នាព្រឹកថ្ងៃទី០១ ខែធ្នូ ឆ្នាំ២០២២នេះ ក្រោមវត្តមានរបស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ឯកឧត្តម Paul Dubrule ស្ថាបនិករូបបករណ៍ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល ឯកឧត្តមបណ្ឌិត ពេជ្រ សោភណ្ឌ័ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និង លោកស្រី ម៉ននី រងី្ស អភិបាលរងខេត្តសៀមរាប ព្រមទាំងសហការី នៃសាលាសណ្ឋាគារនិងទេសចរណ៍ ប៉ូលឌុលប្រ៊ូលជាច្រើននាក់ផងដែរ។ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៏ ថ្លែងថា យុវជនរាប់ពាន់នាក់ រាប់ពាន់គ្រួសារ រាប់ពាន់អាជីវកម្ម ទេសចរណ៍ បានទទួលប្រយោជន៍ដោយផ្ទាល់ពីសាលាសណ្ឋាគារ និងទេសចរណ៍ ប៉ូលឌុយប្រ៊ូល ដែលទាំងនេះ គឺកើតចេញពីបេះដូង និងទឹកចិត្តសប្បុរសរបស់លោកប៉ូល ឌុយ ប្រ៊ូល និង គ្រួសារផ្ទាល់តែម្តង។ គិតមកដល់បច្ចុប្បន្ន តាមការឲ្យដឹងរបស់សាលា លោក ប៉ូល ឌុយប្រ៊ីល និងគ្រួសារ បានបរិច្ចាគថវិកាផ្ទាល់ខ្លួនប្រមាណជាង ៩ លានដុល្លារអាមេរិក និងគៀងគរអង្គាសពីសប្បុរជន បានប្រមាណជាង ៦ លានដុល្លារ សរុបនៃការឧបត្ថម្ភ មានប្រមាណជាង ១៥ លានដុល្លារ ។ ឯកឧត្តមបានកោតសរសើរដល់ថ្នាក់ដឹកនាំនៃក្រសួង/ស្ថាប័ន ពាក់ព័ន្ធ និង ឈានមុខគេក្នុងតំបន់អាស៊ាន ដែលបានចូលរួមផ្ដល់ការបណ្តុះបណ្តាលតាម ស្ដង់ដាអាស៊ាន បានយ៉ាងមានប្រសិទ្ឋភាព ហើយសិស្សជាង ៦ពាន់នាក់។ ទន្ទឹមនឹងវិធាននានាដាក់ចុះដោយរាជរដ្ឋាភិបាល ដើម្បីចូលរួមដោះស្រាយ ផលប៉ះពាល់ពីវិបត្តិកូវីដ-១៩ ក្រសួងទេសចរណ៍ និងភាគីពាក់ព័ន្ឋបានអនុវត្តនូវ ផែនទីចង្អុលផ្លូវ ស្តីពីការស្តារនិងលើកស្ទួយទេសចរណ៍ ក្នុងអំឡុង និងក្រោយ វិបត្តិកូវីដ-១៩ បានយ៉ាងមានប្រសិទ្ធភាព ។ ជាក់ស្តែង សម្រាប់រយៈពេល ១០ខែដើមឆ្នាំ២០២២ កម្ពុជាទទួលបានភ្ញៀវទេសចរអន្តរជាតិ ប្រមាណជាង ១, ៥៧ លាននាក់ កើនឡើង ៨៨១% ធៀបនឹងរយៈពេលដូចគ្នាឆ្នាំ២០២១ ។ រីឯភ្ញៀវ ទេសចរផ្ទៃក្នុងធ្វើដំណើរកម្សាន្តក្នុងប្រទេសជាង ១០,៨៦លាននាក់ កើនឡើង ក្នុងអត្រា ២៣៤% ធៀបរយៈពេលដូចគ្នាឆ្នាំ២០២១។ ឯកឧត្តម Paul Dubrule ស្ថាបនិករូបបករណ៍ នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល បានលើកពីគោលបំណងនៃកិច្ចប្រជុំ ក្នុងការត្រួតពិនិត្យពីលទ្ធផលនៃការងារអនុវត្តបានក្នុងរយៈពេល២០ឆ្នាំមកនេះ ព្រមទាំង ដើមី្បធ្វើការអបអរសាទរខួបលើកទី២០ នៃការបង្កើតសាលាសណ្ឋាគារនិងទេសចរណ៍ ប៉ូលឌុលប្រ៊ូល ដើម្បីគាំទ្រដល់ការអប់រំ និង ការអភិវឌ្ឍន៍យុវជនកម្ពុជា សំខាន់លើការបណ្តុះបណ្តាលវិជ្ជាជីវៈនិងជំនាញផ្សេងៗ នៅក្នុងវិស័យទេសចរណ៍នៅកម្ពុជា ។ ក្នុងនោះដែរ ឯកឧត្តមបណ្ឌិត ពេជ្រ សោភ័ណ្ឌ​រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ បានធ្វើការវាយតម្លៃខ្ពស់ ចំពោះសាលាសណ្ឋាគារ និងទេសចរណ៍ ប៉ូលឌុលប្រ៊ូល ដែលបានយកចិត្តទុកដាក់ អនុវត្តការងារកន្លងមក សំខាន់ក្នុងការចូលរួមលើកស្ទួយនូវក្នុងវិជ្ជា ជីវៈទេសចរណ៍ បានល្អប្រសើរ ។ ឯកឧត្តម បានបញ្ជាក់ថា សាលាសណ្ឋាគារនិងទេសចរណ៍ ប៉ូលឌុលប្រ៊ូល បានផ្តល់នូវចំណេះដឹង ការងារដល់យុវជនកម្ពុជា និង បានខិតខំបណ្តុះបណ្តាលក្នុងរយៈពេល២០ឆ្នាំមកនេះ ជួយដល់យុវជនកម្ពុជាយ៉ាងច្រើនក្នុងការប្រកបរបស់ចិញ្ចឹមក្រុមគ្រួសារ សំខាន់លើការបណ្តុះបណ្តាល វិជ្ជាជីវៈទេសចរណ៍ និង ជំនាញជាច្រើនទៀតក្នុងវិស័យទេសចរណ៍ ។ ឯកឧត្តម បានថ្លែងអំណរគុណ ចំពោះទឹកចិត្តដ៏ស្មោះរបស់ឯកឧត្តម Paul Dubrule និងលោកជំទាវ ដែលបានបង្កើតនូវសាលាវិជ្ជាជីវៈនេះឡើង ក្នុងការជួយលើវិស័យទេសចរណ៍នៅកម្ពុជា ព្រមទាំងសហការីបានខិតខំយកនូវចំណេះដឹងចែករំលែក ធ្វើការបណ្តុះបណ្តាលដល់យុវជនកម្ពុជា សំខាន់បាន ជួយផ្តល់នូវអាហារូបករណ៍ ដល់សិស្សក្រីក្រ នៅតាមតំបន់ជនបទ តាមបណ្តាខេត្តនានា នៃព្រះរាជាណាចក្រកម្ពុជា បានមកចូលរៀនវិជ្ជាជីវៈ លើវិស័យសណ្ឋាគារ ទេសចរណ៍ និង ជំនាញផ្សេងៗទៀត ៕