ថ្ងៃទី០៥ ខែ កញ្ញា ឆ្នាំ២០២៤ នៅសណ្ឋាគារអង្គរបារ៉ាឌី ខេត្តសៀមរាប លោក លី សារី អភិបាលរងខេត្ត តំណាងឯកឧត្តម ប្រាក់ សោភ័ណ អភិបាល នៃគណៈអភិបាល បានចូលរួមក្នុងសិក្ខាសាលា ផ្សព្វផ្សាយលទ្ធផល នៃការអនុវត្តគម្រោង សាកល្បងស្តីពីការប្រើបា្រស់ ឧបករណ៍វាយតំលៃហានិភ័យ ក្នុងការគ្រប់គ្រងសំណល់ជាតិផ្ទុះពីសង្រ្គាមដែលនៅសេសសល់ប្រទេសកម្ពុជា ក្រោមអធិបតីភាព ឯកឧត្តម លី ធុជ ទេសរដ្ឋមន្រ្តីទទួលបន្ទុកបេសសកម្មពិសេស អនុប្រធានទី១ អាជ្ញាធរកម្ពុជាគ្រប់គ្រងសកម្មភាពមីន និងសង្រ្គោះជនពិការដោយសារមីន និងមានការអញ្ជេីញចូលរួមពីឯកឧត្តម លោកជំទាវ លោក លោកស្រី ថ្នាក់ដឹកនាំអាជ្ញាធរកម្ពុជា គ្រប់គ្រងសកម្មភាពមីន និងសង្រ្គោះ ជនពិការដោយសារមីន ឯកឧត្តម លោកជំទាវ លោក លោកស្រី តំណាង ដៃគូអភិវឌ្ឍន៍អង្គការជាតិ-អន្តរជាតិ ឯកឧត្តម លោកជំទាវអភិបាល អភិបាលរង និងជាប្រធានគណៈ កម្មការសកម្មភាពមីនរាជធានី-ខេត្ត។ លោក លី សារី អភិបាលរងខេត្ត បានមានប្រសាសន៍ថា កម្ពុជាបានឆ្លងកាត់ភ្លើងសង្គ្រាមជាច្រើនទសវត្ស។ ភ្លើងសង្គ្រាម បានបន្សល់ទុកនូវគ្រាប់មីន គ្រាប់បែកចង្កោម និង សំណល់ជាតិផ្ទុះ ជាច្រើនសន្ធឹកសន្ធាប់ពាសពេញផ្ទៃប្រទេស ដែលបានបណ្តាលឱ្យបងប្អូនប្រជាពលរដ្ឋយើងរាប់ម៉ឺននាក់ ខ្លះរងរបួស ខ្លះធ្លាក់ខ្លួនពិការ និងខ្លះទៀតស្លាប់បាត់បង់អាយុជីវិត ព្រមទាំងបានបង្កនូវសោកនាដកម្មដ៏សែនឈឺចាប់បំផុតដែលមិនធ្លាប់កើតមានពីមុន និងរាំងស្ទះដល់ការអភិវឌ្ឍប្រទេសជាតិ។ បើទោះបីកម្ពុជាយើងបានជួបប្រទះនូវទុក្ខសោក ដោយសារបញ្ហាគ្រាប់មីន ដែលបានបន្សល់ទុកពីភ្លើងសង្គ្រាមក៏ដោយ តែក្រោមការដឹកនាំប្រកបដោយកិត្តិបណ្ឌិតរបស់ រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងដោយមានការជួយជ្រោមជ្រែងពីបណ្តារ ប្រទេសជាមិត្ត ព្រមទាំងអង្គការដៃគូជាច្រើន មកដល់ពេលនេះយើងឃើញថាគ្រាប់មីន គ្រាប់បែកចង្កោម និងសំណល់ ជាតិផ្ទុះផ្សេងៗ ត្រូវ បានបោសសំអាតស្ទើនៅទូទាំងប្រទេស។ដោយឡែកសម្រាប់ខេត្តសៀមរាប ក្រោមការខិតខំប្រឹងប្រែងរបស់រាជរដ្ឋាភិបាលកម្ពុជាចាប់តាំងពីឆ្នាំ ១៩៩២ រហូតមកដល់ បច្ចុប្បន្ននេះ ការងារបោសសម្អាតមីន និងសំណល់ជាតិផ្ទុះពីសង្គ្រាម របស់អង្គភាពប្រតិបត្តិករដែលបានធ្វើប្រតិបត្តិការក្នុងខេត្តរួមមាន CMAC HaloTrust អង្គការដោះមីនកម្ពុជា បានធ្វើការបោសសម្អាតមីនលើទំហំផ្ទៃដីសរុបមាន ១៤៥,០៣០,៣៦៦ម៉ែត្រការ៉េ ស្មើនឹង ១៤,៥០៣ហិកតា រកឃើញមីនថ្មើជើង ចំនួន ២៣,៦៨៤គ្រាប់ មីនតោន ចំនួន ៧២៣គ្រាប់ សំណល់ជាតិផ្ទុះពីសង្គ្រាមគ្រប់ប្រភេទមាន ចំនួន ១១៧,៧៤៩គ្រាប់។ ទន្ទឹមនឹងនោះ យេីងបាននឹងកំពុងបន្តធ្វើការបោសសម្អាតមីន ការផ្សព្វផ្សាយអប់រំ ពីការគ្រោះថ្នាក់ដោយសារមីន ដោយសហការជាមួយក្រុមការងារផែនកាសកម្មភាពមីន អាជ្ញាធរ មូលដ្ឋាន អង្គភាពពាក់ព័ន្ធ ចូលរួមសហការអនុវត្តជាបន្តបន្ទាប់រហូតមកដល់បច្ចុប្បន្ននេះ។