ថ្ងៃទី ០៧ ខែសីហា ឆ្នាំ ២០២៤ លោក អ៉ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចូលរួមជាអធិបតីភាពក្នុងពិធីបើកវគ្គបណ្ដុះបណ្ដាលស្ដីជំនាញសម្របសម្រួល នៅរដ្ឋបាលខេត្តសៀមរាប ដោយមានការចូលរួមពីលោក លោកស្រី អភិបាល អភិបាលរង នៃគណៈអភិបាលក្រុងស្រុក លោក លោកស្រី តំណាងមន្ទីរ-អង្គភាព ជុំវិញខេត្ត លោក លោកស្រី តំណាងទីចាត់ការ ការិយាល័យ ចំណុះសាលាខេត្ត លោក លោកស្រី តំណាងសាកលវិទ្យាល័យ លោក លោកស្រី តំណាងសហគមន៍កសិកម្ម និងវិស័យឯកជន និងលោក លោកស្រី ទីប្រឹក្សា អ្នកសម្របសម្រួលអង្គការ អាគ្រីស៊ុត និងអង្គការហ្រ្គេត។ វគ្គបណ្ដុះបណ្ដាលនេះមានរយៈពេលបីថ្ងៃពីថ្ងៃទី០៧ ដល់ថ្ងៃទី០៩ ខែសីហានេះ រៀបចំឡើងដើម្បីឆ្លើយតបតាមតម្រូវការរបស់ក្រុមការងារតាមវិស័យនៃគម្រោងប្រព័ន្ធស្បៀង និងអាហារូបត្ថម្ភនៅក្នុងខេត្តសៀមរាប រួមមាន តំណាងរដ្ឋបាលខេត្ត មន្ទីរពាក់ព័ន្ធ រដ្ឋបាលស្រុក ក្រុមប្រឹក្សាឃុំ វិស័យឯកជន បុគ្គលិកអង្គការសង្គមស៊ីវិល សហគមន៍កសិកម្ម និងសាស្ត្រាចារ្យ។ វគ្គនេះមានគោលបំណងអភិវឌ្ឍន៍អ្នកសម្របសម្រួលក្រុមការងារតាមវិស័យទាំង ២៣នាក់ (ស្ត្រី៧នាក់) ឱ្យក្លាយជាអ្នកសម្របសម្រួលដែលមានសមត្ថភាព ដើម្បីឱ្យពួកគាត់ ផ្តល់សេវា និងបំពេញការងារដល់ក្រុមគោលដៅប្រកបដោយគុណភាព។ មេរៀនសំខាន់ៗសម្រាប់វគ្គនេះ រួមមាន ទិដ្ឋភាពទូទៅនៃដំណើរការសម្របសម្រួលជាមួយពហុអ្នកពាក់ព័ន្ធ តួនាទីអ្នកសម្របសម្រួលល្អ វិធីសាស្ត្រតាមបែបចូលរួមសម្រាប់ការសម្របសម្រួល ការរៀបចំឧបករណ៍សម្រាប់ការសម្របសម្រួល និងជំនាញចាំបាច់សម្រាប់ការសម្របសម្រួល រួមទាំង ការដោះស្រាយស្ថានភាពលំបាក និងបញ្ហា។លោកអភិបាលរងខេត្ត បានបញ្ជាក់ថា វគ្គបណ្ដុះបណ្ដាលនេះពិតជាមានសារៈសំខាន់ណាស់ដើម្បីធ្វើឱ្យអស់លោក លោកស្រីដែលជាអ្នកសម្របសម្រួលក្រុមការងារវិស័យអាច៖- ពន្យល់ពីដំណើរការនៃការសម្របសម្រួលពីភាគីពាក់ព័ន្ធច្រើនទៀត- ពិពណ៌នាអំពីតួនាទីរបស់អ្នកសម្របសម្រួល- រៀបចំឧបករណ៍ (Concept note) ឬគោលការណ៍ណែនាំសម្រាប់វគ្គបណ្ដុះបណ្ដាល/កិច្ចប្រជុំ/សិក្ខាសាលា និងអាចរៀបចំឯកសារសម្រាប់ការសម្របសម្រួល- កំណត់ជំនាញផ្សេងទៀត និងវិធីសាស្រ្តសម្រាប់ការសម្របសម្រួល និងស្វែងរកមធ្យោបាយសម្រាប់ដោះស្រាយស្ថានភាពលំបាក។ ដូចនេះលោក ក៏សូមអំពាវនាវដល់អស់លោក លោកស្រី អ្នកនាងកញ្ញាទាំងអស់ចូលរួមឱ្យបានសកម្មក្នុងការពិភាក្សា និងផ្តល់មតិយោបល់ ដើម្បីឱ្យវគ្គបណ្ដុះបណ្ដាលរបស់យើងទទួលបានជោគជ័យ៕