្តិការរវាងខេត្តទាំងពីរ មានភាពរីកចម្រើនឡើង។
បន្ទាប់ពីការធ្វើបទបង្ហាញរបស់ ទីចាត់ការផែនការ និង វិនិយោគ របស់សាលាខេត្តសៀមរាប ពីវឌ្ឍនភាពនៃកិច្ច អភិវឌ្ឍន៍របស់ខេត្ត លើគ្រប់វិស័យរួចមក មានប្រសាសន៍នោះ ឯកឧត្តម លីវ ហុងជាន ក៏បានលើកឡើងពីគោលបំណងរបស់ខ្លួន ក្នុងនាមជាខេត្តសម្ព័ន្ធមេត្រីភាពជាមួយ ខេត្តសៀមរាប តែងតែមានការទំនាក់ទំនង និង សហប្រតិបត្តិការល្អនឹងគ្នាទៀតផង។ ឯកឧត្តម បានផ្តោតទៅលើវិស័យទេសចរណ៍ កសិកម្ម និង វិស័យវិនិយោគ នៅកម្ពុជា សំខាន់នៅខេត្តសៀមរាប ដែលជាខេត្តមានសក្តានុពលយ៉ាងខ្លាំងលើវិស័យទេសចរណ៍។ ក្នុងនោះឯកឧត្តម បានលើកឡើងពី វិស័យសេដ្ឋកិច្ចរបស់ ខេត្តយូណាន ដែលបានពឹងផ្អែកលើវិស័យកសិកម្ម ឧស្សាហកម្ម និង វិស័យដឹកជញ្ជូន ។
ឯកឧត្តម បានបន្តទៀតថា ខេត្តយូណាន គឺជាដៃគូរដ៏ល្អជាមួយខេត្តសៀមរាប ព្រមទាំងបានធ្វើកិច្ចសហប្រតិបត្តិការល្អនឹងគ្នា និង បានធ្វើការផ្លាប់ប្តូរប្រតិភូ ក្នុងការសិក្សាស្វែងយល់នឹងគ្នាលើគ្រប់វិស័យផងដែរ ។ ម៉្យាងទៀតខេត្តយូណាន និង ខេត្តសៀមរាប មានសក្តានុពលប្រហាក់ប្រហែលគ្នា លើវិស័យទេសចរណ៍ ដោយខេត្តសៀមរាប សម្បូរទៅដោយប្រាង្គប្រាសាទបុរាណ រមណីយដ្ឋានធម្មជាតិ ហើយខេត្តយូណាន មានទីកន្លែងកម្សាន្តរបស់ភ្ញៀវទេសចរដែលមានវ័យចំណាស់ ត្រូវពឹងផ្អែកតំបន់ធម្មជាតិព្រៃភ្នំ ដែលមានទឹកធ្លាក់ ប្រកបដោយធម្មជាតិ ដោយខេត្តយូណាន ជាខេត្តមានបទពិសោធន៍លើវិស័យទេសចរណ៍ទៀតផង ។ ឯកឧត្តមក៏បានទទួលនូវសំណូមពររបស់រដ្ឋបាលខេត្ត ក្នុងការជម្រុញវិស័យទេសចរណ៍ និង ធ្វើការផ្សព្វផ្សាយដល់ប្រជាពលរដ្ឋចិន ចូលមកធ្វើទេសចរណ៍នៅខេត្តសៀមរាប ។ ឯកឧត្តមមានសង្ឃឹមជឿជាក់ថា កិច្ចសហប្រតិបត្តិការរវាងខេត្តទាំងពីរ ក៏ដូចប្រទេសទាំងពីរ នៅក្រោមក្របខ័ណ្ឌកិច្ចសហប្រតិបត្តិការ (ខ្សែក្រវាត់ និងផ្លូវ)ហើយក៏ជាឆ្នាំការផ្លាស់ប្តូរប្រជាជននិងប្រជាជន នៃប្រទេសទាំងពីរផងដែរ ៕