លោកស្រី អភិបាលរងខេត្ត បានស្វាគមន៍យ៉ាងកក់ក្តៅចំពោះសមាគមសាសនាចក្រនៃព្រះយេស៊ូគ្រឹស្ទ នៃពួកបរិសុទ្ធថ្ងៃចុងក្រោយ និងអ្នកស្ម័គ្រចិត្តទាំងអស់ ដែលបានចំណាយពេលវេលា និងលះបង់សម្រាប់ការចូលរួមអភិវឌ្ឍន៍វិស័យអប់រំ និងសុខាភិបាលក្នុងខេត្តសៀមរាប។
តាមរយៈការបង្ហាញរបស់សមាគម បានបញ្ជាក់ថា ក្នុងខេត្តសៀមរាប សមាគម បានជួយរួមមាន៖
១. ការជួយជួសជុលដំបូល និងសាងសង់អគារសិក្សាសរុបចំនួន ១២ គម្រោង ក្នុងនោះគម្រោងកំពុងដំណើរការចំនួន ៣ គម្រោង រួមទាំងការជួសជុលបន្ទប់ទឹក លាបថ្នាំអគារសិក្សា ឡដុតសំរាម ផ្លូវដើរ ប៉មចម្រោះទឹកស្អាត និងការផ្គត់អាហាររូបត្ថម្ភដល់គ្រួសារក្រីក្រចំនួន ៥០០គ្រួសារ ក្នុងមួយខែ។
២. អគារមន្ទីរពេទ្យសូទ្រនិគម៖ ជួយដោះស្រាយប្រព័ន្ធបង្ហូរទឹកចេញពីបរិវេណអគារមន្ទីរពេទ្យ និងការដោះស្រាយប្រឡាយបង្ហូរទឹកចេញពីសហគមន៍។ មិនតែប៉ុណ្ណោះ សមាគមក៏បានជួសជុលអគារមន្ទីរពេទ្យចាស់ៗសាងសង់អគារសង្គ្រោះបន្ទាន់ បន្ទប់សោធន៍ និងបន្ទប់វះកាត់ ព្រមទាំងផ្តល់ម៉ាស៊ីនភ្លើងថ្មីសម្រាប់បម្រើការក្នុងបន្ទីរពេទ្យ និងជួសជុស និងរៀបចំបណ្តាញអុកស៊ីសែន។
សមាគម ក៏បានបង្ហាញអំពីគម្រោងសាងសង់អគារវះកាត់ព្យាបាលបេះដូង (PCI ) នៅមន្ទីរពេទ្យបង្អែកខេត្តសៀមរាប៖ សាងសង់អគារ ២ជាន់ បន្ថែមពីលើអគារមជ្ឈមណ្ឌលផ្តល់ឈាម ដែលមានគ្រឹះសម្រាប់សាងសង់ ៣ជាន់ ដោយមានបំពាក់បរិក្ខារទំនើបៗ សម្រាប់ការពិនិត្យសរសៃឈាមបេះដូង និងព្យាបាលសង្គ្រោះបន្ទាន់។ គម្រោងនេះ សមាគមនេះកំពុងដាក់ស្នើសុំការអនុម័ត ពីប្រធានសមាគម ដែលបច្ចុប្បន្នគម្រោងបានទទួលការអនុម័តពីប្រធានតំបន់អាស៊ីរួចហើយ។ ចំណុចសំខាន់ពាក់ព័ន្ធជាមួយអាជ្ញាធរ និងស្ថាប័នជំនាញក្នុងខេត្ត គឺការគាំទ្រនិរន្តភាពលើបច្ចេលទេស ធនធានមនុស្ស និងលើកលែងពន្ធនាំចូលនូវឧបករណ៍ សម្ភារបច្ចេកទេសនានា។
ក្រោយពីបានស្តាប់បទបង្ហាញ លោកស្រី អភិបាលរងខេត្ត ជួសមុខ ឯកឧត្តម អភិបាលខេត្ត សូមថ្លែងអំណរគុណការជួយគាំទ្ររបស់សមាគមនាពេលកន្លងមក ជាពិសេសក៏ជាផ្នែកជាមួយជួយលើកកម្ពស់វិស័យសុខាភិបាលសម្រាប់ប្រជាជនក្នុងខេត្ត និងខេត្តពាក់ព័ន្ធ មិនតែប៉ុណ្ណោះគម្រោងនេះក៏នឹងជួយដល់ភ្ញៀវទេសចរដែលមកដំណើរកំសាន្ត ហើយត្រូវការសារព្យាបាលបន្ទាន់នេះផងដែរ៕