ថ្ងៃទី១៤ ខែមិថុនា ឆ្នាំ២០២៤ នៅសាលាគរុកោសល្យ និងវិក្រឹតការ បានរៀបចំពិធីប្រកាសតែងតាំង និងប្រគល់ភារកិច្ចជូនមន្ត្រីរាជការ នៃមន្ទីរអប់រំ យុវជន និងកីឡាខេត្តសៀមរាបក្រោមអធិបតីភាពលោកស្រី ម៉ននី រង្សី អភិបាលរងខេត្តតំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត ដោយមានការចូលរួមពីមន្ទីរ អង្គភាព និងមន្ត្រីរាជការនៃមន្ទីរអប់រំផងដែរ។ បន្ទាប់ពីសុន្ទរកថាស្វាគមន៍ និងសេចក្តីរាយការណ៍ដោយលោក លី ប៊ុនណា ប្រធានមន្ទីរអប់រំ យុវជន និងកីឡាខេត្ត និងអានដីកាតែងតាំង ដោយ លោក សុខ សំអាត នាយករងទីចាត់ការគ្រប់គ្រងធនធានមនុស្សសាលាខេត្តរួចមក លោកស្រីអភិបាលរងខេត្ត បានបញ្ជាក់ថា ការប្រកាសចូលកាន់តំណែងនាពេលនេះ គឺជាការប្រគល់ភារកិច្ច និងការទទួលខុសត្រូវមួយ ដែលតម្រូវឱ្យសាមីខ្លួនត្រូវតែបញ្ចេញឱ្យអស់ពីសមត្ថភាព លទ្ធភាព និងទេពកោសល្យ ដើម្បីជំនះបានរាល់ការលំបាកនានា ដែលកើតមានកន្លងមក ដែលចាំបាច់ត្រូវសហការជាមួយថ្នាក់ដឹកនាំ និងមន្ត្រីក្រោមឱវាទធ្វើយ៉ាងណាឱ្យអង្គភាពមានការប្រែប្រួលមុខមាត់ថ្មី សំដៅធានាបាននូវភារកិច្ចស្នូលដែលអង្គភាពត្រូវបំពេញ និងទទួលខុសត្រូវចំពោះមុខក្រសួងអប់រំ យុវជន និងកីឡា។ ឆ្លៀតក្នុងឱកាសនេះ ខ្ញុំសូមកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងនាពេលកន្លងមក ក្នុងការដឹកនាំវិស័យអប់រំ ឱ្យមានការរីកចម្រើនគួរជាទីមោទនៈ។លោកស្រី អភិបាលរងខេត្តក៏សូមសម្តែងនូវអំណរសារទរ ចំពោះមន្ត្រីគ្រប់គ្រងដែលត្រូវបានរដ្ឋបាលខេត្តសៀមរាប ផ្តល់សេចក្តីទុកចិត្តឱ្យកាន់មុខតំណែង ដែលបាននិងកំពុងធ្វើពិធីប្រកាសចូលកាន់មុខតំណែងនាពេលនេះ។ សូមលើកទឹកចិត្តចំពោះបេសកកម្មនានា ក្នុងការកសាង និងអភិវឌ្ឍធនធានមនុស្ស ប្រកបដោយគុណភាព និងគុណធម៌ប្រសើរបំផុតលើគ្រប់ផ្នែក ដើម្បីកសាងសង្គមកម្ពុជាឱ្យក្លាយជាសង្គមរីកចម្រើនលើផ្នែកចំណេះដឹង និងចំណេះធ្វើជាមូលដ្ឋាន។ ជាមួយគ្នានោះ ត្រូវរួមសាមគ្គីជាធ្លុងមួយ រវាងថ្នាក់ដឹកនាំ និងមន្ត្រីរាជការក្រោមឱវាទ ដើម្បីសម្រេចជោគជ័យ ដែលក្រសួងក៏ដូចជារដ្ឋបាលខេត្តប្រគល់ជូន។