ថ្ងៃទី២៧ ខែមីនា ឆ្នាំ២០២៥ លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានចូលរួមពិធីប្រគល់វិញ្ញាបនបត្របញ្ចប់ការសិក្សាបដិសណ្ឋារកិច្ច ជំនាន់ទី២២ របស់សាលាបដិសណ្ឋារកិច្ច និងទេសចរណ៍ ប៉ូលឌុយប្រ៊ូល ខេត្តសៀមរាប ក្រោមអធិបតីភាពរបស់ ឯកឧត្តមបណ្ឌិត ពេជ សោភ័ណ្ឌ ទេសរដ្ឋមន្ត្រីទទួលបន្ទុកបេសកកម្មពិសេស ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោកស្រី អេទ្បេអូណ័រមូអែត ឌុយប្រ៊ូល ប្រធានក្រុមប្រឹក្សាភិបាលសាលា និងភាគីពាក់ព័ន្ធសរុបចំនួន ៥០០រូប។
តាមរយៈការសិក្សាអស់រយៈពេល ១១ខែ លើជំនាញទេសចរណ៍ ដោយសិក្សារយៈពេល ១១ ខែទាំងទ្រឹស្តី ការអនុវត្ត និងហ្វឹកហាត់ការងារ យុវជនសរុបចំនួន ២៣៨នាក់បានបញ្ចប់ការសិក្សាដោយជោគជ័យ និងទទួលបានវិញ្ញាបនបត្រកម្រិតអាស៊ាន លើជំនាញការិយាល័យជួរមុខ គេហកិច្ច ចុងភៅ សេវាកម្មម្ហូបអាហារ និងភេសជ្ជៈ។ ទន្ទឹមនឹងនេះ យុវជនប្រមាណ ៩៥% ទទួលបានការងារធ្វើយ៉ាងល្អប្រសើរក្នុងវិស័យទេសចរណ៍ បន្ទាប់ពីបានសិក្សានៅសាលាបដិសណ្ឋារកិច្ច និងទេសចរណ៍ ប៉ូលឌុយប្រ៊ូល។ រយៈពេល ២២ឆ្នាំ សាលាសណ្ឋារកិច្ច និងទេសចរណ៍ ប៉ូលឌុយប្រ៊ូល បានរួមចំណែកផ្តល់ការបណ្តុះបណ្តាលបដិសណ្ឋារកិច្ចដល់យុវជនចំនួនប្រមាណជិត ៦០០០នាក់។
