ថ្ងៃសុក្រ ទី១៧ ខែកក្កដា ឆ្នាំ២០២០ រដ្ឋបាលខេត្តសៀមរាប បានបើកកិច្ចប្រជុំត្រួតពិនិត្យលើការអនុវត្តគម្រោងសេវាសង្គមរបស់រដ្ឋបាលថ្នាក់ក្រុង ស្រុក និងឃុំ សង្កាត់ ដែលកិច្ចប្រជុំនេះ ដឹកនាំដោយលោកស្រី យូ សុភា អភិបាលរងខេត្ត និងជាប្រធានគម្រោងលើកកម្ពស់វិស័យសេវាសង្គមខេត្តសៀមរាប ដោយមានការអញ្ជើញចូលរួមពី លោកជំទាវប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារ ខេត្ត តំណាងទីចាត់ការផែនការវិនិយោគខេត្ត មន្ទីរជំនាញពាក់ព័ន្ធ ថ្នាក់ដឹកនាំនិងមន្រ្តីជាជនបង្គោលរបស់គម្រោងសេវាសង្គមនៅរដ្ឋបាលក្រុង ស្រុក ផងដែរ។សូមជម្រាបជូនផងដែរថា គម្រោងលើកកម្ពស់វិស័យសេវាសង្គម នេះគឺផ្តោតសំខាន់ទៅលើបញ្ហាសុខភាពមាតា ទារក និងអាហារូបត្ថម្ភ បញ្ហាទឹកស្អាតនិងអនាម័យ បញ្ហាកិច្ចការពារកុមារ បញ្ហាការអប់រំកុមារតូច និងបញ្ហាភាពងាយរងគ្រោះ របស់ប្រជាពលរដ្ឋ។ កិច្ចសំខាន់នៃកិច្ចប្រជុំនាថ្ងៃនេះ ដើម្បីធ្វើការត្រួតពិនិត្យវឌ្ឍនភាពនៃការអនុវត្តគម្រោងសេវាសង្គម ដែលប្រើប្រាស់ថវិកាមូលនិធិក្រុង ស្រុក និងឃុំ សង្កាត់ សម្រាប់ឆ្នាំ២០២០ ក្នុងឆមាសទី១ ឆ្នាំ២០២០ ជាមួយនេះដែរអង្គប្រជុំក៏បានធ្វើការពិនិត្យលើការរៀបចំនៃការកំណត់បញ្ហាតាមរយៈការគូសផែនទីសេវាសង្គមភូមិ ដើម្បីធ្វើការវិភាគ និងការចាត់អាទិភាពនៃបញ្ហាដាក់បញ្ចូលទៅក្នុងផែការកម្មវិធីវិនិយោគ និងផែនការយុទ្ធសាស្រ្តថវិកាឆ្នាំ២០២១-២០២៣។មានប្រសាសន៍ នៅក្នុងដំណើរការនៃកិច្ចប្រជុំ លោកស្រី យូ សុភា អភិបាលរងខេត្ត ជាប្រធានគម្រោងលើកកម្ពស់សេវាសង្គមខេត្តសៀមរាប បានជំរុញឲ្យរដ្ឋបាលក្រុង ស្រុក៖១. ធ្វើការពិនិត្យឲ្យបានម៉ត់ចត ចំពោះការគូសផែនទីសេវាសង្គមនៅតាម ភូមិ ឃុំ សង្កាត់នីមួយៗ ជៀសវាងការធ្វើឲ្យបាត់បង់អត្ថប្រយោជន៍របស់ប្រជាពលរដ្ឋ ពិសេសគ្រួសារក្រីក្រ និងងាយរងគ្រោះ ២. ត្រូវផ្តល់ព័ត៌មានដល់ប្រជាពលរដ្ឋ អំពីកាលបរិច្ឆេទនៃការប្រជុំកូសផែនទីភូមិ ។ ២. សហការនិងសម្របសម្រួលជាមួយអ្នកពាក់ព័ន្ធ ពិសេសរដ្ឋបាលឃុំ សង្កាត់ ក្នុងការរៀបចំផែនទីសេវាសង្គមភូមិ។៣. ត្រូវតាមដាននិងត្រួតពិនិត្យលើការរៀបចំផែនការ និងការប្រើប្រាស់កញ្ចប់ថវិកាមូលនិធិ ឃុំ សង្កាត់ ដើម្បីធានានូវតម្លាភាព គណនេយ្យភាព និងប្រសិទ្ធិភាព ។៤. ត្រូវធ្វើបច្ចុប្បន្នភាពឲ្យបានច្បាស់លាស់ អំពីផែនទីសេវាសង្គមភូមិ៕
