នៅរសៀលថ្ងៃចន្ទ ៨រោច ខែផល្គុន ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៦ ខែមីនា ឆ្នាំ២០២០ លោក ចៅ ម៉ៅមុន្នី សមាជិកគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនដល់គ្រួសាររងគ្រោះដោយខ្យល់កន្រ្តាក់ចំនួន ៦ គ្រួសារ ក្នុងស្រុកវ៉ារិន (រលំផ្ទះ ១ខ្នង និងរបេីកដំបូល ៥ខ្នង) កាលពីថ្ងៃទី ១៤ ខែមីនា ឆ្នាំ២០២០ មកពីឃុំស្រែណូយ ៣គ្រួសារ និងឃុំល្វាក្រាំង៣គ្រួសារ ។
មានប្រសាសន៍នាឱកាសនោះ លោក ចៅ ម៉ៅមុន្នី សមាជិកគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជា ឯកឧត្តម ទៀ សីហា ប្រធានគណៈកម្មាធិការសាខា និងបានសំដែងនូវការសោកស្ដាយជាខ្លាំងជាមួយក្រុមគ្រួសាររងគ្រោះ ដែលនេះជាការរងគ្រោះនឹកស្មានមិនដល់ និងគ្មានអ្នកណាចង់ជួបប្រទះឡើយ ហើយសូមលើកទឹកចិត្តបងប្អូន សូមកុំអស់សង្ឃឹម ត្រូវប្រឹងប្រែងតទៅមុខទៀត ដើម្បីជីវភាពក្រុមគ្រួសារ។ លោកបន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី តែក៏អាចជួយសម្រាលទុក្ខលំបាកបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។
អំណោយមនុស្សធម៌ដែលបានផ្ដល់ជូនក្នុង ១គ្រួសារមាន៖
-គ្រួសាររលំ ទទួលបាន មុង១ ភួយ១ សារុង១ ក្រមា១ អាវយឺត២ កន្ទេល១ មី១កេស ត្រីខ១យួរ អង្ករ៣០គីឡូក្រាម ស័ង្កសី១៦សន្លឹក និងថវិកា២សែនរៀល
-គ្រួសាររបេីកដំបូល ទទួលបាន មុង១ ភួយ១ សារុង១ ក្រមា១ អាវយឺត២ កន្ទេល១ មី១កេស ត្រីខ១យួរ អង្ករ៣០គីឡូក្រាម ស័ង្កសី១០សន្លឹក និងថវិកា១សែនរៀល។
ជាមួួយគ្នានេះដែរគ្រួសារនីមួយៗ ទទួលបានប្រាក់ឧបត្ថម្ភបន្ថែមចំនួន ៤ម៉ឺនរៀល៕
