![](https://asset.cambodia.gov.kh/provincial/sites/22/2023/08/365430082_631734022434261_6589205929897314845_n.jpg)
យោងតាមសេចក្តីសម្រេចលេខ ៨៩ សសរ ចុះថ្ងៃទី៥ ខែធ្នូ ឆ្នាំ២០២២ របស់រាជរដ្ឋាភិបាលកម្ពុជា ស្តីពីការបង្កើតគណៈកម្មការអន្តរក្រសួងជំរុញ និងត្រួតពិនិត្យការងារអធិការកិច្ចហត្ថពលកម្មបរទេស និងផែនការសកម្មភាពលេខ០០២/២៣ ផស ចុះថ្ងៃទី១២ ខែមករា ឆ្នាំ២០២៣ របស់គណៈកម្មការអន្តរក្រសួង ជំរុញ និងត្រួតពិនិត្យការងារអធិការកិច្ចហត្ថពលកម្មបរទេស។ ក្រុមការងារអធិការកិច្ចចម្រុះហត្ថពលកម្មបរទេស ដែលមានសមាសភាពពីអគ្គអន្តោរប្រវេសន៍ ស្នងការដ្ឋាននគរបាលខេត្តសៀមរាប និងមន្ទីរការងារ និងបណ្តុះបណ្តាលវិជ្ជាជីវៈខេត្ត បានសហការជាមួយរដ្ឋបាលខេត្ត ធ្វើការផ្សព្វផ្សាយស្តីពី លិខិតបទដ្ឋានគតិយុត្ត ពាក់ព័ន្ធនឹងការគ្រប់គ្រង និងប្រើប្រាស់ហត្ថពលកម្មបរទេសដល់ម្ចាស់ ឬ និយោជក សហគ្រាស គ្រឹះស្ថានទូទាំងខេត្តសៀមរាប នៅថ្ងៃទី២២ មីនា ឆ្នាំ២០២៣ ដោយមានអញ្ជើញចូលរួមពី ថ្នាក់ដឹកនាំមន្ទីរ-អង្គភាពពាក់ព័ន្ធ គណៈអភិបាលក្រុង ស្រុកទាំង១២ ប្រធាន ឬ តំណាងការិយាល័យកុងស៊ុលសាធារណៈប្រជាមានិចិន សាធារណៈរដ្ឋកូរ៉េ ជប៉ុន សាធារណៈបារាំង សមាគមជនជាតិកូរ៉េ សមាគមជនជាតិវៀតណាម ម្ចាស់ ឬ និយោជក និងតំណាងសហគ្រាស គ្រឹះស្ថានគ្រប់វិស័យ បានអញ្ជើញចូលរួមផងដែរ។ពិធីផ្សព្វផ្សាយនេះ រៀបចំឡើងដើម្បីធ្វើការផ្សព្វផ្សាយឱ្យបានទូលំទូលាយដល់សហគ្រាស គ្រឹះស្ថាន ដែលមានប្រើប្រាស់ហត្ថពលករបរទេស និងគ្រប់ភាគីពាក់ព័ន្ធឱ្យយល់ជ្រួតជ្រាប និងចូលរួមអនុវត្តព្រមទាំងផ្សព្វផ្សាយបន្តនូវរាល់គោលការណ៍ វិធានការដែលច្បាប់បានកំណត់ អំពីការងារអធិការកិច្ចហត្ថពលកម្មបរទេស ក្នុងន័យសំដៅកាត់បន្ថយជាអតិបរិមា និងឈានទៅលុបបំបាត់ នូវរាល់ការប្រើប្រាស់ហត្ថពលករបរទេសមិនស្របច្បាប់តាមគោលដៅ ឬទីតាំង អាជីវកម្មនានា និងទប់ស្កាត់ការប៉ះពាល់ ឬរំខានដល់មជ្ឈដ្ឋានជនបរទេសដែលកំពុងស្នាក់នៅប្រកបមុខរបរ និងធ្វើការស្របច្បាប់ ក្នុងព្រះរាជាណាចក្រកម្ពុជា ជាពិសេសក្នុងខេត្តសៀមរាប។
ក្រោយពីបានធ្វើការផ្សព្វផ្សាយអំពីលិខិតបទដ្ឋានគតិយុត្ត ពាក់ព័ន្ធនឹងការគ្រប់គ្រង និងប្រើប្រាស់ហត្ថពលកម្មបរទេសដល់ម្ចាស់ ឬ និយោជក សហគ្រាស គ្រឹះស្ថានទូទាំងខេត្តសៀមរាបរួចមក ក្រុមការងារចម្រុះអធិការកិច្ចហត្ថពលកម្មបរទេស នឹងធ្វើការចុះអធិការកិច្ចចាប់ពីខែសីហា ឆ្នាំ២០២៣នេះ។ មានប្រសាសន៍នៅក្នុងកិច្ចជំនួបនេះផងដែរ លោកស្រី យូ សុភា អភិបាលរងខេត្ត បានស្នើនិងជំរុញឱ្យក្រុមការងារអធិការកិច្ចចម្រុះ ពិនិត្យឱ្យបានម៉ឺងម៉ាត់ចំពោះជនបរទេសដែលមានបន្លំមករស់នៅខុសច្បាប់ និងត្រូវយកចិត្តទុកដាក់បន្ថែមទៅលើជនបរទេសដែលបាននឹងកំពុងស្នាក់តាមទីជនបទ ពិសេសនៅតាមស្រុកឆ្ងាយៗ។ លោកស្រីបានជំរុញឱ្យក្រុមការងារមានសាមគ្គីភាពគ្នាល្អ និងស្នើឱ្យមានការរាយការណ៍ជាប្រចាំរៀងរាល់ជួបបញ្ហាប្រឈមក្នុងអំឡុងពេលចុះអធិការកិច្ច និងរាយការណ៍អំពីលទ្ធផលជាប្រចាំខែមករដ្ឋបាលខេត្ត។
+6
15ងិន សារ៉ន, Darin Mao និង 13 នាក់ផ្សេងទៀត