កាលពីព្រឹកថ្ងៃសុក្រ ១១រោច ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី២១ ខែតុលា ឆ្នាំ២០២២ ឯកឧត្តម អា៊ន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលនៃគណៈអភិបាលខេត្តបានចូលរួមអញ្ជើញចូលរួមបជួបសំណេះសំណាលជាលើកទី៣ ជាមួយប្រជាពលរដ្ឋប្រមាណ ១,៨៥៣គ្រួសារទៀត ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ ស្ថិតក្រោមការគ្រប់គ្រងរបស់អាជ្ញាធរជាតិអប្សរា ទៅតាំងទីលំនៅនៅតំបន់អភិវឌ្ឍន៍ថ្មី រុនតាឯកក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ពិធីសំណេះសំណាលនេះ បានធ្វើឡើងនៅភូមិធម្មជាតិរុនតាឯក ស្ថិតក្នុងស្រុកបន្ទាយស្រី ខេត្តសៀមរាប ជាទីតាំងដែលរាជរដ្ឋាភិបាលផ្តល់ដីជូនពលរដ្ឋជាថ្នូរការរុះរើសំណង់ចេញពីតំបន់រមណីយដ្ឋានអង្គរ និងតំបន់គ្រប់គ្រងដោយអាជ្ញាធរជាតិអប្សរា។ សម្តេចតេជោនាយករដ្ឋមន្ត្រីបានថ្លែងអំណរគុណចំពោះបងប្អូនប្រជាពលរដ្ឋទាំងអស់ ដែលបានគាំទ្រការរៀបចំរបស់រាជរដ្ឋាភិបាល​កម្ពុជា និងបានស្ម័គ្រចិត្តរើចេញពីតំបន់រមណីយដ្ឋានអង្គរ មកកាន់តំបន់អភិវឌ្ឍន៍រុនតាឯកនេះ។ សម្តេចតេជោបានមានប្រសាសន៍ទៀត ថា ការបំពានគោលការណ៍របស់អង្គការយូណេស្កូ គឺនឹងធ្វើឱ្យតំបន់រមណីយដ្ឋានអង្គររបស់យើង ត្រូវដកចេញពីបញ្ជីសម្បត្តិបេតិកភណ្ឌពិភពលោក។ សម្តេចតេជោ បានមានប្រសាសន៍ថា ប្រជាពលរដ្ឋដែលស្ម័គ្រចិត្តរើសំណង់ចេញពីតំបន់អង្គរ និងតំបន់ដទៃទៀតរបស់អាជ្ញាធរជាតិអប្សរា គឺជាសម្រេចចិត្តមួយដ៏ឆ្លាតវៃ និងត្រឹមត្រូវបំផុតសម្រាប់ការថែរក្សាសម្បត្តិបេតិកភណ្ឌជាតិយើង។ ជាថ្មីម្តងទៀត សម្តេចតេជោនាយករដ្ឋមន្ត្រីប្រាប់ពលរដ្ឋទាំងអស់ដែលត្រូវរើចេញពីតំបន់រមណីយដ្ឋានអង្គរថា បើអាជ្ញាធរមិនទាន់មានការរៀបចំដីថ្មីស្អាតរួចរាល់ទេ គឺកុំទាន់រើពីកន្លែងចាស់។ ហើយសម្ដេចបានបញ្ជាក់ឲ្យអាជ្ញាធរត្រូវតែរៀបចំកន្លែងថ្មីឱ្យបានស្អាតបាតសិន ទើបយកប្រជាពលរដ្ឋមក ពីព្រោះសម្ដេចមិនចង់យកប្រជាជនមកទុកចោលនោះទេ៕