រសៀលថ្ងៃចន្ទ ៧រោច ខែអស្សុជ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៧ ខែតុលា ឆ្នាំ២០២២ នៅបន្ទប់ប្រជុំ Video Conffence សាលាខេត្ត ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប លោកជំទាវ ស៊ិន ណម សមាជិកក្រុមប្រឹក្សាខេត្ត លោកស្រី យូ សុភា អភិបាលរងខេត្ត បានជួបពិភាក្សាការងារស្តីពីការប្រមូលព័ត៌មានអំពីលទ្ធផលជោគជ័យ នៃការអនុវត្តការងារ​សេវា​សង្គមនៅរដ្ឋបាលខេត្តសៀមរាបជាមួយឯកឧត្តម សង់ ពលរិទ្ធ ទីប្រឹក្សាក្រសួងមហាផ្ទៃ និងប្រតិភូក្រសួង។ នាឱកាសនេះដែរ ឯកឧត្តម ប្រធានក្រុមប្រឹក្សាខេត្តសៀមរាបសូមអរគុណដល់ក្រសួងមហាផ្ទៃដែលបានវាយតម្លៃខ្ពស់ចំពោះរដ្ឋបាលខេត្តដែលមានស្នាដៃឆ្នើមក្នុងការទទួលជ័យលាភីរង្វាន់ជើងឯកសេវាសង្គមលេខ ១ ដំបូងគេក្នុងប្រទេសកម្ពុជា។ ជាមួយនឹងលទ្ធផលនេះ ឯកឧត្តមក៏បានជំរុញ និងលើកទឹកចិត្តដល់មន្ត្រីរដ្ឋបាលខេត្ត ជាពិសេសក្រុមការងារសេវាសង្គម ក្នុងការជ្រើសរើសគម្រោងសកម្មភាព អាទិភាព សេវាសង្គមពីបណ្តា ក្រុង ស្រុក និងឃុំ សង្កាត់ ក្នុងខេត្តសៀមរាប និងបានអនុម័តគាំទ្រថវិកាប្រចាំឆ្នាំសម្រាប់ប្រើប្រាស់កិច្ចការងារសេវាសង្គមទាន់ពេលវេលា។ ក្រុមប្រឹក្សាខេត្តបានដំណើរការកិច្ចប្រជុំសាមញ្ញប្រចាំខែនីមួយៗ បានទៀងទាត់ និងស្របតាមប្រតិទិន ក្នុងនោះបានពិនិត្យ និងពិភាក្សាលើរបាយការណ៍ប្រចាំខែនីមួយរបស់រដ្ឋបាលខេត្ត ពាក់ព័ន្ធ និងកិច្ចការងារសេវាសង្គម និងតែងតែគាំទ្រ រាល់សំណើរ និងមតិយោបល់ការលើកឡើងរបស់ក្រុមការងារសេវាសង្គម ដើម្បីយកទៅអនុវត្តការងារ កាន់តែមានប្រសិទ្ធភាព ព្រមទាំងជំរុញ និងគាំទ្រ ទាំងស្មារតី និងថវិកាដើម្បីសកម្មភាពការងារសេវាសង្គមទទួលបានជ័យលាភី ឆ្នាំបន្តបន្ទាប់ទៀត។ សូមបញ្ជាក់ថាជំនួបពិភាក្សានេះដែរ គឺដើម្បីចងក្រងនូវបទពិសោធន៍ក្នុងការអនុវត្តការងារសេវាសង្គម សម្រាប់ចែករំលែកដល់រដ្ឋបាលថ្នាក់ក្រោមជាតិនានា ជាពិសេសដៃគូអភិវឌ្ឍន៍ដើម្បីគៀងគរធនធានបន្តពង្រឹងសមត្ថភាពដល់រដ្ឋបាលថ្នាក់ក្រោមជាតិឲ្យខិតខំយកចិត្តទុកដាក់ក្នុងការអនុវត្តការងារសេវាសង្គម ឲ្យកាន់តែល្អប្រសើរនិងទទួលបានប្រសិទ្ធផលខ្ពស់បន្ថែមទៀតក្នុងការងារគាំទ្រគម្រោងសេវាសង្គមនៃអគ្គនាយកដ្ឋានរដ្ឋបាល និងចុះប្រមូលព័ត៌មានអំពីភាពជោគជ័យរបស់រដ្ឋបាលខេត្តសៀមរាប និងរដ្ឋបាលឃុំបាគង ដែលទទួលបានស្នាដៃឆ្នើមក្នុងការទទួលជ័យលាភីរង្វាន់ជើងឯកសេវាសង្គមលេខ ១ ដំបូងគេក្នុងប្រទេសកម្ពុជា៕