![](https://asset.cambodia.gov.kh/provincial/sites/22/2023/08/366080366_633923462215317_7610166017317556876_n-1024x682.jpg)
ក្នុងកិច្ចស្វាគមន៍របស់លោក នឹម វ៉ាន់សំ ប្រធានគណៈកម្មការរៀបចំការបោះឆ្នោត ខេត្តសៀមរាប បានគូសបញ្ជាក់ អំពីលទ្ធផលនៃកិច្ចដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៧នេះ បានដំណើរការទៅប្រកបដោយភាព រលូន ក្រោមដំណក់ទឹកភ្លៀងទៀតផង ។ លោកបានលើកផងដែរថា ទោះបីជួបនូវភាពកង្វះខាតមួយចំនួនក៏ពិតមែន តែក្រុមមន្ត្រីគណៈកម្មការរៀបចំការបោះឆ្នោត ខេត្ត នៅតែបន្តអនុវត្តទៅតាមនិតិវិធីច្បាប់គណៈកម្មាធិការជាតិរៀបចំការបោះឆ្នោត ស្របតាមគោលការណ៍ នៃលទ្ធិប្រជាធិបតេយ្យ សេរី ពហុបក្ស ទាំងការបោះឆ្នោតដោយផ្ទាល់ និង មិនផ្ទាល់បានយ៉ាងទៀងទាត់ ស្របតាមរដ្ឋធម្មនុញ្ញ និង ច្បាប់បោះឆ្នោត សរុបចំនួន ២១ការបោះឆ្នោតរួចមកហើយ។ លោកក៏បានបន្ត ទៀតថា និយាយដោយឡែក ប្រជាពលរដ្ឋនៅខេត្តសៀមរាប បានអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧នេះ ដោយទឹកមុខស្រស់ស្រាយស្មើ ៧៩,៦៩% ទោះបីប្រឈមដោយភ្លៀងកំពុកធ្លាក់ ។ ម៉្យាងនៅទូទាំងខេត្តសៀមរាប សន្លឹកឆ្នោតទាំងខូច និង មិនបានការ មានចំនួនជាង ២ម៉ឺន៦ពាន់សន្លឹក។
បន្ទាប់ពីកិច្ចពិភាក្សា លើចំណុចខ្លាំង និង បញ្ហាប្រឈម ក្នុងការងារបោះឆ្នោតជ្រើសតាំងតំណាងរាស្ត្រ នីតិកាលទី៧ នេះ អង្គសន្និបាតក៏បានលើកនូវសំណើមួយចំនួន ដើមី្បសម្រាប់ការបោះឆ្នោតអាណត្តិក្រោយៗបន្ត ព្រមទាំងធ្វើការកែប្រែនូវបញ្ហាមួយចំនួន ដែលបានលើកឡើងក្នុងអង្គសន្និបាត ចំពោះមន្ត្រីបោះឆ្នោតនៅតាមការិយាល័យមួយចំនួន ព្រមទាំងអ្នកអង្កេតការណ៍គ្រប់គណបក្សនយោបាយផងដែរ។ មានចំណាប់អារម្មណ៍នោះដែរលោក អ៉ឹង គឹមលាង បានធ្វើការវាយតម្លៃខ្ពស់ នូវលទ្ធផលនៃកិច្ចដំណើរការរៀបចំ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ បានដំណើរការទៅដោយរលូន គ្មានអំពើហិង្សា ទាំងក្នុងយុទ្ធនាការឃោសនារកសម្លេងឆ្នោត និង ថ្ងៃបោះឆ្នោត បានប្រព្រឹត្តទៅតាមកាលវិភាគរបស់គណៈកម្មាធិការជាតិរៀបចំការបោះឆ្នោត ។ សមិទ្ធផលដែលសម្រេចបានមកនេះ ក៏អាស្រ័យដោយយើងទាំងអស់គ្នា ទាំងអាជ្ញាធរគ្រប់លំដាប់ថ្នាក់ គណៈកម្មការរៀបចំការបោះឆ្នោតគ្រប់លំដាប់ថ្នាក់ និង គណបក្សនយោបាយ ភាគីពាក់ព័ន្ធទាំងអស់ ដែលបានខិតខំធ្វើការកែលំអរដំណើរការបោះឆ្នោតទាំងក្របខ័ណ្ឌច្បាប់ និង ក្របខ័ណ្ឌបច្ចេកទេស ដោយឈរលើមូលដ្ឋាន នៃការប្រមែប្រមូលអនុសាសន៍ និង ធាតុចូលគ្របមជ្ឈដ្ឋាន ធ្វើការកែទម្រង់ ស្ថាប័នរៀបចំការបោះឆ្នោត ច្បាប់បោះឆ្នោត និង ការរៀបចំបញ្ជីបោះឆ្នោត ។ លោកបានបន្តទៀតថា គណៈបញ្ជាការឯក ភាពរដ្ឋបាលខេត្ត មានការទទួលខុសត្រូវយ៉ាងសំខាន់ ក្នុងការលើកកម្ពស់ ដំណើរការនៃលទ្ធិប្រជាធិបតេយ្យ សេរី ពហុបក្ស និង ការបោះឆ្នោតដោយសេរី ត្រឹមត្រូវ យុត្តិធម៌។ លោកបានបន្តទៀតថា អាជ្ញាធរខេត្ត បានយកចិត្តទុកដាក់ខ្ពស់ លើការងារសន្តិសុខ សុវត្ថិភាព ជូនដល់គ្រប់គណបក្សនយោបាយ ដោយកងកម្លាំងសមត្ថកិច្ចគ្មានការលំអៀង ដោយឈរលើគោការអព្យាក្រិត្យ និង បង្កបរិយាកាសដល់ប្រជាពលរដ្ឋ ចូលរួមការបោះឆ្នោតប្រកបដោយសុវត្ថិភាព គ្មានការភ័យខ្លាច ។
ឆ្លងតាមការបោះឆ្នោតដោយផ្ទាល់ និងមិនផ្ទាល់តាមគោលការណ៍ នៃលទ្ធិប្រជាធិបតេយ្យ សេរីពហុបក្ស ទាំងនៅថ្នាក់ជាតិ ក្រោមជាតិ ទាំង២១លើកកន្លងមកនេះ ក៏បានផ្តល់មេរៀន និង បទ ពិសោធជាច្រើន សម្រាប់យើងទាំងអស់គ្នា ( សន្តិភាព លទ្ធិប្រជាធិបតេយ្យ ការបោះឆ្នោត និងអភិវឌ្ឍសង្គម) ដែលមានទំនាក់ទំនងផ្សាភ្ជាប់ និង ជះឥទ្ធិពលឲ្យគ្នាទៅវិញទៅមក មិនអាចកាត់ផ្តាច់បានឡើយ សម្រាប់ភាពថ្លៃថ្នូរ ភាពរុងរឿង និង ផលប្រយោជន៍ដ៏ឧត្តុង្គឧត្តមនៃប្រទេសជាតិ និង ប្រជាពលរដ្ឋយើង ។ ក្នុងនោះលោកអភិបាលរងខេត្ត ក៏បានលើកនូវចំណុចមួយចំនួនជាមូលដ្ឋានគ្រឹះនៃការអនុវត្ត និង ធ្វើការជម្រុញ ដល់អាជ្ញាធរមូលដ្ឋាន បន្តធ្វើការបណ្តុះបណ្តាលធនធានមនុស្សនៅក្នុងមូលដ្ឋាន សំខាន់មន្ត្រីការងារបោះឆ្នោត ក៏ដូចមន្ត្រីជំនាញផ្សេងៗ ប្រកបដោយគុណភាព សម្រាប់អ្នកបន្តវេន សំដៅលើកកម្ពស់ដំណើរការ នៃលទ្ធិប្រជាធិបតេយ្យ និង ការបោះឆ្នោតនៅកម្ពុជា លើមូលដ្ឋាន នៃការរក្សានូវសុខសន្តិភាព ស្ថិរភាពនយោបាយ រក្សាបាននូវកំណើេនសេដ្ឋកិច្ច ដោយឈរលើស្មារតីតម្កល់ផលប្រយោជន៍ជាតិជាធំ៕