![](https://asset.cambodia.gov.kh/provincial/sites/22/2023/07/352282054_597513112523019_4387285954677003581_n-1024x682.jpg)
ព្រឹកថ្ងៃទី១៨ ខែមិថុនា ឆ្នាំ២០២៣ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដោយមានការចូលរួមពីសំណាក់ ឯកឧត្តម លោកជំទាវ ជានរដ្ឋលេខាធិការ និង អស់លោកលោកស្រីជា អភិបាលរងខេត្ត ថ្នាក់ដឹកនាំ មន្ទីរខេត្តទាំង៤ បានអញ្ជើញជាអធិបតីក្នុងពិធីប្រគល់ប័ណ្ណសរសើររបស់ រាជរដ្ឋាភិបាលកម្ពុជាជូនថ្នាក់ដឹកនាំ និងមន្ត្រីសុខាភិបាល នៃរដ្ឋបាលខេត្តសៀមរាប, ឧត្តរមានជ័យ, ព្រះវិហារ ,ខេត្តកំពង់ធំ មន្ទីរពេទ្យជ័យវរ្ម័នទី៧ និង មន្ត្រីបុគ្គលិកនៃមន្ទីរសុខាភិបាលនៃខេត្តទាំង៤ ប្រមានជា៤០០នាក់ នៅសាលប្រជុំមន្ទីរពេទ្យជ័យវរ្ម័នទី៧។
ឯកឧត្តមសាស្ត្រាចារ្យ ម៉ម ប៊ុនហេង បានសម្តែងនូវការកោតសរសើរចំពោះមន្ត្រីសុខាភិបាលទាំងអស់នៅខេត្តបួន និង មន្ទីរពេទ្យជ័យវរ្ម័នទី៧ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋនៃខេត្តសៀមរាប កំពង់ធំ , ឧត្តរមានជ័យ ,ខេត្តព្រះវិហារ និយាយដោយឡែក និងប្រជាពលរដ្ឋទូទាំងប្រទេស ដែលបានចូលរួមសហការ ក្នុងការប្រយុទ្ធនឹងជំងឺកូវីដ-១៩ ព្រមទាំងធានាបាននូវការផ្តល់សេវាសុខភាពជាសារវ័ន្ត ទោះបីជាខេត្តសៀមរាប ដែលមានការផ្ទុះនៃជំងឺកូវីដ-១៩ជាលើកដំបូង នៅព្រះរាជាណាចក្រកម្ពុជា នៅទូទាំងប្រទេសបានរងនូវផលប៉ះពាល់ដោយវិបត្តិជំងឺកូវីដ-១៩ សំខាន់លើវិស័យសេដ្ឋកិច្ចទេសចរណ៍ នៅខេត្តសៀមរាប។ ឯកឧត្តមរដ្ឋមន្ត្រី ក៏បានគូសបញ្ជាក់ថា សមិទ្ធផលដ៏ធំធេងនេះ កើតចេញពីការដឹកនាំប្រកបដោយស្មារតី បុរេសកម្ម ចក្ខុវិស័យវែងឆ្ងាយ ឈ្លាសវៃរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសការរក្សាបានសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់និងសុវត្ថិភាពសង្គម ការគ្រប់គ្រងបានជំងឺកូវីដ-១៩ ការរក្សាកំណើនសេដ្ឋកិច្ច និងលំនឹងជីវភាពប្រជាជន ការលើកកម្ពស់កិត្យានុភាពកម្ពុជា នៅលើឆាកតំបន់និងអន្តរជាតិ តាមរយៈនយោបាយការបរទេស ឯករាជ្យដោយផ្អែកលើច្បាប់។ ម៉្យាងទៀតថ្មីៗនេះ ព្រះរាជាណាចក្រកម្ពុជាបានរៀបចំធ្វើជាម្ចាស់ផ្ទះការប្រកួតកីឡាអាស៊ី អាគ្នេយ៍ លើកទី៣២ ឆ្នាំ២០២៣ ក្នុងបរិយាកាសមហោឡារិក អធឹកអធម ល្បីខ្ទរខ្ទាទូទាំងព្រះរាជាណាចក្រកម្ពុជា ក្នុងតំបន់និងនៅលើសកលលោក។ ដូច្នេះតម្លៃសន្តិភាព ដែលកម្ពុជាកំពុងតែមាន និង ខិតខំថែរក្សានៅ ពេលនេះ គឺពិតជាកត្តាសំខាន់បំផុត ដែលបងប្អូនជនរួមជាតិកម្ពុជាទាំងអស់ ត្រូវតែចងចាំជានិច្ច និងចូលរួម ថែរក្សាការពារសន្តិភាពនេះឲ្យបានគង់វង្ស សម្រាមកូនចៅជំនាន់ក្រោយ ។ ឯកឧត្តមសាស្ត្រា ចារ្យ ក៏បានធ្វើការក្រើនរំលឹកដល់មន្ត្រីសុខាភិបាល គ្រូពេទ្យ ត្រូវគោរពនូវក្រមសីលធម៌របស់គ្រូពេទ្យ ចំពោះប្រជាពលរដ្ឋចូលមកទទួលសេវា និង សូមឲ្យអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃទី ២៣ ខែកក្កដា ឆ្នាំ ២០២៣ ឲ្យបានគ្រប់ៗគ្នាផងដែរ ។
មានប្រសាសន៍នោះដែរ លោក ពិន ប្រាកដ អភិបាលរងនៃគណៈអភិបាលខេត្ត បានមានប្រសាសន៍ថា ចាប់តាំងពីរកឃើញករណីវិជ្ជមានវីរុសកូវីដ-១៩ ដំបូងលើបុគ្គលម្នាក់នៅខេត្តសៀមរាប រហូតមកដល់ពេលបច្ចុប្បន្ននេះ ខេត្តសៀមរាបបាន ធ្វើប្រតិបត្តិការឆ្លើយតបនឹងជំងឺកូវីដ-១៩ ដោយចាត់តាំងក្រុមគ្រូពេទ្យប្រចាំការនៅតាមមន្ទីរពេទ្យបង្អែក និមណ្ឌលសុខភាព និង ច្រកចេញចូលនៅអាកាសយានដ្ឋានអន្តរជាតិសៀមរាប និង ឆ្លងកាត់ព្រំប្រទល់ខេត្តនិងខេត្ត សម្រាប់ត្រួតពិនិត្យសុខភាព និងតាមដានរោគសញ្ញាអ្នកសង្ស័យជំងឺកូវីដ-១៩ ព្រមទាំងរៀបចំក្រុមគ្រូពេទ្យផ្តល់សេវា ត្រួតពិនិត្យសុខភាពលើអ្នកដំណើរ/អ្នកសង្ស័យកូវីដ-១៩ និងប្រចាំការនៅតាមមជ្ឈមណ្ឌលចត្តាឡីស័ក និងមណ្ឌលពិនិត្យ ព្យាបាលជំងឺ ដោយចាត់វិធានការអនុវត្តនានា ដូចជាការតាមដានស្ថានភាពនៃជំងឺកូវីដ-១៩ នៅទូទាំងពិភពលោក និងនៅប្រទេសកម្ពុជា និងការប្រមូលទិន្នន័យ និងការស្វែងករណីកូវីដ-១៩ បែបអកម្ម និងសកម្មនៃការតាមដានជំងឺកូវីដ-១៩ ព្រមទាំងវិធីសាស្ត្រស្វែងរកអ្នកប៉ះពាល់ជាមួយអ្នកជំងឺកូវីដ-១៩ និងការប្រមូលវត្ថុវិភាគការវេចខ្ចប់និងការដឹកជញ្ជូនវត្ថុវិភាគ និងការប្រើប្រាស់សំភារៈការពារខ្លួន និង ការធ្វើចត្តាឡីស័ក ការថែទាំ និងព្យាបាលជាមូលដ្ឋាននៃជំងឺកូវីដ-១៩ និងការប្រាស្រ័យទាក់ទងហានិភ័យ និងការចូលរួមពីសហគមន៍ និង ការជម្រុញយុទ្ធនាការចាក់វ៉ាក់សាំងកូវីដ-១៩ ចាប់ពីដូសមូលដ្ឋាន និងដូសបន្តបន្ទាប់៕