នៅសាលប្រជុំលេខ១សាលាខេត្តសៀមរាប នាថ្ងៃទី១៧ ខែមីនា ឆ្នាំ២០២៥នេះ បានរៀបចំកិច្ចប្រជុំគណៈកម្មាធិការអេដស៍ខេត្ត ដើម្បីធ្វើការពិនិត្យ តាមដាន និងវាយតម្លៃពីស្ថានភាពនៃអ្នកផ្ទុកមេរោគអេដស៍ ដឹកនាំដោយ លោក នាក់ ណេរ៉ុន អភិបាលរងខេត្ដ ដោយមានការអញ្ជើញចូលរួមពីអ្នកពាក់ព័ន្ធជាច្រើនរូប។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្ដសៀមរាប បានបញ្ជាក់ថាភារកិច្ចរបស់លេខាធិការដ្ឋាន គឺជាសេនាធិការផ្ទាល់របស់គណៈកម្មាធិការប្រយុទ្ធនឹងជំងឺអេដស៍ខេត្ត ដោយមានជំនួយពីក្រុមបច្ចេកទេសអន្តរក្រសួងលេខាធិការដ្ឋាន មានតួនាទីវិភាគលើស្ថានភាពនៃការរីករាលដាលជំងឺអេដស៍ មុខសញ្ញាប្រឈមនៃកត្តាជំរុញឱ្យមានការរីករាលដាល និងដំណោះស្រាយ ធ្វើការបណ្តុះបណ្តាលដល់មន្រ្តីជំនាញរដ្ឋបាលក្រុងស្រុក ឃុំសង្កាត់ សហគមន៍ និងអ្នកស្ម័គ្រចិត្តអំពីការងារដែលពាក់ព័ន្ធនឹងកិច្ចការដែលប្រយុទ្ធ និងជំងឺអេដស៍។
លោក នាក់ ណេរ៉ុន អភិបាលរងខេត្ដសៀមរាប មានប្រសាសន៍ថា កិច្ចប្រជុំនាពេលនេះដែរ គឺដើម្បីស្វែងរកធាតុចូល ក៏ដូចជាពិភាក្សាគ្នា និងស្វែងរកយុទ្ធសាស្ដ្រ ធ្វើយ៉ាងណាកុំឱ្យការកើនឡើងនូវជំងឺអេដស៍ មេរោគអេដស៍នៅតាមសហគមន៍ ក៏ដូចជាការកើតឡើងដល់ប្រជាពលរដ្ឋ ពិសេសយុវជន។ ដូច្នេះសូមឱ្យគ្រប់អ្នកពាក់ព័ន្ធ តាមដានដោយយកចិត្ដទុកដាក់ ចំពោះអ្នកប្រឈមនឹងកើតជំងឺអេដស៍ ធ្វើយ៉ាងណាដើម្បីលុបបំបាត់ការឆ្លងមេរោគអេដស៍ជំងឺអេដស៍ឱ្យបាន៕
