លោកអភិបាលរងខេត្តបានថ្លែងថា ព្រឹត្តិការណ៍កីឡារត់ប្រណាំងឆ្លងកាត់ឧបសគ្គ (Raid Amazones) ជាប្រភេទកីឡាដ៏មានប្រជាប្រិយភាព មួយរបស់ពិភពលោក ត្រូវបានរៀបចំឡើងចាប់តាំងពីឆ្នាំ២០០១ ក្នុងគោលដៅដើម្បីពង្រឹងសិទ្ធិអំណាចរបស់ស្ត្រី ក្នុងវិស័យកីឡា និងបានបង្ហាញពីភាពក្លាហាន ការតស៊ូអត់ធ្មត់របស់អត្តពលិកនារី។
លោកបានបញ្ជាក់ថា ការប្រកួតកីឡានេះ គឺជាសកម្មភាពដែលបានផ្សព្វផ្សាយ លើកកម្ពស់ និងគាំទ្រស្ត្រីឱ្យពួកគាត់កាន់តែរឹងមាំ និងហ៊ានបញ្ចេញសមត្ថភាព ភាពក្លាហានដែលខ្លួនមានដូចបុរស ។ មិនត្រឹមតែប៉ុណ្ណោះព្រឹត្តិការណ៍ដ៏អស្ចារ្យនេះ ក៏បានលើកស្ទួយ និងឆ្លុះបញ្ចាំងពីវប្បធម៌ អរិយធម៌ ប្រវត្តិសាស្ត្រ និងប្រពៃណីរបស់ព្រះរាជាណាចក្រកម្ពុជា តាមរយៈសកម្មភាពប្រកួតប្រជែងលើវិញ្ញាសានានា ដែលបានជួយផ្សព្វផ្សាយពីសក្តានុពលទេសចរណ៍ របស់ ព្រះរាជាណាចក្រកម្ពុជា ជាពិសេខេត្តសៀមរាប ដែលមានភាពល្បីល្បាញនូវប្រាង្គប្រាសាទដែលមានក្បូរក្បាច់រចនាស្រស់ស្អាត និងសំណង់បុរាណដ៏ធំមហិមា ព្រមទាំង សម្បូរទៅដោយសម្បត្តិវប្បធម៌ដ៏រុងរឿងជាច្រើនទៀតផង ។ លើសពីនេះ ព្រឹត្តិការណ៍នេះចង់បង្ហាញពីការប្រើប្រាស់រាងកាយ និងការផ្សងព្រេង ដែលបានដើរតួយ៉ាងសំខាន់ក្នុងការបំផុសគំនិតដល់ស្ត្រីទូទាំងពិភពលោក ដោយបង្ហាញឱ្យឃើញថា កីឡា និងការផ្សងព្រេងឆ្លងផុតព្រំដែនយេនឌ័រ ហើយរាល់ឧបស័គ្គដែលបានឆ្លងកាត់គឺ ជាការបោះជំហានឆ្ពោះទៅរកការអភិវឌ្ឍផ្ទាល់ខ្លួន ។ ព្រឹត្តិការណ៍កីឡារត់ប្រណាំង (Raid Amazones)លើកទី៤នេះ គឺជាកាបង្កើតព្រឹត្តិការណ៍ទេសចរណ៍មួយនៅក្នុងពិធីបុណ្យទន្លេលើកទី៨ ឆ្នាំ២០២៤នៅខេត្តសៀមរាប ក៏ដូចជាការគាំទ្រដល់យុទ្ធនាការទស្សនាសៀមរាបឆ្នាំ២០២៤ របស់រាជរដ្ឋាភិបាលផងដែរ។
សូមបញ្ជាក់ថា ព្រឹត្តិការណ៍កីឡារត់ប្រណាំង (Raid Amazones) លើកទី៤នេះ បានចែកកីឡាការិនីជាក្រុមៗ ដោយក្រុមនីមួយៗ មានកីឡាការិនីពី ០៤ ទៅ ០៦នាក់ និងបានចាប់ចេញដំណើរពីចំណុចមុខប្រាសាទតាព្រហ្ម ដោយបានឆ្លងកាត់ប្រាង្គប្រាសាទ កាត់ព្រៃក្នុងតំបន់អង្គរ និងឆ្លងកាត់ឧបសគ្គជាច្រើន រហូតដល់គោលដៅកំណត់ចុងក្រោយ នៅមុខប្រាសាទបកី្សចាំក្រុង ៕